ەلباسى مەملەكەت جۇرگىزىپ جاتقان دەموگرافيالىق ساياساتتىڭ اسپەكتىلەرىنە توقتالىپ، انا مەن بالاعا قولداۋ كورسەتۋ جانە ولاردى قورعاۋ ماسەلەلەرىنە نازار اۋداردى.

– بيىل مەنىڭ تاپسىرماممەن 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى ىسكە اسىرىلا باستايدى. شىلدە ايىندا بالا تۋۋعا بايلانىستى تولەنەتىن جاردەماقى كولەمى 20 پايىزعا وسەدى. جىل سايىن انا مەن بالاعا قاراستىرىلعان قارجىلىق قولداۋ شىعىندارى 160 ميلليارد تەڭگە بولىپ وتىر. وعان قوسا اتا-انالارعا 120 ميلليارد تەڭگە مەملەكەتتىك الەۋمەتتىك ساقتاندىرۋ قورى ەسەبىنەن تولەنىپ كەلەدى. سوڭعى ون جىلدا ءبىز انا ءولىمىن 3،7 ەسەگە، بالا ءولىمىن ءبىر جارىم ەسەگە دەيىن تومەندەتۋگە قول جەتكىزدىك، – دەدى مەملەكەت باسشىسى.

بۇدان بولەك، نۇرسۇلتان نازاربايەۆ ەلىمىزدەگى گەندەرلىك ساياساتتى نىعايتۋعا باعىتتالعان ءبىرقاتار مىندەتتى ايقىنداپ بەردى. ونىڭ ىشىندە وتباسى ينستيتۋتىن نىعايتۋ باستى مىندەتتىڭ ءبىرى بولىپ سانالادى.

بۇل ورايدا ەلباسى قازاقستاندا ەرلى-زايىپتىلاردىڭ جاۋاپكەرشىلىك ارقالاۋعا دايىن بولماۋىنىڭ سالدارىنان نەكەگە تۇرعان  ءاربىر ءۇشىنشى جۇپتىڭ اجىراسىپ جاتقانى جونىندە مالىمەت كەلتىردى.

– ءقازىر ەلىمىزدە اتا-انانىڭ تەك بىرەۋىنىڭ عانا اسىراۋىنداعى تولىق ەمەس جارتى ميلليون وتباسى بار. بۇل ماسەلەنى شەشۋ جونىندە شارالار قابىلداۋ قاجەت، – دەدى قازاقستان پرەزيدەنتى.

سونىمەن بىرگە، مەملەكەت باسشىسى بالالارعا قاتىستى كەز-كەلگەن زورلىق-زومبىلىقتى جويىپ، وسكەلەڭ ۇرپاق تاربيەسىن ارناۋلى ۇيىرمەلەر مەن مەكەمەلەردە پاتريوتتىق سەزىمدى كۇشەيتۋ ارقىلى قامتاماسىز ەتۋ قاجەتتىگىنە نازار اۋداردى.

– ءتورت جىلدا ءبىر رەت وليمپيادا جەڭىمپازدارى جەتەكشىلىك ەتەتىن  بۇكىلقازاقستاندىق بالالار وليمپياداسىن وتكىزۋ مۇمكىندىگىن قاراستىرۋعا بولادى. تاعى ءبىر ماسەلە – ايەلدەردىڭ ورتاشا كىرىس دەڭگەيى ەركەكتەرمەن سالىستىرعاندا ءالى كۇنگە دەيىن ۇشتەن ءبىر مولشەرگە تومەن. مۇنداي جاعدايدىڭ ورىن الۋىنىڭ باستى سەبەبىنىڭ ءبىرى – ۇكىمەت بەكىتكەن ايەلدەر ەڭبەگىن قولدانۋعا تىيىم سالىنعان جۇمىستار ءتىزىمى، – دەدى نۇرسۇلتان نازاربايەۆ.

