قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا بەلارۋس رەسپۋبليكاسىنا جۇمىس ساپارىمەن باردى، دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ. 

بيىلعى 12-14 شىلدەدە بولعان ساپارى اياسىندا گۇلشارا ءابدىقالىقوۆا بەلارۋس پرەزيدەنتى اكىمشىلىگىنىڭ باسشىسى ن.كوچانوۆامەن كەزدەستى.

كەزدەسۋدە ءوڭىرارالىق دەڭگەيدەگى جانە ساۋدا-ەكونوميكالىق، مادەني-گۋمانيتارلىق سالالارداعى ەكىجاقتى ءوزارا ءىس-قيمىل ماسەلەلەرى تالقىلاندى.

مەملەكەتتىك حاتشى قازاقستان مەن بەلارۋس اراسىنداعى تاۋار اينالىمى 2017 جىلعى ءقاڭتار-ساۋىر ايلارىندا 160،4 ملن دوللار بولعانىن جانە ونىڭ 2016 جىلدىڭ ءتيىستى كەزەڭىمەن سالىستىرعاندا شامامەن 76%-عا وسكەنىن اتاپ ءوتتى.

گۇلشارا ءابدىقالىقوۆا بەلارۋس تاراپىنا استاناداعى حالىقارالىق «ەكسپو-2017» مامانداندىرىلعان كورمەسىنە بەلسەنە اتسالىسىپ جاتقانى ءۇشىن ريزاشىلىق ءبىلدىردى.

ن.كوچانوۆا مارتەبەلى مەيمانعا ساپارمەن كەلىپ، «ەكسپو-2017» كورمەسى اياسىندا وتەتىن «ايەلدەر بولاشاق ەنەرگياسى ءۇشىن» اتتى حالىقارالىق ايەلدەر فورۋمىنا شاقىرعانى ءۇشىن العىس ايتتى.

ساپار اياسىندا مەملەكەتتىك حاتشى گۇلشارا ءابدىقالىقوۆا ەلدەر مەن قۇرلىقتاردى بىرىكتىرەتىن ءىرى مادەني فورۋم – «سلاۆيان بازارى» اتتى حالىقارالىق ونەر فەستيۆالىنىڭ اشىلۋىنا قاتىستى.

***

«سلاۆيان بازارى» فەستيۆالى 1992 جىلعى شىلدە ايىندا قۇرىلدى. حالىقارالىق فەستيۆال رەسەي فەدەراسياسى مەن بەلارۋس رەسپۋبليكاسىنىڭ گۋمانيتارلىق ىنتىماقتاستىعىن ىسكە اسىرۋعا، كوركەم مادەنيەت پەن ونەردى جانداندىرۋعا جانە ونىڭ دامۋىنا سەپتىگىن تيگىزەتىن ۇزاقمەرزىمدى مادەني جوبا بولىپ سانالادى.

قازاقستان بۇل ءىس-شاراعا بەلسەنە اتسالىسىپ، جۇلدەلى ورىندارعا يە بولىپ كەلەدى. 2015 جىلى اتالعان حالىقارالىق كونكۋرستىڭ باس جۇلدەسىن ديماش قۇدايبەرگەن جەڭىپ الدى.

شولۋشى: ايگەرىم تاۋباي