باسپاناسىن قورعايمىن دەپ ءوزىن-وزى ورتەپ جىبەرگەن الماتى قالاسىنىڭ  تۇرعىنى سۆەتلانا تۇرعانبايەۆاعا قاتىستى زاڭسىز شەشىم شىعارعان ەكس-سۋديا ءومىرزاق سەرىموۆتىڭ ءوزى دە سوتتالۋى مۇمكىن، دەپ حابارلايدى Qamshy.kz اقپارات اگەنتتىگى 31 ارناعا سىلتەمە جاساپ.

25 جىل بويى ادام تاعدىرىن شەشىپ كەلگەن سۋديانىڭ بۇدان باسقا دا زاڭسىز ىستەرگە قاتىسى بار سەكىلدى.

سۆەتلانا تۇرعانبايەۆا 5 جىل بۇرىن ۇيىنەن كۇشتەپ شىعارماق بولعان سوت ورىنداۋشىلارى مەن بالا-شاعاسىنىڭ كوزىنشە ءوز-وزىن ورتەپ جىبەرگەن. دەنەسىنىڭ 80 پايىزىن كۇيىك شالىپ، كوپ ۇزاماي اۋرۋحانادا كوز جۇمدى.

ونىڭ مۇنداي قادامعا بارۋىنا ماڭداي تەرىمەن تاپقان ءۇيىن سۋديا ءومىرزاق سەرىموۆتىڭ زاڭسىز دەپ تانىپ، سوت ورىنداۋشىسى الماسبەك ەلتوقوۆتىڭ قىسىم كورسەتۋى تۇرتكى بولعان دەيدى مارقۇمنىڭ بالالارى.

«انامدى وسىنداي جاعدايعا الىپ كەلگەن ەلتوقوۆ. ول كىسى پسيحولوگيلىق قىسىم كورسەتىپ، انامنىڭ تۇبىنە جەتتى. وعان سۋديانىڭ شەشىمى دە سەبەپ. انام بالالارى دالادا قالماسىن دەپ وزىنە قول جۇمسادى»، – دەيدى مارقۇمنىڭ قىزى.

ايەلى كوز جۇمعان سوڭ اراعا 4 جىل سالىپ جۇبايى زەيىش قورجىنباي دا و دۇنيەلىك بولدى.

ءقازىر داۋلى ۇيدە جەتىم قالعان بالالارى، كۇيەۋ بالالارى مەن كەلىندەرى، بارلىعى  16 ادام تۇرىپ جاتىر. ال، ءۇيدىڭ زاڭدى يەسى ءال بەلگىسىز.

مارقۇمنىڭ بەس بالاسى ءالى كۇنگە دەيىن تىركەۋگە تۇرماعان.

ءومىرزاق سەرىموۆ كاسىبىنە جارامسىز، قىزمەتىنە لايىقتى ەمەس دەگەن سەبەپپەن وتستاۆكاعا جىبەرىلگەن. ال، ونىڭ زاڭسىز ارەكەتتەرى ەندى عانا سوتقا جەتىپ وتىر. سوتتىڭ العاشقى تىڭدالىمىنا ەكس-سۋديا دا، ونىڭ ادۆوكاتى دا كەلگەن جوق. سوندىقتان سوت كەيىنگە قالدىرىلدى.

سوت وتىرىسىنا سۋديا سەرىموۆ زاڭسىز ۇكىم شىعارعان دەگەن ايىپپەن تاعى ون شاقتى ادام كەلدى.

«سەرىموۆ مەنىڭ ىسىمە قاتىستى دا زاڭسىز شەشىم شىعارعان. ەندى مىنە كوپ جىلدان بەرى الاياقتاردان ءوز باسپانامدى ارەڭ قورعاپ وتىرمىن. سوت ورىنداۋشىلارى باسپانامدى تارتىپ الماق. ەلىمىزدە سوتتىڭ شەشىمىن بۇزۋ وتە قيىن»، – دەيدى جابىرلەنۋشى يلشات كەنزين.