ەلباسى گەندەرلىك ساياساتتىڭ باسىمدىعى بار ءبىر باعىتى رەتىندە انالار مەن بالالار ءۇشىن قولايلى ورتا قالىپتاستىرۋ، سونداي-اق اناعا دەگەن سىيلاستىق مادەنيەتىن جانداندىرۋ قاجەتتىگىن ايتىپ ءوتتى.

– بالكىم، بالالار ءۇشىن جالپىۇلتتىق اشىق ەسىك كۇندەرىن وتكىزىپ وتىرۋ كەرەك بولار. قۇرمەتتى حانىمدار، سىزدەردىڭ قولداۋلارىڭىزبەن ءبىز بارلىق جوسپارىمىزدى ىسكە اسىرا الامىز دەپ ۇمىتتەنەمىن، – دەدى قازاقستان پرەزيدەنتى.

مەملەكەت باسشىسى قازىرگى ساياسي جاڭعىرۋ ۇدەرىسى بارىسىندا ايەلدەردىڭ زور ءرول اتقاراتىنىنا سەنىم ءبىلدىردى.

كەزدەسۋگە قاتىسۋشىلار وزدەرىنىڭ كاسىبي جانە كۇندەلىكتى ومىرىندەگى جەتىستىكتەرى جونىندە اڭگىمەلەدى.

مەملەكەت باسشىسى ءىس-شارا سوڭىندا كوپ بالالى انا و.مۇقاشيەۆانى «التىن القا» بەلگىسىمەن ماراپاتتاپ، كەزدەسۋگە قاتىسۋشىلار ءۇشىن «اقوردا» رەزيدەنسياسى ىشىندە ەكسكۋرسيا جۇرگىزدى.

كەزدەسۋگە مەملەكەتتىك حاتشى، پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمى گ.ءابدىقالىقوۆا، پرەزيدەنت اكىمشىلىگىنىڭ باسشىسى ءا.جاقسىبەكوۆ، پارلامەنت ءماجىلىسىنىڭ دەپۋتاتى، بالا قۇقىقتارى جونىندەگى ۋاكىل ز.بالييەۆا، ۇلتتىق ەكونوميكا ۆيسە-مينيسترى م.ءابىلقاسىموۆا، ميكروبيولوگ-عالىم ءا.ەرنازاروۆا، بياتلوننان «الماتى-2017» ۋنيۆەرسياداسىنىڭ جەڭىمپازى ا.شيەۆچەنكو، اۋىلدىق ورتا مەكتەپ ديرەكتورى ي.سەدوۆا، «جاس اتامەكەن» جاس كاسىپكەرلەر كلۋبىنىڭ پرەزيدەنتى ز.كوكجانوۆا، اقىن ت.قابىلشا، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ ماگيسترانتى م.گاليسكايا، «تەڭىزشيەۆرويل» جاۋاپكەرشىلىگى شەكتەۋلى سەرىكتەستىگى ادام رەسۋرستارى باسقارماسىنىڭ باس مەنەدجەرى ش.التىبايەۆا، اۋداندىق اۋرۋحانانىڭ باس دارىگەرى ق.رازييەۆا، «استانا-بالەت» تەاترىنىڭ جەتەكشى بالەريناسى م.بۋكانوۆا، كوپ بالالى انا و.مۇقاشيەۆا، قوبىزدان حالىقارالىق بايقاۋلاردىڭ جەڭىمپازى ا.تاجىبايەۆا، كامەلەتكە تولماعاندار ءىسى جونىندەگى مامانداندىرىلعان اۋدانارالىق سوت ءتوراعاسى ن.راززاق، اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ءانشىسى و.داۆىدەنكو، قازاقستان رەسپۋبليكاسى قارۋلى كۇشتەرىنىڭ پاراشيۋتپەن سەكىرۋگە دايىنداۋ ورتالىعىنىڭ اعا مامانى ر.رامازانوۆا، ءارتىس س.باقايەۆا، جۋرناليست ۆ.ميرلان قىزى قاتىستى.