سەرگەي پۋدوۆكيننىڭ پروديۋسەرلىك ورتالىعى قىتايلىق تەلەارناعا، قىتايلىق كومپانياعا نەمەسە ارتىستەرگە قاتىستى شاعىم تۇسىرمەگەن. بۇل تۋرالى ۆيتاستىڭ پروديۋسەرى سەرگەي پۋدوۆكين مالىمدەدى.

ايتا كەتەيىك، قازىرگى ۋاقىتتا ۆيتاستىڭ مۇددەسىن قىتايلىق ادۆوكاتتار كونتوراسى قورعايدى ەكەن. بۇل كونتورا قازاقستاندىق ءانشى ديماش قۇدايبەرگەننىڭ I am a Singer بايقاۋىندا «وپەرا №2» ءانىن ورىنداۋىنا بايلانىستى شاعىم تۇسىرگەن. 

«مەن شاعىم تۇسىرگەن جوقپىن. ۆيتاس تا شاعىمدانباعان. شىن مانىندە مەنىڭ كەلىسىمىم بويىنشا مەنىڭ قىتايلىق سەرىكتەسىم بولىپ كەلەتىن كومپانيا شاعىم تۇسىرگەن. بۇل كومپانيا قحر تەرريتورياسىندا ينتەللەكتۋال مۇلىكتى قورعاۋمەن اينالىسادى. وزدەرىڭىز كورىپ وتىرعانداي، بۇل زاڭ بۇزۋشىلىق وسى مەملەكەتتىڭ تەرريتورياسىندا بولدى. سوندىقتان سول ەلدە وسىنداي پروسەسس جۇرگىزىلىپ جاتىر. ناتيجەسىن بىرگە كورەمىز»، — دەدى پۋدوۆكين.

ەسكە سالايىق، ۆيتاستىڭ وكىلدەرى شاعىمدى Hunan ارناسىنىڭ ۇستىنەن تۇسىرگەن. وعان ديماش قۇدايبەرگەننىڭ I am a Singer بايقاۋىندا «وپەرا № 2» ءانىن ايتۋى سەبەپ بولعان. ازىرشە تەلەارنا بۇعان قاتىستى رەسمي پىكىر بىلدىرگەن جوق. ال ديماش قۇدايبەرگەننىڭ PR-مەنەدجەرى الپامىس شاريموۆ بۇل ءاندى ورىنداۋ كونكۋرس رەجيسسەرىنىڭ تاڭداۋى بولعانىن حابارلاعان. ال كەيىن داۋسىن رەسەيلىك انشىمەن سالىستىرعاندارعا ديماش قۇدايبەرگەننىڭ ءوزى جاۋاپ بەرگەن. «مەن «ەكىنشى ۆيتاس» ەمەسپىن!» دەپ مالىمدەگەن ەدى ديماش قۇدايبەرگەن.