ورالدا بلوگەر ايبولات بوكەنوۆكە قاتىستى ق ر قك-نىڭ 274-بابى 2-بولىگىنە سايكەس (كورىنەۋ جالعان اقپارات تاراتۋ) قىلمىستىق ءىس قوزعالدى، دەپ حابارلايدى  Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

وبلىستىق ءىىد-نىڭ باسپا ءسوز قىزمەتىنەن تۇسكەن مالىمەتكە قاراعاندا، «جاسۇلان-فلورا» ج ش س باسشىسى ايدار نۇرعوجايەۆتىڭ ارىزى نەگىزىندە ورال قالالىق ىشكى ىستەر باسقارماسىنىڭ تەرگەۋ ءبولىمى قىلمىستىق ءىس قوزعاپ، قازىرگى كەزدە سوتقا دەيىنگى تەرگەۋ امالدارى جۇرگىزىلۋدە. ق ر قىلمىستىق ءىس جۇرگىزۋ كودەكسىنىڭ 24-بابى تالاپتارى نەگىزىندە ءىستىڭ ءمان-جايىن تولىق انىقتاۋ ماقساتىندا ا.بوكەنوۆتىڭ ۇيالى تەلەفونىن الۋ جونىندە شەشىم قابىلداندى. قاجەتتى تەرگەۋ امالدارى جۇرگىزىلگەننەن كەيىن ۇيالى تەلەفون يەسىنە قايتارىلدى.

وسىعان قاتىستى ا.بوكەنوۆ ءوز پىكىرىن ءبىلدىردى. «BNews.kz پەن 24.kz سايتتارىنان «ۆ ۋرالسكە پوياۆيتسيا پەرۆايا سۆەتوچنايا پيراميدا» دەگەن اقپاراتتى كوردىم. وندا بۇل ماقساتقا 25 ملن تەڭگە جۇمسالماق دەلىنگەن. سوعان تاڭعالىپ، الەۋمەتتىك جەلىدەگى پاراقشاما «ميلليونداردى جىلتىراققا شاشىپ، جۇرتتى الداعانشا، وسى قاراجاتقا قالامىزدىڭ ءبىر كوشەسىن جوندەگەنى دۇرىس بولار ما ەدى» دەگەن پىكىر جازىپ ەدىم. سول ءۇشىن ماعان جالعان اقپارات تاراتتىڭ دەگەن ايىپ تاعىلىپ وتىر. ەندەشە، سول اقپاراتتى بەرگەن «حابار» تەلەارناسى مەن BNews.kz سايتىن نەگە جاۋاپقا تارتپايدى؟ وسىعان بايلانىستى ورال قالالىق ىشكى ىستەر باسقارماسى تەرگەۋ ءبولىمىنىڭ تەرگەۋشىسى، پوليسيا اعا لەيتەنانتى ەرجان جاقسىعالييەۆ قاۋلى شىعارىپ، ۇيالى تەلەفونىمدى الىپ، كەيىن قايتارىپ بەردى»، - دەدى ا.بوكەنوۆ. ورال قالالىق تۇرعىن ۇي-كوممۋنالدىق شارۋاشىلىعى جانە تۇرعىن ءۇي ينسپەكسياسى ءبولىمى باسشىسىنىڭ ورىنباسارى ميراس مۇلكايدىڭ سوزىنە قاراعاندا، گۇلدى پيراميدانى سالۋعا بيۋدجەتتەن قاراجات جۇمسالعان جوق. ول تارازدىق كاسىپكەر ايدار نۇرعوجايەۆتىڭ ءوزىنىڭ ۇسىنىسىمەن سالىندى. ياعني قالاعا جاساعان تارتۋى دەۋگە بولادى.

شولۋشى: اسەل بولات قىزى