بىرنەشە كۇن بۇرىن Qamshy.kz اقپارات اگەنتتىگى «استانا ارلاندارىنىڭ» باس باپكەرى نۇرلان اقۇرپەكوۆ مىرزانىڭ «كۋبا قابىلاندارى ءبىزدىڭ ارلاندار ءۇشىن قۇبىجىق ەمەس» اتتى سۇحباتىن جاريالاعان ەدى.
وندا، پرەزيدەنت كۋبوگىندا ءابىلحان امانقۇل ءبىر قولىنان جاراقات العانى، جۋىقتا دايىندىق ۇستىندە ەكىنشى قولىن دا جارالاپ العانى، سوندىقتان فينالدىق كەزدەسۋدە ورنىنا ساپارباي ايداروۆ شىعاتىنى ايتىلعان بولاتىن.

بۇكىل الەمدىك بوكس سەرياسىنىڭ WSB جوباسى بويىنشا فينالدىق كەزدەسۋ 15 شىلدە كۇنى استانا قالاسىنداعى «قازاقستان» سپورت كەشەنىندە وتەتىنى بەلگىلى. جەتىنشى ماۋسىمدى تۇيىندەيتىن بۇل دودادا «Astana Arlans» پەن «Cuba Domadores» كوماندالارى ونەر كورسەتەدى.

كۋبالىقتار بۇل فينالعا كىلەڭ وليمپيادا، الەم چەمپيوندارىن، تەك قانا ءبىرىنشى نومەرلى بوكسشىلارىن اكەلىپ وتىر. ال «استانا ارلاندارى» كومانداسى ەكىنشى، ءۇشىنشى، ءتورتىنشى نومەرلى بوكسشىلاردان قۇرالسا دا وزبەكستان، رەسەي، ءازىربايجان، جۇڭگو، انگليا سياقتى ەلدەردىڭ تەك قانا ءبىرىنشى نومەرلى بوكسشىلارىن جەڭىپ، فينالعا جەتىپ وتىر.

كۇللى جانكۇيەر كوز تىككەن وسىناۋ شايقاسقا ۇلتتىق قۇرامادان كومەككە كەلەدى دەگەن ۆاسيلي ليەۆيت پەن قامشىبەك قوڭقابايەۆتىڭ مايدانعا شىقپايتىنى وتكەندە بەلگىلى بولعان ەدى. ال 75 كەلى سالماقتا شارشى الاڭعا شىعادى دەپ كۇتكەن ءابىلحان امانقۇل جاراقاتىنا بايلانىستى الاڭعا شىعار-شىقپاسى بەلگىسىز قالعان. دارىگەرلەردىڭ تەكسەرۋىنەن وتكەن ءابىلحاننىڭ اقتىق سىندا الاڭعا شىعاتىنى بۇگىن انىق بەلگىلى بولدى. وسىعان بايلانىستى ارلانداردىڭ باس باپكەرى نۇرلان اقۇرپەكوۆ جانە كوماندا ساپىندا ونەر كورسەتەتىن ءابىلحان امانقۇلدىڭ وزىمەن دە پىكىرلەسكەن ەدىك.

«75 كەلىدە ءابىلحان امانقۇل رينگكە شىعا المايتىن بولدى» دەگەن حابار جانكۇيەرلەردىڭ كوڭىلىنە سۋىق سۋ سەپكەندەي بولىپ ەدى...

