پوليسيا حابارلاعانداي، تۇنگى ساعات بىردەن كەتە بەلگىسىز ءبىر جاس جىگىت 28 پانفيلوۆشىلار پاركىندە ورنالاسقان سۆياتو-ۆوزنەسەنسكيي كافەدرالدى سوبورىنىڭ تەرەزەسىن تاسپەن اتىپ، قيراتقان، دەپ حابارلايدى قامشى اقپاراتتىق اگەنتتىگى قالالىق ىشكى ىستەر دەپارتامەنتىنىڭ باسپا ءسوز قىزمەتىنە سىلتەمە جاساپ.
جارتى ساعاتتان سوڭ ەر ادام الاتاۋ اۋىلىنداعى پەتر جانە پاۆەل كيەلى اپوستولدار عيباداتحاناسىنا جەتىپ، تەرەزەسىن سىندىرعان.
جەدەل قىزمەتكەرلەر بەينەكامەرا ارقىلى كۇدىكتىنى ۇستاپ الدى. ول 1984 جىلى تۋعان يۆانوۆ ل. ەسىمدى ازامات ەكەن. قولعا تۇسكەن ەر ادامنىڭ كولىگىنەن جۇمىر تاستار تابىلعان.
پوليسيانىڭ بەرگەن مالىمەتىنشە، ەر ادام ايىبىن مويىنداپ وتىر. ءدىن قىزمەتشىلەرىمەن كيكىلجىڭگە كەلىپ، وسىلايشا ءوش الماق بولعانىن ايتتى.
شولۋشى: ايگەرىم تاۋباي
