وزبەكستاننىڭ تۇڭعىش پرەزيدەنتى يسلام كارىموۆتىڭ كەنجە قىزى لولا كارىموۆا-تيلليايەۆا ورتالىق ازيا بيلەۋشىسى، قولباسشى ءامىر تەمىردىڭ نەمەرەسى ۇلىقبەك جايىندا دەرەكتى فيلم ءتۇسىردى، دەپ حابارلايدى qamshy.kz. ءفيلمنىڭ اتاۋى – «ۇلىقبەك. قيىن جولداردان جۇلدىزدرعا». ۇلىقبەك جايىنداعى فيلم لولا مەن ونىڭ جارى تيمۋردىڭ كينو الەمىندەگى العاشقى تۋىندىسى ەكەن. بۇل جايىندا لولا كارىموۆا ءوزىنىڭ فەيسبۋك پاراقشاسىندا ءبولىستى.
«دەرەكتى فيلم ورتا عاسىردا ءومىر سۇرگەن ويشىل، عالىم ۇلىقبەكتىڭ ومىرىنە ارنالادى. ۇلىقبەك جايىندا فيلم ءتۇسىرۋدى بۇرىننان جوسپارلاپ جۇرگەنمىن. اتالمىش تاريحي تۇلعا مەنى بالا كەزىمنەن قىزىقتىردى. ول ءبىلىمدى عانا بولىپ قويماي، ادامگەرشىلىك قاسيەتتەرى جوعارى ءارى ەلىن سۇيگىش باسشى دا بولا ءبىلدى. ۇلىقبەكتىڭ ەسىمىن اتى الەمگە ايگىلى عالىمدار گاليلەو گاليلەي، كوپەرنيك، دجوانس كەپلەرلەرمەن قاتار اتاۋعا لايىق تۇلعا. ۇلىقبەكتىڭ بيلىگى كەزىندە سامارقاند استرونوميا عىلىمدارىنىڭ ورتالىعى بولىپ ەسەپتەلدى».
فيلم سەناريىن جازىپ شىعۋ وڭاي بولماعانى انىق. ۇلى تۇلعانىڭ ءومىرىن تۇبەگەيلى حالىققا تانىستىرۋ ءۇشىن لولا كارىموۆا-تيلليايەۆا كوپ ىزدەنگەن.
سونداي-اق، ونىڭ ايتۋىنشا ءفيلمدى ءتۇسىرۋ بارىسىندا وزبەكستاندا تۇراتىن، تاريحتى سەزىنە الاتىن ادامدارمەن عانا جۇمىس ىستەگەن. ۇلىبريتانيا، اقش، فرانسيا، وزبەكستان، دانيا، رەسەي، نيدەرلاند ەلدەرىنەن اتاقتى عالىمدار شاقىرىلعان.
وزبەكستاندىق جانە قازاقستاندىق كاسكادەرلەردىڭ قاتىسۋىمەن تۇسىرىلگەن فيلم كورەرمەنگە الداعى ۋاقىتتا جول تارتادى.
