شەتەلگە تۇراقتى ءومىر سۇرۋگە كەتەتىن حالىق سانى كوبەيىپ بارادى.  بۇل تۋرالى قامشى  اقپاراتتىق اگەنتتىگى ازاتتىققا سىلتەمە جاساپ حابارلايدى. 

الەۋمەتتىك-دەموگرافيالىق ستاتيستيكا باسقارماسىنىڭ ساراپشىسى گۇلجيحان ايعوزينانىڭ ايتۋىنشا، قونىس اۋدارۋشىلاردىڭ كوبى رەسەي، گەرمانيا جانە بەلارۋسكە تۇراقتانادى. ساراپشى سولتۇستىك قازاقستان وبلىسىنان وزگە ەلگە قونىس اۋدارۋشى ازاماتتاردىڭ سانى وبلىسقا كوشىپ كەلەتىندەر سانىنان كوپ دەيدى.

- 2016 جىلى وبلىسقا 743 ادام كوشىپ كەلدى. ال كەتكەندەر سانى 3 مىڭ 276. پەتروپاۆل قالاسىنا 476 ازامات كوشىپ كەلىپ، 1798 ادام كەتىپ قالعان. 2016 جىلى شەتەلگە كوشكەندەردىڭ كوبى رەسەي، گەرمانيا جانە بەلارۋسكە كەتتى، - دەدى گۇلجيحان ايگوزينا.

ستاتيستيكا ماماندارىنىڭ دەرەگىنە سايكەس، رەسپۋبليكا اۋماعىنداعى كوشى-قون بويىنشا سولتۇستىك قازاقستان وبلىسى تۇرعىندارى قونىس اۋداراتىن قالالاردىڭ ىشىندە استانا قالاسى ءبىرىنشى ورىندا تۇر. كەيىنگى ورىندا اقمولا وبلىسى، قاراعاندى جانە قوستاناي قالالارى تۇر.

وتكەن جىلى قازاقستاننان 26 مىڭ 747 ادام، ونىڭ ىشىندە سولتۇستىك قازاقستان وبلىسىنان 2 مىڭ 555 ازامات وزگە ەلدىڭ ازاماتتىعىن العان. 2017 جىلدىڭ ءبىرىنشى جارتىسىندا قازاقستاننان 4 مىڭ 423 ادام (ونىڭ 461ء-ى سولتۇستىك قازاقستان وبلىسىنان) شەتەلدەرگە قونىس اۋدارعان.

شولۋشى: ايگەرىم تاۋباي