اقتوبەدەگى بالاباقشا اكىمشىلىگىندەگىلەر بالالاردىڭ شاي ءىشىپ جاتقانى تۇسىرىلگەن سۋرەتكە قاتىستى تۇسىنىك بەردى. ايتا كەتەيىك، وسىعان دەيىن الەۋمەتتىك جەلىلەردە جانە مەسسەندجەرلەردە بالالاردىڭ داستارقانىنىڭ بوس تۇرعانى، ال تاربيەشىلەردىڭ كەرىسىنشە مول داستارحان ۇستىندە وتىرعان سۋرەتى تارالعان بولاتىن. سۋرەتتەن تاربيەشىلەردىڭ ۇستەلىندە جەمىس-جيدەك، ەت جانە باسقا دا تاعامدار تۇرعانىن، ال بالالاردىڭ ۇستەلىندە تەك ءبىر تارەلكە مەن بىرنەشە باۋىرساق تۇرعانىن كورۋگە بولادى، دەپ حابارلايدى Tengrinews.kz

اقتوبەدەگى № 12 بالاباقشانىڭ ادىسكەرى بۇل سۋرەتتىڭ ولارعا قاتىسى جوق ەكەنىن ايتىپ وتىر.

"بۇل بالالار ءبىزدىڭ بالاباقشامىزدا تاربيەلەنىپ جاتقان جوق. ءبىز قالالىق ءبىلىم بولىمىنە تۇسىنىكتەمە جازدىق. بۇل ءبىزدىڭ بالاباقشا ەمەس. ءبىزدىڭ عيماراتىمىز ەمەس. تاربيەشىلەر دە باسقا. سىزدەر وسىندا كەلىپ ءبىزدىڭ توپتاعى بالالاردى كورسەڭىزدەر بولادى. تارالىپ جاتقان سۋرەتتىڭ اقتوبەدەگى 12 بالاباقشاعا قاتىسى جوق"، - دەدى مەكەمە قىزمەتكەرى.

ال اقتوبە قالالىق ءبىلىم بولىمىندەگىلەر قازىرگى ۋاقىتتا قالاداعى بالاباقشالاردان سۋرەتتەگى ادامداردى ىزدەستىرىپ جاتقانىن حابارلادى.

"بالاباقشالار اراسىندا ساۋالناما جۇرگىزەمىز، سۋرەتتى كورسەتەمىز. جۇمىستار جۇرگىزىلىپ جاتىر. اقتوبەدە تۇسىرىلگەن سۋرەت دەپ ايتىپ جاتقاندىقتان، ولاردى تابۋ كەرەك. سۋرەتتەگى ادامداردى تاپقان جاعدايدا بالاباقشا مەڭگەرۋشىسىنە قاتىستى شارالار قولدانامىز. سەبەبى بۇلاي بولماۋى ءتيىس"، - دەدى ورتا جانە مەكتەپكە دەيىنگى ءبىلىم بەرۋ سەكتورىنىڭ مەڭگەرۋشىسى گۇلناز مىرزاعالييەۆا.