استانا پوليسەيلەرى ەكسپو قارسىڭىندا كوشە كەزىپ جۇرگەن قايىرشىلار باس قالانىڭ كوركىنە نۇقسان كەلتىرەدى دەپ ۋايىمداپ ءجۇر.

ىشكى ىستەر دەپارتامەنتىنىڭ باسشىسى امانتاي اۋباكىروۆ استاناداعى قايىرشىلار مەن ۇيسىزدەرگە قاتىستى جۇمىستاردىڭ جۇرگىزىلىپ جاتقانىن ايتتى.

«ءيا، بۇل كۇردەلى ماسەلە. قايىرشىلاردى زاڭدىق تۇرعىدان ەكىنشى مارتە پوليسيا بولىمدەرىنە شاقىرا المايدى. ءبىرىنشى رەت اكەلدىك، ءۇيسىز قايىرشى ەكەنى انىقتالدى. ءبىراق ول قازاقستان رەسپۋبليكاسىنىڭ ازاماتى جانە ەلدىڭ قالاعان جەرىندە كۇن كەشە الادى. سوندىقتان، ولارعا قانداي دا ءبىر شارا قولدانۋعا ءبىزدىڭ قۇقىمىز جوق»، - دەدى امانتاي اۋباكىروۆ informburo.kz تىلشىسىنە بەرگەن سۇحباتىندا.

«كوبىنە كوشە كەزەتىندەر – كىشكەنتاي بالالارىمەن جۇرگەن سىعان ايەلدەر ولارعا كۇشتەپ شارا قولدانا المايمىز. ءوز ەركىلەرىمەن ەلدەن كەتۋ ءۇشىن شارالار قولدانىلعان. ءبىراق، ەشكىم ءوز ەركىمەن كەتكىسى كەلمەيدى».

ونىڭ ۇستىنە قايىر تىلەيتىندەر ءبىر جەردە وتىرمايدى، ءبىر بازاردان ءبىر بازارعا، ءبىر كوشەدەن ءبىر كوشەگە اۋىسىپ جۇرەدى.

«ولار كىشكەنتاي بالالارىمەن جۇرگەندىكتەن كۇشتەپ ەلدەن شىعارۋ شارالارى قولدانىلمايدى، زاڭدا رۇقسات ەتىلسە دە. بۇل ماسەلە دە قاراستىرىلۋى ءتيىس. ەكسپو ۋاقىتىندا ولار استانامىزدىڭ كوركىن قۇرتادى دەپ ۋايىمدايمىز»، - دەدى امانتاي اۋباكىروۆ.

قايىرشىلاردان قۇتىلۋ جايىندا ويدى العاشقى بولىپ اكىمنىڭ ورىنباسارى اندرەي لۋكين ايتقان. سونداي-اق، ول 2017 جىلدان باستاپ بۇرىن ءىستى بولعانداردى باس قالاعا كىرگىزبەۋ جونىندە ۇسىنىس تاستادى. ونىڭ ۇسىنىسىن جەرگىلىكتى پوليسيا قىزمەتىنىڭ جەتەكشىسى باقىتجان مايلىبايەۆ قولداپ، شارا قولدانۋ كەرەكتىگىن ايتتى.

ەكسپو-2017 حالىقارالىق كورمەسى استانا قالاسىندا ماۋسىم ايىنىڭ 10-ى مەن قىركۇيەكتىڭ 10-ى ارالىعىندا وتەدى.