اتاجۇرتقا كوشىپ كەلە جاتىپ، اقپان ايىندا مايقاپشاعاي كەدەن بەكەتىندە 50 مىڭ دوللار شاماسىندا اقشاسىنان ايىرىلعان، كەدەنشىلەر تاراپىنان «كونتراباندامەن» اينالىستى دەپ ايىپتالعان گۇلجان ءماۋىتحاننىڭ ءىسىن پروكۋراتۋرا قىسقارتقانى تۋرالى كەشە حابارلاعان ەدىك.

بۇگىن تاركىلەنگەن اقشا يەسىنە تولىقتاي قايتاتىنى تۋرالى قۋانىشتى حابار تارادى. قۋانىشتى حابارعا سەبەپ بولعان شقو پروكۋراتۋراسىنىڭ ارنايى قاۋلىسىن Facebook پاراقشاسىندا ۇلاربەك دالەي ۇلى جاريالادى.

«ال، قانى ءبىر قازاقتارىم!
جاراتۋشى يەمىز گۇلجان اپايدىڭ كوز جاسىن كوردى. ادىلدىك ورنادى. شقو پروكۋراتۋراسى رەسمي قاۋلى شىعاردى. (ولارعا مىڭ دا ءبىر راحمەت!)
قۋانىشىمىزدا شەك جوق!
انالار جىلاماسىن، ەلىم دەيتىن ەردىڭ ەڭسەسى تۇسپەسىن!»، - دەپ جازعان ۇلاربەك دالەي ۇلى.

تولىق ءماتىندى شقو پروكۋراتۋراسى سويلەسىن:

«جۇڭگو حالىق رەسپۋبليكاسىنان كەلگەن ورالماننىڭ ىسىنە نۇكتە قويىلدى

وبلىس پروكۋراتۋراسى ورالمان گۇلجان ءماۋىتحانعا قاتىستى ىسكە نۇكتە قويدى. شەكارادا كەدەن بەكەتىندە الىنعان اقشالاي قاراجاتى وعان قايتارىلاتىن بولادى.

وسى جىلدىڭ 4 ساۋىرىندە جۇڭگو حالىق رەسپۋبليكاسىنان قازاقستانعا ورالمەن رەتىندە كوشىپ كەلگەن گۇلجان ءماۋىتحاننان شەكارانىڭ كەدەن بەكەتىندە دەكلاراسيادا كورسەتپەگەن 40 000 اقش دوللارى الىنعان. گۇلجان ءماۋىتحان قىتايدا ءوز ءۇيىن ساتىپ، وسى قاراجاتقا استانادان ءۇي ساتىپ الماقشى بولعان. ول شەكارا ارقىلى اقشالاي قاراجاتتى وتكىزۋ ەرەجەلەرىن بىلمەگەنىن تۇسىندىرگەن. ناتيجەسىندە، «ەكونوميكالىق كونتراباندا» بابى بويىنشا سوتقا دەيىنگى تەرگەۋ باستالعان. 
زايسان اۋداندىق سوتى گۇلجان ءماۋىتحاندى كىنالى دەپ تانىپ، 40 000 اقش دوللارىن مەملەكەت پايداسىنا الۋ تۋرالى شەشىم شىعارعان. اپەللياسيالىق ساتىدا سوت ءىسىن جۇرگىزۋ ءتىلى تۋرالى تالاپ ساقتالماعاندىقتان شەشىم بۇزىلعان. 
شىعىس قازاقستان وبلىسىنىڭ پروكۋراتۋراسى وسى ءىستى مۇقيات زەردەلەپ، گۇلجان ءماۋىتحاننىڭ ارەكەتتەرىندە قىلمىستىق قۇقىق بۇزۋشىلىقتىڭ قۇرامى بولماعانىن انىقتادى، سەبەبى، گۇلجان ءماۋىتحان قىتايدان اقشالاي قاراجاتتى قۇپيا تۇردە اكەلۋ نيەتى بولماعان دەگەن قورىتىندىعا كەلدى. 
بۇنداي شەشىم قابىلداۋعا - ەگدە جاسىندا جۇڭگو ەلىنەن اتامەكەنى قازاقستانعا قايتۋىن ماقسات ەتىپ، ءومىر بويى جيناعان دۇنيە مۇلىكتەرىن ساتىپ، ورالمان مارتەبەسىن الىپ، ەلىنە ورالعان گ.ءماۋىتحاندى «ەكونوميكالىق كونتراباندا» جاسادى دەپ ايىپتاپ، ونىڭ 40 000 اقش دوللارى قاراجاتىن تاركىلەۋ ادىلەتسىز ەكەندىگى نەگىز بولدى.

شىعىس قازاقستان وبلىسىنىڭ پروكۋراتۋراسى»