ءابىلحاننىڭ جاراقاتى اۋىرلاۋ بولعانى راس. ونىڭ ۇستىنە ول تامىز ايىندا گەرمانيانىڭ گامبۋرگ قالاسىندا وتەتىن الەم چەمپيوناتىنا قاتىسۋى كەرەك. ول دوداعا بايلانىستى وقۋ-جاتتىعۋ جۇمىستارى 12ء-شى شىلدەدە باستالادى. سونىمەن ۇلتتىق قۇرامانىڭ باس باپكەرىمەن اقىلداسىپ، ول جاتتىعۋدان بوساتتىق. ليەۆيت تە قامشىبەك تە شىقپايتىن بولعان سوڭ، 75 كەلىدە جەڭىس اكەلەدى دەپ كۇتكەن ءبىر جىگىتىم وسى ءابىلحان ەدى. جانكۇيەرلەر تاراپىنان «بىزدە مىقتى جىگىتتەر كوپ قوي، ولاردى نەگە شىعارمايدى؟» دەگەن سياقتى سان ءتۇرلى ساۋالدار بولادى عوي. سوندىقتان قولى اۋىرسا دا ءابىلحانعا سەنىم ارتۋعا تۋرا كەلدى. دارىگەرلەر رۇقسات بەردى، ءقازىر ەمنىڭ بارلىق ءتۇرىن قابىلداپ جاتىر.

قامشىبەك قوڭقابايەۆ ارلاندار ساپىندا الاڭعا شىعىپ قالار دەگەن ءۇمىت ءالى دە ۇزىلگەن جوق. ول جايلى نە ايتار ەدىڭىز؟

قامشىبەك تۋرالى ايتار بولساق، «اناسى اۋىرىپ قالدى» دەگەن سۋىت حابار جەتكەن كۇنى الىپ-ۇشىپ ماعان كەلدى. جاعدايدى ەستىگەن سوڭ ءبىرىنشى بولىپ مەن قولدادىم. «اناڭنىڭ قاسىنا بار. حال ۇستىندە جاتقاندا قول-اياعىن ۋقالاپ، قاسىندا وتىرعانعا نە جەتسىن؟ امان-ەسەن قاسىنا بارعانىڭ اناڭا كۇش بەرەدى» دەپ ۇشاققا ءوزىم وتىرعىزىپ جىبەردىم. سوسىن، بىرنەشە كۇننەن سوڭ حابارلاستىم. «اعا، انام كومادا جاتىر. سويلەي المايدى. ءبىراق، ءبارىن كورىپ، سەزىپ جاتىر. ال مەن بولسام ءبىراز كۇن دايىندىقتان قالىپ قويدىم، ماعان رەنجىمەسەڭىزدەر، انامنىڭ قاسىندا بولايىن»، دەپ بۇل ايقاسقا كەلمەيتىنىن ءبىلدىردى. سونىمەن ولجاس بۇقايەۆتى دايىنداۋعا كىرىستىك.

بۇقايەۆ پەن قارسىلاسى تۋرالى ايتا وتىرساڭىز.

ولجاس بۇقايەۆ تا وسال جىگىت ەمەس. مەنىڭ جورامالىم بويىنشا ونىڭ ايقاسى سونداي ءبىر تارتىستى دا قىزىقتى بولارىنا سەنەمىن. ويتكەنى، كۋبالىقتىڭ دا بويى ونشا ۇزىن ەمەس، دەنە كەلبەتى دە بۇقايەۆقا كەلەدى. ەكەۋىنىڭ دە بوكس مانەرى ءبىر ستيلدە، رينگتىڭ قاق ورتاسىندا تۇرىپ تىرەسەتىن ناعىز جەكپە-جەك بولادى. ال ءبىرى ۇزىن، ءبىرى قىسقا بولعاندا ءسال ىڭعايسىز ويىن بولارى بەلگىلى. قامشىبەك ويناعاندا باسقاشا بولار ەدى، قاشا ءجۇرىپ شابۋىلعا وتەدى، دەر كەزىندە سوققى جاسايدى، جىلدام دا باتىل.

جالپى، قامشىبەككە ەش وكپەم جوق. بۇل دۇنيەدە انادان ارتىق كىم بار دەيسىز؟ بۇنداي جاعداي ءبىر وتە نازىك نارسە عوي. سول ءۇشىن جانكۇيەرلەر دە ونى تۇسىنەدى دەپ ويلايمىن. 

كۋبالىقتار قازاق جەرىنە كەلدى مە ءقازىر؟

ءيا، ولار كەلىپ العالى ەكى كۇن بولدى. وسىندا كەلىپ جاتتىعىپ ءجۇر، بىزبەن سۋرەتكە دە ءتۇستى...

