Facebook الەۋمەتتىك جەلىسىندە قازاق ءارتىسى تۇڭعىشباي جامانقۇلوۆتى قورعاپ، وعان قاتىستى سوت ءىسىنىڭ باستالعاندىعىنا نارازىلىق ءبىلدىرىپ پىكىر ايتىپ جاتقاندار كوپ، دەپ حابارلايدى "قامشى". سولاردىڭ ءبىرى الەۋمەتتىك جەلى بەلسەندىسى قادىرعالي كوبەنتاي.

"كۇنىنە ەكى رەت جاڭالىقتار قارايمىن. وگەي بولسام دا، جەر باسىپ جۇرگەسىن، امال جوق، وسى قوعامنىڭ مۇشەسىمىن عوي دەگەن وي عوي باياعى..
كەزەكتى جاڭالىكتارىمدى تىڭداي قويايىن دەپ، تەلەديداردى قوسىپ قالسام:
- تۇڭعىشباي جامانقۇلوۆتىڭ ىسىنە بايلانىستى، سوت وتىرىسى باستالدى!-دەەەپ، سايراپ وتىر ديكتور. ماسقارا!
مىنا قوعام جامانقۇلوۆتى سوتتاماقشى ما سوندا؟.. تۇقاڭدى سوتتاۋ.. ونەردى قورلاۋ عوي بۇل!؟
اقىرى كەرەڭ بولماعاسىن، ءار نارسەنى تىڭدايسىڭ عوي.. ءبىر جىلدارى ت. جۇرگەنوۆ اتىنداعى ونەر اكادەمياسىنىڭ ءبىر رەكتورىنىڭ: "جامانقۇلوۆ ناشار پەداگوگ.."- دەگەنىن دە ەستىپ ەدىك. سوندا.. ءبىز كىمنەن وقىدىق؟ كىمنەن تاربيە الدىق؟ قازاق تەاترلارىنىڭ بەتكە ۇستار اكتەرلەرىنىڭ جەتپىس-سەكسەن پايىزى تۇقاڭنىڭ شاكىرتتەرى! قالابەردى ونەردىڭ باسقا سالالارىندا دا تالاي شاكىرتتەرى ءجۇرمىز. سوندا كىم ناشار؟ ءجا.. قويشى، پەندەشىلىك قوي دەدىك وندا دا..
دانىشپان اباي : "قازاقتىڭ ولگەنىنىڭ جامانى جوق، ءتىرىسىنىڭ وسەكتەن امانى جوق!" - دەيدى. ءبىز، شىنىمەن، سونداي حالىقپىز با؟ ولگەنىن وكىرتىپ ماقتايتىن، ءتىرىسىن اقتاي دا المايتىن ۇلتپىز با؟ ايران ىشكەنى قۇتىلىپ، شەلەك جالاعانى تۇتىلعان قوعام با بۇل؟ قايدا الگى.. جارقىراعان "جۇلدىزداردى" جاتىپ جازاتىن جازعىشتار؟ قاتىنىنىڭ ەتەگىنەن سىعالاپ، ەلدى ايتاقتايتىن "باتىرلار" قايدا؟
- وۋ، اعايىندار!
كەشەگى جەلتوقسان كوتەرىلىسىندە جاستاردى قورعايمىن دەپ، الاڭعا شىعىپ، ماڭدايىندا كۇرەكتىڭ ءىزى قالعان (ءالى كۇنگە دەيىن) جامانقۇلوۆ ەمەس پە ول؟! اقىن-جازۋشىلاردى شەشەندىگىمەن، ءسوز ساپتاۋىمەن تاڭعالدىرعان تۇڭعىشباي ەمەس پە ول؟! قازاقتىڭ قاراكوز ۇل-قىزدارىنىڭ تالانتىن تانىپ، تاربيەلەپ، ونەر دوداسىنا، ساحنا دوداسىنا باپتاپ قوسقان ۇستاز ەمەس پە ول؟! وتتەرى جارىلىپ كەتسە دە ايتايىن، قازاق حاندارىن تۇقاڭداي سومداعان اكتەر جوق ءالى.
تالاي تەكتىلەرىمىزدى تەمىر تورعا توعىتىپ، تاۋىرلەرىن تاپتاتىپ، اتتىرىپ، استىرىپ، شاپتىرۋدان اتىمىز شىققان ۇلت ەدىك، سول ادەتىمىز ءالى قالماعان با؟ ءبىر تالانتتى اقتاي المايتىن قانداي حالىقپىز ءبىز؟
- بەۋ، اعايىندار!
ويانايىق، باس كوتەرەيىك! تۇلعا تالانتىمىزدى تاپتاتپايىق تەكسىزدەرگە!"، - دەيدى قادىرعالي كوبەنتاي.

سونىمەن قاتار تۇڭعىشباي جامانقۇلوۆتىڭ ىسىنە قاتىستى كامال ۇزاقوۆ تا ءوز پىكىرىن الەۋمەتتىك جەلىدە جازىپ قالدىردى.

"ق ر حالىق ءارتىسى، پروفەسسور، مەملەكەتتىك سىيلىقتىڭ لاۋرەاتى، اكتەر ءارى ۇستاز تۇڭعىشباي جامانقۇلوۆتىڭ ابىرويىن ساقتاپ قالۋ بۇگىنگى ۇرپاقتىڭ قولىنان كەلمەسە، وندا قازاققا، قازاقتىڭ ونەرىنە جاعىلعان كۇيە، سۇيەگىنە باسىلعان تاڭبا بولارى ءسوزسىز. كەلەشەك ۇرپاقتىڭ وزگە جۇرت الدىندا ونەرىمىز جايلى ايتۋىنا كەدەرگى كەلتىرەرى انىق.
ونەر - مەملەكەت بەتپەردەسى.
ونەرىمىزدى دارىپتەپ، بولاشاق ۇرپاققا جەتكىزۋگە ماڭداي تەرىن توگىپ، ونەر جولىندا تاپ كەلگەن قيىندىقتاردى جەڭىپ، ىستىعىمەن سۋىعىن، اششىسىمەن تۇششىسىن بىردەي قابىلداپ، مىڭداعان شاكىرت تاربيەلەپ كەلگەن ارىستاي ازاماتىمىزعا كۇيە جاعۋ قازاققا كۇيە جاعۋمەن بىردەي.
17.000.000 قازاقتىڭ ىشىندە 17.000 تۇڭعىشباي جوق، ول بىرەۋ عانا.
ماڭدايىمىزعا بىتكەن ارىسىمىزدىڭ بەدەلىن تۇسىرمەي، ابىرويىن ساقتاپ قالايىق!" - دەپ جازادى الەۋمەتتىك جەلىدەگى پاراقشاسىندا.