وڭتۇستىك كورەيا پرەزيدەنتى پاك كىن حەگە جەمقورلىققا قاتىستى داۋ ءۇشىن پارلامەنت قابىلداعان يمپيچمەنتتى  ەلدىڭ كونستيتۋسيالىق سوتى ماقۇلدادى. بۇل تۋرالى BBCء-دىڭ ورىس قىزمەتى جازدى. زاڭعا ساي پاك كىن حە ءوز پرەزيدەنتتىك رەزيدەنسياسىن بۇگىن تاستاپ شىعۋى ءتيىس. پارلامەنت يمپيچمەنتتى 9 جەلتوقساندا قابىلداعان ەدى، ءبىراق ەل زاڭىنا سايكەس 60 كۇن بويى كونستيتۋسيالىق سوت اتالمىش شەشىمدى زەرتتەپ، بۇگىن ونى ماقۇلدادى.

ەستەرىڭىزدە بولسا پاك كىن حەنىڭ قۇربىسى چحۆە سۋن سيل اياق استى بايىپ كەتكەنى ءۇشىن كۇدىك تۋىنداپ، ارتىنشا ونىڭ پرەزيدەنتتىڭ قۇربىسى ەكەندىگىن پايدالانىپ، بەلدى كومپانيالاردان اقشا بوپسالاعانى ايتىلعان ەدى. ەندى مىنە جەمقورلىق ەكەۋىنىڭ دە تۇبىنە جەتىپ وتىر. سونداي-اق اتالعان ءىس بويىنشا Samsung كومپانياسىنىڭ بىرنەشە باسشىسى دا ءىستى بولدى. 

ايتا كەتەتىن بولساق، ەل پرەزيدەنتىنىڭ جەمقورلىق داۋى تۋىنداعان سوڭ ميلليونداعان حالىق الاڭدارعا شىعىپ، ونىڭ وتستاۆكاعا كەتۋىن تالاپ ەتكەن بولاتىن. 

64 جاستاعى پاك كىن حە – وڭتۇستىك كورەيانىڭ 11 پرەزيدەنتى. ول بۇرىنعى پرەزيدەنت پاك چون ءحيدىڭ قىزى. پاك كىن حە ەل باسشىسى لاۋازىمىنا 2013 جىلدىڭ 25 اقپانىندا وتىرعان. ول ۇيلەنبەگەن، بالاسى جوق.