ولگەندە قابىرگە تۇسەتىندىگىنەن قاتتى قورىققان ءبىر باي قايتىس بولارىنىڭ الدىندا بىلاي دەپ وسيەت قالدىرىپتى: «كىم دە كىم مەن ولگەندە قابىرىمە ءبىر ءتۇن قونىپ شىقسا، سول ادامعا بايلىعىمنىڭ تەڭ جارتىسىن قالدىرامىن!» ايتقانداي-اق كوپ ۋاقىت وتپەي باي قايتىس بولىپتى. بايدى قابىرگە قوياردا ونىڭ وسيەتى بويىنشا جاقىندارى قابىرگە بىرگە قونىپ شىعاتىن ادام ىزدەستىرىپتى. ءبىراق ونىمەن بىرگە بارىپ قونۋعا ەل ىشىنەن ەشكىمنىڭ جۇرەگى داۋالاماسا كەرەك. بۇعان ەلدىڭ جۇگىن تاسىپ كۇنەلتىپ جۇرگەن، ءبىر قۇلاش ارقانىنان باسقا تۇگى جوق ءسىڭىرى شىققان ءبىر كەدەي عانا كونىپتى. الگى كەدەي بايمەن بىرگە قابىرگە ءتۇسىپ جاتادى. كەش باتا ەل اياعى سايابىرسىعاندا ەكى پەرىشتە كەلىپتى. كەلگەن پەرىشتەلەر قابىردەگى ەكەۋگە قاراپ: «مىنا جەردە ەكى ادام جاتىر ەكەن. بىرەۋى – ءولى، ەكىنشىسى – ءتىرى ەكەن. ءولىسى قايدا قاشار دەيسىڭ، كەل، تىرىسىنەن جاۋاپ الايىق» دەپ كەدەي بايعۇستى بۇكىل ءومىر بويعى ىستەگەن تىرلىكتەرى ءۇشىن جاۋاپقا تارتسا كەرەك. «مىنا ارقاندى قايدان الدىڭ؟ ونىمەن نە ىستەدىڭ؟ قاشان، قاي جەرگە نە اپاردىڭ؟ بۇل وزىڭدىكى مە، وزگەنىكى مە؟» دەگەن سۇراقتارعا جاۋاپ بەرۋمەن پاقىر-ەكەڭ تاڭدى ارەڭ اتىرىپتى. ءبىر عانا ارقانعا جاۋاپ بەرەم دەپ قينالعان كەدەي بايعۇستىڭ ەسى شىعىپ، ءۇستى-باسى ابدەن قارا تەرگە مالشىنىپتى. ءبىر عانا ارقاننىڭ ەسەبىن بەرە الماي ەسى شىققان ول ەرتەسى ءوزىن «بايدىڭ جارتى بايلىعىنا يە بولدىڭ!» دەپ، قۇتتىقتاي كەلگەندەرگە: «ويباي-اۋ، مەن تۇگىم جوق تاقىر كەدەي بولا تۇرا ءبىر عانا ارقاننىڭ ەسەبىن بەرە الماي تاڭدى كورەر كوزبەن ارەڭ اتىرىپ ابدەن سىلىكپەم شىقتى. سەندەر ماعان قالايشا سونشا بايلىققا يە بول دەيسىڭدەر؟! قوي، اينالايىن، ونداي بايلىقتارىڭ بار بولسىن. اۋلاق!» دەپ ازار دا بەزەر بولىپ ات-تونىن الا قاشقان ەكەن.

جازبا ەرلان جۇزەيەۆتىڭ Facebook پاراقشاسىنان الىندى.