ءتىل ۇيرەنۋ ءۇشىن ەڭ كەرەكتىسى ادىستەمە ەمەس، قاجەتتىلىك، مۇقتاجدىق، نامىس. ءبىز مەكتەپ ءبىتىرىپ، الماتىعا كەلىپ، ۋنيۆەرسيتەتكە تۇسكەندە بىلەتىن ورىسشا ءسوزىمىزدىڭ سانى ءجۇز ەمەس، ەلۋگە دە جەتپەيتىن. ورىس ءتىلىن بىرەۋ بىزگە ەرەكشە ادىستەمەمەن ۇيرەتكەن جوق نەمەسە ورىس ءتىلى كەرەمەت بولعان سوڭ ۇيرەنىپ العان جوقپىز. كانيكۋلعا قايتاتىن كەزدە اۆتوۆوكزالداعى تەك ورىس تىلىندە سويلەيتىن كاسسيردەن بيلەت الا ءبىلۋ ءۇشىن، بانككە بارعاندا تەك ورىسشا جازىلاتىن بلانكتى تولتىرىپ، اكەمىزدەن كەلگەن اقشانى الا الۋ ءۇشىن، اۆتوبۋستا ورىس تىلىندە سويلەپ، سەنىڭ نامىسىڭا تيەتىن ءسوز ايتاتىندارعا جاۋاپ بەرە الۋ ءۇشىن، ورىسشا بىلمەگەنىڭ ءۇشىن سەنى نادان سانايتىن، كەم كورەتىندەردىڭ قاسىندا قورلانباس ءۇشىن، دۇكەندەردەن كۇندەلىكتى قاجەتتى زاتتاردى ساتىپ الۋ ءۇشىن، دارىگەرگە اۋىرعان جەرىڭدى ءتۇسىندىرىپ ايتۋ ءۇشىن، قازاقشا وقۋلىعى جوق پاندەردى ءتۇسىنۋ ءۇشىن ت.ب. دا وسىنداي تولىپ جاتقان قاجەتتىلىكتەردەن ۇيرەندىك. سول زامان ۇيرەتتى، سول قوعام ۇيرەتتى. ورىسشا بىلمەسەڭ تاكسي تۇگىل، جەدەل جاردەم دە شاقىرا المايتىن بولعان سوڭ ۇيرەندىك. ءوز كۇنىمىز ءۇشىن ۇيرەندىك. قۇجاتتاعى ورىسشا ءبىر ءسوزدى ادەيى ەمەس، بىلمەگەندىكتەن قاتە جازىپ قويساڭ، ول ۇلى ورىس ءتىلىن قورلاعاندىق بولىپ ەسەپتەلىپ، قۇجات وزىڭە قايتا لاقتىرىلاتىندىقتان ۇيرەندىك. سول كەزدەگى قازاقستاندا ورىس ءتىلىن قولدانۋشىلار عانا ەمەس، قورعاۋشىلار دا كوپ بولعان سوڭ ۇيرەندىك. ەشكىم ءبىزدى ەرەكشە ادىسپەن، ەرەكشە وقۋلىقپەن، ارنايى ۋاقىت، قاراجات، اۋديتوريا، ءمۇعالىم ءبولىپ ۇيرەتكەن جوق. ەندى كەلىپ بىرەۋلەر: "قازاقشا ۇيرەنۋگە كىتاپ جوق، ادىستەمە جوق، جاقسى ءمۇعالىم جوق" - دەيدى. ولار ەمەس، قازاق تىلىنە قاجەتتىلىك جوق. ەندى رەسەيدەن مىنا كىسى كەلىپتى، وسىدان ۇيرەنەيىك دەگەن ۇيات ءتىپتى. 
نەگىزى ءتىل - قوعامدىق قۇبىلىس. ءتىلدى وسىرەتىن دە قوعام، ءتىلدى وشىرەتىن دە قوعام.
P.s.ءبىر قازاق بۇگىن «رەسەيدەن ادىستەمەسى كۇشتى، كەرەمەت پوليگلوت كەلىپتى، قازاقشانى سول ارقىلى ۇيرەنەيىك، ۋنيۆەرسيتەتكە اپارايىق» دەگەن سارىندا پوست جازىپتى. سوعان نامىسىمنىڭ كەلىپ وتىرعانى.

ءلاززات دۇيسەمبەكوۆا