قوستانايدا جوعالعان سەگىز جاستاعى يگور كوسكيي ءولى تابىلدى، - دەپ حابارلايدى قامشى اقپاراتتىق اگەنتتىگى Tengrinews.kz-كە سىلتەمە جاساپ.  پوليسياداعىلاردىڭ ايتۋىنشا، بالانىڭ ءمايىتىن قۇتقارۋشىلار 11 شىلدەدە ساعات 17.00-دە توبىل وزەنىنىڭ جاعاسىندا كورەي كوپىرىنىڭ ماڭىنان تاپقان. قاجەتتى ساراپتامالار تاعايىندالعان. وبلىستىق پروكۋراتۋراداعىلار بالانىڭ ءمايىتى تابىلعانىن راستاپ وتىر. ولاردىڭ بولجامىنا قاراعاندا، يگور كوسكيي سۋعا باتىپ كەتكەن.  "10 ماۋسىمدا سۋدا ىزدەستىرۋ شارالارىن جۇرگىزگەن ەرىكتىلەر توبى وبلىس پروكۋرورىنا Facebook ارقىلى ۇندەۋ جاساپ، ءشليۋزدى جابۋدى سۇرادى، سەبەبى سۋدىڭ جىلدامدىعى زور بولىپ، ىزدەستىرۋ جۇمىستارىن جۇرگىزۋ مۇمكىن بولمادى. پروكۋراتۋرا بۇل ءىستى تىندىرعاننان كەيىن ەرىكتىلەر جۇمىسقا كىرىستى، بالانىڭ ءمايىتى تابىلدى"، - دەپ حابارلاعان ەدى پروكۋراتۋرا وكىلدەرى.  بالا 4 شىلدەدە جوعالعان ەدى. 

شولۋشى: نازەركە مۇسا