11 شىلدەدە تالليندە قازاقستان رەسپۋبليكاسىنىڭ فينليانديا رەسپۋبليكاسىنداعى جانە ەستونيا رەسپۋبليكاسىنداعى توتەنشە جانە وكىلەتتى ەلشىسى قىزمەتىن قوسا اتقارىپ وتىرعان مۇرات نۇرتىلەۋوۆ ەستونيا رەسپۋبليكاسىنىڭ پرەزيدەنتى كەرستي كاليۋلايدقا سەنىم گراموتاسىن تاپسىردى، دەپ جازادى Qamshy.kz اقپارات اگەنتتىگى. بۇل تۋرالى ق ر ءسىم باسپا ءسوز قىزمەتى حابارلايدى.

سالتاناتتى راسىمنەن كەيىن ەستونيا پرەزيدەنتى قازاقستاندىق ديپلوماتيالىق وكىلدىك باسشىسىن كادريورگ سارايىندا قابىلداپ، قازاقستان-ەستونيا ءىس-قيمىلىنىڭ وزەكتى ماسەلەلەرى مەن ونىڭ پەرسپەكتيۆالارىن تالقىلادى.

ق ر پرەزيدەنتى نۇرسۇلتان نازاربايەۆتىڭ ەكىجاقتى ديپلوماتيالىق قاتىناستاردىڭ 25 جىلدىعىنا (1992 جىلعى 27 مامىر)، سونداي-اق ەستونيانىڭ ەۋروپالىق وداقتاعى ءتوراعالىعىنا وراي ك. كاليۋلايدقا جولداعان ەڭ ىزگى نيەت-تىلەكتەرى مەن قۇتتىقتاۋلارىن جەتكىزىپ، ەلشى ەلدەرىمىزدىڭ ەكىجاقتى جانە كوپجاقتى فورماتتارداعى ءوزارا ءتيىمدى ىنتىماقتاستىق اياسىن استانا ءارى قاراي كەڭەيتە تۇسۋگە مۇددەلى ەكەنىن راستادى.

ءوز كەزەگىندە، ەستونيا پرەزيدەنتى جەتكىزىلگەن قۇتتىقتاۋلار ءۇشىن شىنايى العىسىن ءبىلدىرىپ، قازاقستان پرەزيدەنتىنىڭ ەكى ەل اراسىنداعى دوستىق بايلانىستاردى نىعايتۋداعى ەرەكشە ءرولى مەن وراسان زور ۇلەسىن اتاپ ءوتتى. ونىڭ پىكىرىنشە، شيرەك عاسىر ىشىندە ەكى ەل بىرلەسكەن جۇمىس ارقىلى ءبىرىزدى ساياسي ديالوگ پەن ساۋدا-ەكونوميكالىق كووپەراسيانى دامىتۋدا قوماقتى جەتىستىكتەرگە قول جەتكىزدى. وسى ورايدا، ەكونوميكالىق ترەكتىڭ الەۋەتىن ارتتىرۋ تۇرعىسىنان كولىك جانە ترانزيت، اقپاراتتىق تەحنولوگيالار، ءبىلىم جانە عىلىم، دەنساۋلىق ساقتاۋ، سونداي-اق اگروونەركاسىپ سالالارىنداعى ورتاق جوبالاردى جۇزەگە اسىرۋ ماڭىزدى بولىپ تابىلادى.

م. نۇرتىلەۋوۆ ەستونيا باسشىسىنا پرەزيدەنت ن. نازاربايەۆتىڭ ەلىمىزدەگى كەشەندى دەموكراتيالىق رەفورمالاردى تەرەڭدەتۋگە، ەكونوميكا مەن قوعامدىق سانانى جاڭعىرتۋعا باعىتتالعان باستامالارىن يمپلەمەنتاسيالاۋ بارىسى جونىندە جان-جاقتى اقپارات بەردى. بۇل تۇرعىدا، «100 ناقتى قادام» ۇلت جوسپارى، «نۇرلى جول» جەس، ييدمب مەن «بولاشاققا باعدار: قوعامدىق سانانى جاڭعىرتۋ» اتتى باعدارلامالىق ماقالاسىنان تۋىنداپ وتىرعان بيىك ماقساتتارعا ۇلكەن قىزىعۋشىلىق تانىتىلدى.

تاراپتار اتالعان ستراتەگيالىق قۇجاتتار ەكىجاقتى ىنتىماقتاستىقتى جاڭا دەڭگەيگە كوتەرۋگە تىڭ مۇمكىندىكتەر تۋدىراتىنىنا سەنىمدى.

وڭىرلىك جانە جاھاندىق كۇن تارتىبىندەگى پروبلەمالار بويىنشا پىكىر الماسۋ بارىسىندا ەلشى قازاقستاننىڭ حالىقارالىق قاۋىپسىزدىك پەن تۇراقتى دامۋدى قامتاماسىز ەتۋدى كوزدەيتىن باستامالارى مەن ناقتى ۇلەسى جايلى ءسوز قوزعادى. سونىڭ ىشىندە، استانانىڭ ۋكراينا جانە سيريا داعدارىستارىن رەتتەۋدەگى بىتىمگەرشىلىك ميسسيامىزعا نازار اۋدارىلدى.

سونىمەن قاتار، م. نۇرتىلەۋوۆ قازاقستاننىڭ بۇۇ قاۋىپسىزدىك كەڭەسىندەگى باسىمدىقتارىنا، استانادا ماۋسىم ايىندا وتكەن شىۇ ءسامميتىنىڭ قورىتىندىلارىنا، سونداي-اق «ەكسپو-2017» حالىقارالىق مامانداندىرىلعان كورمەسىنىڭ قىزمەتىنە تولىققاندى توقتالدى.

ودان باسقا، قازاقستاندىق ديپلومات ەستوندىق تاراپقا قازاقستان مەن ەۋروپالىق وداق اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى راتيفيكاسيالاۋ پروسەسىن تەزدەتۋ تۋرالى ءوتىنىش ءبىلدىردى.

ك. كاليۋلايد قازاقستاننىڭ تاۋەلسىزدىك جىلدارىنداعى ساياسي جانە الەۋمەتتىك-ەكونوميكالىق مودەرنيزاسيالاۋداعى تولاعاي تابىستارىن جوعارى باعالاپ، ەلىمىزدىڭ حالىقارالىق بەيبىتشىلىك پەن تۇراقتىلىقتى قامتاماسىز ەتۋگە قوسقان قوماقتى ۇلەسى دۇنيەجۇزىلىك قوعامداستىق مۇشەلەرى تاراپىنان كەڭىنەن قولداۋ تاپقانى مەن مويىندالعانىن مالىمدەدى.

ەستونيانىڭ مەملەكەت باسشىسى استانامەن ءداستۇرلى تىعىز ءارى سىندارلى قارىم-قاتىناستاردى ورىستەتۋگە تاللين دايىن ەكەنىن، ەۋروپالىق وداق كەڭەسىنە ءتوراعالىق ەتەتىن ەل پرەزيدەنتى رەتىندە ەۋرووداق شەڭبەرىندەگى ەتەنە جۇمىستى جالعاستىرۋعا بەيىلدىلىگىن راستادى.

سۇحبات سوڭىندا ك. كاليۋلايد قازاقستان پرەزيدەنتى ن. نازاربايەۆقا جانە بارشا قازاقستان حالقىنا ساتتىلىك، گۇلدەنۋ جانە مول يگىلىكتەر تىلەدى.

شولۋشى: گۇلىم جاقان