وتە اۋىر جاعدايعا تاپ بولعان جەتىم ايشا ءوز تاعدىرى جايىندا بايانداپ بەردى. جالعىز قالىپ ۇيرەنىپ قالعان قىز وقۋعا تۇسكەن سوڭ وزىنە دوستار تاۋىپ، اركىمنەن كوڭىلىنە مەدەۋ ىزدەدى. سول دوستارىنىڭ ارقاسىندا يسلامعا كەلىپ، اللا جولىنا تۇسەدى. قۇران جاتتاپ، 5 ۋاقىت نامازىن ۇزبەي وقيتىن بولعان.
2 جىل بۇرىن وزىنە لايىقتى جار ىزدەگەن ارۋ الەۋمەتتىك جەلى ارقىلى داعىستاندىق راسۋل ەسىمدى ازاماتپەن تانىسادى. راسۋل ايشانىڭ ءتۇزۋ جولدا ەكەنىنە ريزا بولىپ، ءوزىنىڭ اقىلدارىن ايتىپ، بار بىلگەنىن ۇيرەتىپ ءجۇردى. قىز جىگىتكە قاتتى باۋىر باسىپ قالادى. ءسويتىپ ەكى جاس ۇيلەنۋگە بەل بايلايدى. جىگىت قىزدى داعىستانعا الىپ كەتىپ، نەكەلەرىن قيادى. ءارى قاراي قىز اڭگىمەسىن بىلاي جالعايدى:
«داعىستاندا بىرنەشە اي تۇردىق. ءبىر قىزىعى، ول مەنى بىردە-بىر تۋىستارىمەن تانىستىرماعان. ءبىراق ول مەنىڭ كۇيەۋىم عوي، مەن بارىنە كوندىم. ەڭ باستىسى جالعىز ەمەسپىن.
كەي كەزدەرى راسۋل ۇيگە قونباۋدى شىعاردى. 1-2 كۇنگە ۇيگە كەلىپ تۇنەپ كەتەتىنى بولماسا، ۋاقىتىنىڭ كوبىن دالادا وتكىزەتىن. بىردە ۇيگە كەلىپ، ەكەۋمىز يسلام جايىندا ۇزاق اڭگىمەلەستىك. ءسويتڭپ، راسۋل ءوزىنىڭ اقشاعا مۇقتاج جيھاد جولىنداعى باۋىرلارى جايىندا ايتا باستادى. مەن داعىستاندا تۇرعاندىقتان راسۋل مەنىڭ ءوز پاتەرىمدى ساتۋعا كوندىردى. مەن كەرەك قۇجاتتارعا قول قويىپ اقىرى پاتەردى ساتتىق.
مەن جاقسىعا سەندىم، ول اقشانى ءوزىمىز ءۇشىن دە جۇمسارمىز دەپ ويلادىم. ءبىراق راسۋل اقشانى تۇگەل ءوز باۋىرلارىنا بەردى. اقشانىڭ ساۋاپتى ىسكە جۇمسالىپ جاتقانىن ايتىپ تىنىشتالدىردى مەنى. بىرنەشە ۋاقىتتاردان كەيىن ءبىر جەرگە تىعىلا تۇرۋىمىز كەرەك ەكەنىن ايتتى. ءبىر كۇنى ورمانداعى ءبىر لاشىققا كەلىپ، جيھاد جولىندا جۇرگەن دوستارىمەن تانىستىق. سول جەردە بىرنەشە ۋاقىت كۇن كەشتىك.
ءبىر كۇنى ءبىر كۇيەۋىمىنىڭ دوسى كەلىپ، راسۋلدىڭ ەندى جوق ەكەنىن ايتتى. ونى ءولدى دەدى. بىرنەشە كۇننەن كەيىن دوسى ماعان ەرەكشە ىقىلاسىن، قولداۋىن ءبىلدىرىپ، اقىرى ەكەۋمىز ۇيلەندىك. ونىڭ ەسىمى – حابيب. الايدا، حابيبپەن دە جاعداي ءدال راسۋلدىكىندەي بولدى. ونىڭ ومىردەن وتكەنىن ەستىدىم. ءسويتىپ، باسقا باۋىرى مۋساعا تۇرمىسقا شىقتىم.
ءبىر ۋاقىتتا مەن راسۋلدىڭ دا، حاليبتىڭ دا ءتىرى ەكەنىن ەستىپ قالدىم. ولار قالادا كوڭىل كوتەرىپ، دەمالىپ جۇرگەن كورىنەدى. سول ساتتە اياعىمنىڭ اۋىر ەكەنىن ءبىلدىم. ال ول كەزدە مەن ولاردىڭ ەشقايسىنىنا كەرەك ەمەس ەدىم. مەنى راسۋل الدادى، پاتەرىمدى ساتىپ، مەنى تۇكسىز قالدىردى» دەپ كوز جاسىن تيا الماعان ايشا سىڭلىلەرىنە ءوزىنىڭ قاتەلىگىن قايتلاماۋدى ءوتىندى.
