رەسەيدە كەدەيشىلىك كەبىن كيگەندەردىڭ قاراسى قالىڭداپ بارادى. ءبىر الاڭداتاتىنى وسىدان 5 جىل بۇرىن ولاردىڭ سانى 15 ميلليوننان استام بولسا، بيىل 22 ميلليونعا جەتكەن.

رەسەيدىڭ ءاربىر التىنشى تۇرعىنى شەكتەن تىس كەدەي تۇرادى. رەسمي مالىمەت بويىنشا، بيىلعى جىلدىڭ  العاشقى ءۇش ايىندا مۇقتاج ادامداردىڭ قاتارىنا ەكى ميلليون ادام قوسىلىپتى، دەپ حابارلايدى Qamshy.kz اقپارات اگەنتتىگى  حابار-24 مالىمەتىنە سۇيەنىپ.

- مۇگەدەكتەر، زەينەتكەرلەر سياقتى الەۋمەتتىك جاعدايى ناشار جانداردىڭ تابىستارى دۇرىس ەسەپتەلمەگەن. تاعى ءبىر سەبەپ – جۇمىسسىزدار سانىنىڭ ارتۋى. وعان قوسا كولەڭكەلى ەكونوميكانىڭ ۇلەسى كوبەيىپ بارا جاتىر، - دەيدى ەكونوميكا جوعارى مەكتەبىنىڭ پروفەسسورى الەكساندر ابراموۆ.

وتكەن التى جىلدىڭ ىشىندە رەسەيدە كەدەيلەردىڭ سانى كۇرت كوبەيگەن. ال، بيىلعى ءوسىمىنىڭ سەبەبىن ماماندار ناقتى ايتا المايدى.

- مۇناي باعاسى دا، ۇلتتىق ۆاليۋتا باعامى دا سول قالپىندا تۇر. كەنەتتەن وسىنداي جاعدايعا تاپ بولدىق. ونى زەرتتەپ، ارنايى شارا ويلاستىرۋ كەرەك. مۇقتاج جانداردىڭ سانى وزىنەن-وزى ازايمايدى. قازىرگى  جاعداي ەكونوميكا سالاسىنا ايتارلىقتاي وزگەرىستەر ەنگىزۋدى تالاپ ەتەدى، - دەپ ءتۇيدى ا.ابراموۆ.

بۇل جەردە ماماندار وعاش كورەتىن ءبىر جايت بار. كەدەيلىكتىڭ الدىندا تۇرعانداردىڭ اراسىندا الەۋمەتتىك جاعىنان بەلسەندى، جۇمىس ىستەيتىن ادامدار از ەمەس. ناقتىراق ايتقاندا ولاردىڭ سانى 5 ميلليون ادام. مامانداردىڭ ايتۋىنشا ونىڭ سەبەبى – كولەڭكەلى تابىس تاباتىنداردىڭ سانى كوبەيگەنىندە. جالپى العاندا ناقتى كەدەيلىكتىڭ كولەمى ستاتيستيكا كورسەتكىشتەرىنەن الدەقايدا جوعارى دەيدى ەكونوميستەر.

شولۋشى: ايگەرىم تاۋباي