جامبىل وبلىسىندا ىشكىلىككە سالىنعان ۇلىنىڭ ارەكەتتەرىنە شىداماعان اكە ونى ءولتىرىپ تىندى. بۇل تۋرالى Qamshy.kz اقپارات اگەنتتگى Tengrinews.kz سايتىنا سىلتەمە جاساپ حابارلايدى.

"بايزاق اۋدانىندا اكەسى بالاسىن ءولتىردى، اراق قۇمار بالاسى اناسىنا قول كوتەرۋگە دەيىن بارعان. 70 جاستاعا تاياعان ەر ادام سوتى بولماي جاتىپ دۇنيە سالدى"، - دەدى جامبىل وبلىسىنىڭ پروكۋرورى ەرنات سىبانقۇلوۆ. 

"وكىنىشتىسى مۇنداي جاعدايلار بولىپ تۇرادى، بارلىعى اراقتىڭ اسەرىنەن. وبلىستىق ەسىرتكىديسپانسەرىنىڭ ەسەبىندە 5 مىڭنان اسا ادام اراققا تاۋەلدى رەتىندە تىركەلگەن، ياعني وسىنشاما وتباسىنىڭ استان-كەستەڭى شىعۋى مۇمكىن دەگەن ءسوز. مەن ءاربىر ازاماتتىڭ وتباسىلىق زورلىققا بەيجاي قاراماۋىن سۇرايمىن، باسقا بىرەۋدىڭ وتباسى بولسا دا، ءبىز بىرىگۋ ارقىلى مۇنداي ارەكەتتەردى توقتاتامىز"، - دەدى ول. 

وبلىستىق پروكۋراتۋرا مالىمەتىنشە، 2016 جىلى وتباسىلىق زورلىق سالدارىنان 24 قىلمىس جاسالعان، 2017 جىلى وسى كۇنگە دەيىن 8 قىلمىس تىركەلگەن. 

30 مامىردا جامبىل وبلىسىنىڭ سارىسۋ اۋدانىندا ماس ەر ادام جارىنا پىشاق ۇرعان. سونىمەن قاتار ول ەنەسىن دە جارالاعان. دەر كەزىندە جەتكەن قايىن اتاسى كۇيەۋ بالاسىن توقتاتقان. قازىرگى ۋاقىتتا ەر ادام قاماۋعا الىندى جانە سوتتى كۇتىپ وتىر. 

تاعى ءبىر جاداي مويىنقۇم اۋدانىندا تىركەلدى. ماس كۇيدە مازاسىن العان ەر ادامدى ايەلى ولتىرگەن. ايەل ادام سوتتى كۇتىپ وتىر.

"باس پروكۋراتۋرانىڭ "وتباسىنداعى زورلىق-زومبىلىقسىز قازاقستان" جوباسىن ىسكە اسىرۋ ماقساتىندا تۇرمىستىق زورلىق-زومبىلىق كورىنىستەرىن بولدىرماۋ جانە ونىڭ الدىن الۋ جۇمىستارىنا تالداۋ جاسالىپ جاتىر"، - دەيدى جامبىل وبلىسىنىڭ پروكۋرورى.