***

فينالدىق كەزدەسۋدە ءۇمىت ارتقان بوكسشىمىز ءابىلحان امانقۇلدىڭ ءوزىن دە اڭگىمەگە تارتقان ەدىك. ول جالپى جاعدايدى قىسقاشا بىلاي بايانداپ بەردى:

العاشىندا مەنىڭ بۇل مايدانعا شىقپايمىن دەگەن سەبەبىم – وسىدان ءبىر جىل بۇرىن سول قولىمنان جاراقات العانمىن. ونى ەمدەتىپ جاقسى بولعان دا ەدىم. سوسىن وتكەن 3ء-شى ماۋسىم كۇنى قوستانايدا انگليالىقتارعا قارسى جەكپە-جەكتە تاعى اۋىرتىپ الدىم. ەمدەتتىم، سوندا دا اۋىرىپ ءجۇردى. ودان كەيىن جاقىندا استانادا وتكەن پرەزيدەنت كۋبوگىندا وڭ قولىمدى جارالاپ الدىم. ارادا ءبىراز كۇن ءوتتى عوي، ءتاۋىر بولىپ قالعان سياقتى ەدى. سونىمەن، الدىڭعى كۇنى وتكەن سپارينگ دايىندىق كەزىندە ەكى قولىم دا قايتادان سىر بەردى. كەشە دارىگەرلەر تەكسەرىپ، رەنتگەنگە ءتۇسىردى دە الاڭعا شىعۋىما رۇقسات بەردى. ءقازىر ەمنىڭ بار ءتۇرىن جاساپ، لازەرمەن، ينەمەن ەمدەپ جاتىر. مەن دە بار كۇشىمدى سالىپ دايىندالۋدامىن. قارسىلاسىم ارلەن لوپەس الەم جانە وليمپيادا چەمپيونى، بارلىق ايقاستارىن ينتەرنەتتەن كورىپ، زەرتتەپ جاتىرمىن. ءوزىن دە بۇرىنان تانيمىن، مەنىمەن كەزدەسپەسە دە جانىبەك ءالىمحان، مەيرىم نۇرسۇلتانوۆ سياقتى اعالارىممەن كەزدەسىپ، جەڭىلگەن. اللا قالاسا، مەندە ءبارى ويداعىداي، جانكۇيەرلەرىمنىڭ سەنىمىن اقتايمىن. ءوز جەرىمىزدە ءوتىپ جاتقان شايقاستا ەلدىڭ، جەردىڭ، قازاقتىڭ نامىسى ءۇشىن بارىمدى سالامىن!

قازاق جۇرتى كوز تىككەن ايتۋلى دودادا ەل نامىسىن قورعايتىن بوكسشىلاردىڭ تولىق ءتىزىمى تومەندەگىدەي:

49 كەلى، تەمىرتاس ءجۇسۋپوۆ – يوحانۋس ارگيلاگوس

 52 كەلى، ولجاس ساتتىبايەۆ – يوسباني ۆەيتيا

 56 كەلى، يلياس سۇلەيمەنوۆ –  حاۆەريبانەس

 60 كەلى، زاكير سافيۋللين – لازارو الۆارەس

 64 كەلى، ءدىلمۇرات ميجيتوۆ – ەندي كرۋز

 69 كەلى، اسلانبەك شىمبەرگەنوۆ – رونەل يگلەسياس

 75 كەلى، ءابىلحان امانقۇل – ارەن لوپەس

 81 كەلى، ارمان رىسبەك – حۋليو لا كرۋس

 91 كەلى، انتون پينچۋك – ەريسلاندي ساۆون

 91 كەلىدەن جوعارى، ولجاس بۇقايەۆ – يواندري تويراك

نۇرسۇلتان امانجولۆ رەزەرۆتە.

اڭگىمەلەسكەن، سۋرەتتەردى تۇسىرگەن ۇلاربەك دالەي ۇلى