ماڭعىستاۋ وبلىسىنداعى مۇنايلى اۋدانىندا كولىگى كوپتىڭ قاجەتىنە جاراعان كەيۋانا تۇرادى. الپىستى القىمداعان قاريا اۋدانداعى تەمىرجول قويماسىنان اقتاۋعا جۇك تاسىمالدايدى دەپ حابارلايدى حابار 24.

ايەلگە ءتان ەمەس كاسىبىن دامىتىپ، حالىق قۇرمەتىنە بولەنىپ كەلەدى. اۋىر كولىك تىزگىنىن ەركىن باسقاراتىن نەسىپحان اجەي قىزمەتىنە تياناقتى. قاجەتىنشە تاۋلىك بويى جۇمىسقا شىعۋعا ءازىر. جولدا بۇزىلىپ تۇرعان كولىك جانىنان ءوتىپ كەتۋ – كەيۋاناعا جات قىلىق. بۇل جولى دا ادەتىنەن جاڭىلعان جوق.

كابينادان كيمەشەكتەگى انانىڭ شىققانىن كورگەن جۇرگىزۋشىلەردىڭ باستاپقىدا ابدىرايتىنى راس. دەرەۋ كاپوتتى اشقىزىپ، موتورعا ۇڭىلەتىن قاريا قىلىعىنا ەرىكسىز باس شايقاسادى. «ساپارعا قۇرال-سايمانسىز شىعاتىن قاسيەتتەرىڭە تاڭدانام» دەيتىن اجەي سوزىنە ماز-مەيرام بولىسادى.

مەرەكە كۇندەرى ەل قاتارلى دەمالۋدىڭ ورنىنا كەيۋانا قىزمەتىنە شىعادى. ۇيىنە ەرتەرەك بارۋعا سۇرانعان جاستاردىڭ ورنىن باساتىن مىنەزى تاعى بار. ۇجىمىندا سىيلى قاريا ءاربىر مەيرام سايىن ەرەكشە قۇرمەتكە بولەنىپ ءجۇر.

نۇريا نۇرىموۆا، ماڭعىستاۋ تەمىرجول بولىمشەسى جۇك قويماسىنىڭ مەڭگەرۋشىسى:

-بۇل كىسىنى ءبىزدىڭ جۇك بولىمشەسىنىڭ اناسى دەپ ايتۋعا بولادى. 2007 جىلدان بەرى بىزبەن بىرگە جۇمىس ىستەيدى. حالىققا قىزمەت جاسايدى. ساپالى جۇمىس كورسەتىپ، ەڭبەك ەتىپ جاتىر. قايراتتىلىعىمەن، ءوزىنىڭ جاۋاپكەرشىلىگىمەن جۇك الىپ، جۇك جىبەرۋشىلەردىڭ العىسىنا يە بولىپ جۇرگەن ادام.

ماڭعىستاۋعا تەمىرجولمەن جەتەتىن تاۋارلار وسى قويمادا ساقتالادى. پويىز كەشىكسە، نەسىپحان اجەي دە جۇمىستا كىدىرەدى. تاپسىرىس بەرۋشىگە جەتكىزەتىن جۇگىنىڭ سانى مەن قۇجاتىنىڭ دۇرىستىعىنا كوز جەتكىزىپ الىپ، جولعا شىعادى. بارعان جەرىندە العىستان كەيىن مىندەتتى قويىلار سۇراقتاردىڭ بولۋىنا ۇيرەنىپ العان.

نەسىپحان ساديروۆا، زەينەتكەر:

- جاسىمدى، قالاي جاساپ ءجۇرسىڭ دەپ سۇرايدى. ۇيدە وتىرمايسىڭ با دەيدى، بارلىعى دا سۇرايدى. ءوزىم جۇرىسكە ۇيرەنىپ قالعانمىن، ۇيدە وتىرا المايمىن. ءبىر جاعىنان، دەنساۋلىق بولعان سوڭ. وسى جۇمىسىم جارايدى، بەرەكەت بەرسىن!

جاڭاوزەننەن مۇنايلىعا قونىس اۋدارعان اجەي ءۇش ۇل مەن قىز تاربيەلەپ، كىسى قاتارىنا قوستى. بۇگىندە التى نەمەرە ءسۇيىپ وتىرعان كەيۋانا قازىنالى 70 جاسقا كولىك تىزگىنىندە ءجۇرىپ جەتەرىنە سەنىمدى.