ارينە، بالا انانىڭ مەيىرىمىنە تويىپ ءوسۋى كەرەك. انا مەيىرىمىنە بولەنگەن بالا قايىرىمدى پەرزەنت بولىپ تاربيەلەنەدى دەپ جازادى ihsan.kz. الايدا، بالانى جەتى جاسقا دەيىن بولەك جاتۋعا داعدىلاندىرۋ قاجەت. ال، ون جاسقا تولعان بالانى اناسىنىڭ جانىنا الىپ جاتۋى دۇرىس ەمەس. پايعامبارىمىز (س.ع.س.): «...ولاردىڭ (ون جاسقا تولعاندا) توسەك ورىندارىن بولەك ەتىڭدەر»،–دەگەن.

يبن ابيدين (ر.ا.): «ون جاسقا تولعان بالاعا اناسى، اپكە-قارىنداسى جانە دە باسقا ايەل زاتىنىڭ جانىنا جاتۋعا تىيىم سالىنادى»،–دەيدى. توسەك ورنىن بولەك ەتۋدەگى ماقسات ءمالىم. ون جاستاعى بالا جىنىستىق جاعىنان دامي باستايدى. ۇيقى كەزىندە دەنەسى نەمەسە قولى بايقاۋسىز ءتيىپ كەتۋىنىڭ ءوزى بەيادەپ ارەكەت. يمام ءان-ناۋاۋي دە: «ەر كىسى مەن ەر كىسى، ايەل مەن ايەل ءبىر توسەكتە جاتۋىنا بولمايدى. ۇل نەمەسە قىز بالا ون جاسقا تولسا اناسى، اكەسى، اپكە-قارىنداسى جانە اعا-ىنىسىنەن بولەك جاتۋى كەرەك»،-دەيدى.