اقوردانىڭ باسپا ءسوز قىزمەتى نۇرسۇلتان ءابىش ۇلىنىڭ 15 جىل بۇرىن حالىقارالىق ايەلدەر كۇنى قارساڭىندا سويلەگەن سوزدەرىن جاريالادى دەپ حابارلايدى «قامشى» پورتالى. ەلباسىنىڭ ەموسياعا تولى ۆيدەوسىن كورە وتىرىپ، سەزىمگە ەرىك بەرمەۋ قيىن.

«انالار ءوز بالالارىنان كەز كەلگەن ايەل سياقتى ءار ۋاقىتتا دا جىلى سوزدەر كۇتەتىن بولار. اسىرەسە انالار مۇنى قاتتى كۇتەتىندەي. ءقازىر ۋاقىت وتكەننەن كەيىن، ەرجەتكەن سوڭ بارلىعىمىزدا دا انالارىمىزعا ۋاقىتىمىزدى از بولگەنىمىز ءۇشىن كەيىستىك تانىتىپ جاتامىز. جىلى سوزدەردى از ايتتىق دەيمىز. «اناشىم، مەن سەنى جاقسى كورەمىن!»، دەپ از ايتتىق. ونىڭ قاسىندا ۇزاق بولا الماعانىما وكىنەمىن. ونىڭ مەنى قالاي وتە جاقسى كورگەنىن بىلەتىنمىن. ونىڭ وسىناۋ سۇيىسپەنشىلىگى مەنى ومىردە ءالى كۇنگە دەيىن قولداپ كەلەدى. ءتىپتى، ماڭىزدى شەشىمدەر قابىلدار كەزدە دە ول تۇسىمە كىرەدى. بىردەن ايتايىن، مەن ءدارۋىش ەمەسپىن، ەشقانداي بالگەرگە دە، ەكستراسەنس پەن جۇلدىزشىعا دا سەنبەيمىن. الايدا، ول مەنىڭ تۇسىمە ەنىپ: «سەنىمدى بول، ءبارى دە جاقسى بولادى!» دەيتىن. ءقازىر ول ءتىرى بولعاندا مەن وعان ارناعان حاتىمدا وتە قاتتى جاقسى كورەتىنىمدى جانە ونى قادىرلەيتىندىگىمدى جازار ەدىم»، - دەدى نۇرسۇلتان نازاربايەۆ.

/