نيكولاس كەيدج، دجون ما́لكوۆيچ، ەدريەن بروۋدي، باي لين، سۋلەيمان سيسسە، ماركو ميۋللەر استاناعا كەلەتىن بولدى. الەمدىك كينو سالاسىنىڭ ۇزدىكتەرى ەلوردادا وتەتىن XIII حالىقارالىق «ەۋرازيا» كينوفەستيۆالىنىڭ قوناقتارى، دەپ حابارلايدى Qamshy.kz اقپارات اگەنتتىگى.

2017 جىلدىڭ 22-28 شىلدە ارالىعىندا استانا قالاسىندا كانن، بەرلين، ۆەنەسيا سىندى «ا» كلاسسىنىڭ فەستيۆالدەرىمەن  تەڭ دارەجەدەگى ورتا ازيانىڭ اۋقىمدى  كينوفورۋمى بولىپ تابىلاتىن ءحىىى حالىقارالىق «ەۋرازيا» كينوفەستيۆالى وتەدى. بۇل تۋرالى ق ر مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ ديرەكتورى الماز نۇرازحان  مالىمدەدى.

ءحىىى حالىقارالىق «ەۋرازيا» كينوفەستيۆالىنىڭ بيىلعى ەرەكشەلىگى «استانا ەكسپو-2017» حالىقارالىق  كورمەسىنىڭ تۇجىرىمداماسىمەن ۇندەس «مادەنيەتتەر كوپىرى» تاقىرىبى قوزعالادى. كينوفەستيۆال  2016-2017 جىلدارى جارىق كورگەن الەمدىك فيلمدەردىڭ كورسەتىلىمىن  ۇسىنادى. وعان تولىق جانە قىسقامەترلى كارتينالار، اۆتورلىق جانە جانرلىق كينو كىرەدى.  «ەۋرازيا» حكف-نىڭ اياسىندا تمد، شىعىس (جۇڭگو، ءۇندىستان، وڭتۇستىك كورەيا) جانە باتىس (ەۆروپا، امەريكا) ەلدەرىنىڭ فيلم ساتۋشىلارى مەن ساتىپ الۋشىلارىنىڭ قاتىسۋىمەن «Eurasia Film Market» ءداستۇرلى بيزنەس-الاڭى كينوجوبالار پيچينگتەرىن، شەبەرلىك-ساعاتتارىن، باسپا ءسوز كونفەرەنسيالارىن ۇيىمداستىراتىن بولادى. بۇل كينوفەستيۆال تاريحىنداعى تۇڭعىش رەت ءوتىپ جاتقان اۋقىمدى شارا ەكەنىن ۇيىمداستىرۋشىلار ايرىقشا اتاپ ءوتتى.

باسپا ءسوز كونفەرەنسيانىڭ جۇمىسىنا XIII حالىقارالىق «ەۆرازيا» حكف-نىڭ باس ديرەكتورى  راشيد نۋعمانوۆ، قازىلار القاسىنىڭ مۇشەسى تالعات  تەمەنوۆ جانە باعدارلامالىق ديرەكتور ەلەنا لارينوۆا قاتىستى. كينوفەستيۆالى  قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ تاپسىرىسىمەن «ۇلتتىق كينەماتوگرافيا ونەرى مەن عىلىمدارىنىڭ اكادەمياسى» قوعامدىق بىرلەستىگىمەن ىسكە اسىرىلادى.