بۇگىن اقتوبەدە قازاقستانداعى العاشقى قۇقىقتىق قىزمەت كورسەتۋ ورتالىعى ءوز جۇمىسىن باستادى دەپ حابارلايدى Qamshy.kz اقپارات اگەنتتىگى اقتوبە وبلىسى اكىمىنىڭ باسپا ءسوز قىزمەتىنە سىلتەمە جاساپ.

اشىلۋ سالتاناتىنا وبلىس اكىمىنىڭ ورىنباسارى ەربول نۇرعالييەۆ، وبلىستىق ءماسليحات حاتشىسى ءسانيا قالدىعۇلوۆا، اقتوبە قالاسىنىڭ اكىمى ءىلياس يسپانوۆ، ق ر باس پروكۋراتۋراسىنىڭ اعا كومەكشىسى ساعاتبەك سۇلەيمەن، وبلىس پروكۋرورى نۇرعالىم ءابدىروۆ قاتىستى.

اتالمىش ورتالىق – وبلىستىق پروكۋراتۋرانىڭ وبلىس اكىمدىگى قولداۋىمەن جۇزەگە اسىرعان پيلوتتىق جوباسى. جوبانىڭ ماقساتى – ازاماتتاردىڭ مەملەكەتتىك جانە قۇقىقتىق ورگاندارعا دەگەن سەنىم دەڭگەيىن ارتتىرۋ، ولاردىڭ جۇگىنۋ قۇقىعىنىڭ جۇزەگە اسىرىلۋىن قامتاماسىز ەتۋ، ساپالى قۇقىقتىق قىزمەتتەرگە «ءبىر تەرەزە» قاعيداسى بويىنشا قول جەتكىزۋدى ارتتىرۋ.

«جەكە جانە زاڭدى تۇلعالاردىڭ وتىنىشتەرىنە تالداۋ جاسادىق. قۇقىق قورعاۋ ورگاندارىنىڭ قىزمەتى بويىنشا سۇراقتار وتە كوپ تۇسەدى. مەن اتالمىش ورتالىق حالىق ءۇشىن پايدالى بولادى، اكىمشىلىك كەدەرگىلەردى الىپ تاستاۋعا مۇمكىندىك بەرىپ، مەملەكەتتىك جانە قۇقىق قورعاۋ ورگاندارىنىڭ بەدەلىن ارتتىرادى دەپ سانايمىن»، - دەدى ە.نۇرعالييەۆ ورتالىقتىڭ اشىلۋ سالتاناتىندا.

ءوز كەزەگىندە باس پروكۋراتۋرانىڭ وكىلى س.سۇلەيمەن وبلىس اكىمدىگىنىڭ باسشىلىعىنا اتالمىش ورتالىقتىڭ اشىلۋىنا كومەكتەسكەنى ءۇشىن العىسىن ءبىلدىردى. ونىڭ ايتۋىنشا، اعىمداعى جىلدىڭ سوڭىنا دەيىن ەلىمىزدىڭ بارلىق وڭىرىندە وسىعان ۇقساس ورتالىقتار اشۋ جوسپارلانعان.

ورتالىقتا قۇقىق قورعاۋ جانە اتقارۋشى ورگانداردىڭ مەملەكەتتىك ورگاندار  ارەكەتتەرىنە شاعىم بەرۋ سۇراقتارى بويىنشا كورسەتەتىن قۇقىقتىق قىزمەتتەرىنىڭ تولىق جيىنتىعى ۇسىنىلاتىن بولادى. اقتوبەلىكتەر پروكۋراتۋرا، ىشىكى ىستەر، ادىلەت ورگاندارى، وبلىس اكىمدىگى قىزمەتكەرلەرىنەن، سونىمەن قاتار، قورعاۋشىلار مەن مەدياتورلاردان كەڭەس الا الادى.

كەلۋشىلەرگە قولايلى بولۋ ءۇشىن ورتالىق ەلەكتروندىق كەزەك جۇيەسىمەن جابدىقتالعان. ازاماتتاردىڭ قىزمەتتەردى تاڭداۋ سۇراقتارى بويىنشا بىلىكتى ماماندار كەڭەس بەرەتىن بولادى.

ققو وبلىستىق پروكۋراتۋرا عيماراتىنىڭ جەكە قاناتىندا ورنالاسقان.