الماتى وبلىسىندا بيىل جەر ۋچاسكەسىن رۇقساتسىز يەمدەنۋدىڭ 20 دەرەگى تىركەلدى. بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى وبلىسىنىڭ جەردىڭ پايدالانىلۋى مەن قورعالۋىن باقىلاۋ باسقارماسىنىڭ جەتەكشىسى اسقار جولدوعۇتوۆ ايتتى، - دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.

ونىڭ ايتۋىنشا، مەملەكەت باسشىسىنىڭ تاپسىرماسىن ورىنداۋ ماقساتىندا باسقارما نازاردى اۋىل شارۋاشىلىعى ماقساتىنداعى جەرلەردى مەملەكەتتىڭ يەلىگىنە قايتارۋعا جانە قولدانىلماي جاتقان جەردى تاراتۋعا بۇرىپ وتىر. جۇرگىزىلگەن زەرتتەۋ قورىتىندىسى بويىنشا وبلىستا جالپى 2015-2016 جىلدار ارالىعىندا قولدانىلماي جاتقان 331،2 مىڭ گەكتار جەر انىقتالعان. الايدا قاجەتتى شارالار قابىلدانىپ، 40،2 مىڭ گەكتار جەر مەملەكەتتىڭ يەلىگىنە قايتارىلعان، 202،5 مىڭ گەكتارى قولدانۋعا بەرىلگەن، ال 13،4 مىڭ گەكتارى يەسى جوق مۇلىك ەسەبىندە تۇر.

اۋىل شارۋاشىلىعى ماقساتىنداعى جەرلەرمەن قاتار باسقارما مەملەكەتتىڭ يەلىگىندەگى رۇقساتسىز يەلىك ەتىلگەن جەرلەردى باقىلاپ وتىر، بۇل جەر ۋچاسكەلەرىنە ينسپەكسيالىق تەكسەرىس جۇرگىزىلگەن.

"جۇرگىزىلگەن جۇمىستاردىڭ قورىتىندىسىنان 2017 جىلدىڭ ءبىرىنشى جارتى جىلدىعىندا الماتى وبلىسىندا جەر ۋچاسكەلەرىن رۇقساتسىز يەمدەنۋدىڭ 20 دەرەگى تىركەلگەنىن انىقتادىق، ونىڭ جالپى اۋدانى - 143،6 گەكتار. بۇل قۇقىق بۇزۋشىلىقتار بويىنشا 5 785 950 سوماعا ايىپپۇل سالۋ تۇرىندەگى اكىمشىلىك شارا قابىلدانىپ، زاڭ بۇزۋشىلىقتاردى جويۋ تاپسىرىلدى، رۇقساتسىز الىنعان جەر ۋچاسكەلەرىن قايتارۋ باسقارمانىڭ باقىلاۋىندا"، - دەدى اسقار ابدۋللا ۇلى.