پاۆلودار وبلىسىنىڭ اكىمى تولۋباي اۋىلىنداعى 68 جاستاعى زەينەتكەر كىسىگە كومەكتەسۋگە نيەت ءبىلدىردى. اكىمگە زەينەتكەردىڭ جاعدايى تۋرالى ونىڭ كورشىلەرى ايتىپ بەرگەن، دەپ حابارلايدى Qamshy.kz اقپارات اگەنتتىگى Pavlodarnews.kz سايتىنا سىلتەمە جاساپ.

جۇمىس بابىمەن پاۆلودار اۋداندارىن شولىپ جۇرگەن وبلىس اكىمى بۋلات باقاۋاوۆ تولۋباي اۋىلىنا دا كەلىپ، ونداعى اقساقالدارمەن كەزدەسكەن. سول كەزدە اكىمگە 68 جاستاعى قاينىگەش اققالۋيەۆا ەسىمدى زەينەتكەر جايىندا كورشىلەرى ايتىپ، ونىڭ قازىرگى تاڭدا تۇرىپ جاتقان ءۇيى ادام سەنگىسىز جاعدايدا ەكەندىگىن جەتكىزگەن. زەينەتكەر وسى اۋىلدا بىرنەشە جىل ساۋىنشى بولىپ جۇمىس ىستەگەن ەكەن. ءقازىر ول جالعىز ءوزى تۇرادى، قارت كىسى بولعاندىقتان ءوزىنىڭ ۇيىنە قاراپ، ءۇي شارۋاسىمەن اينالىسا المايدى ەكەن.

شامامەن ءبىر جىل بۇرىن ءورتتىڭ سالدارىنان زەينەتكەردىڭ ۇيىندە ەلەكتر توعى اجىراتىلعان.  سونىمەن قاتار ءۇيىنىڭ شاتىرى تەسىلىپ، سۋ اعىپ تۇرادى ەكەن. ال قىستىڭ كۇنى ەرەكشە سۋىق بولىپ، ءۇيدىڭ ءىشى جىلىنبايتىن كورىنەدى.

اۋىل تۇرعىندارى قولدارىنان كەلگەنشە قارت كىسىگە قول ۇشىن سوزىپ، كومەكتەسىپ تۇرادى. بىلتىر ءبىر كاسىپكەر زەينەتكەرگە قىستا جاعاتىن كومىرىن الىپ بەرىپتى، ال سول اۋىلدىڭ جاستارى ءجيى-جيى كەلىپ قاريانىڭ اۋلاسىن، ءۇيىن تازارتىپ تۇرادى ەكەن.

وبلىس اكىمى دەرەۋ ءىستى قولىنا الىپ، زەينەتكەرگە كومەكتەسۋگە شەشىم قابىلداعان. سونىمەن قاتار ءاربىر اۋدان مەن اۋىلدا جاعدايى جوق زەينەتكەرلەر جايىندا مالىمەت جيناۋدى تاپسىرعان.

«ەگەر ونداي كىسىلەر بار بولسا، ءبىز ولارعا كومەكتەسۋىمىز قاجەت. رەسۋرستاردىڭ بارلىعىنا دا جەتكىلىكتى بولۋىن قاداعالايمىز. وسىنداي جاعدايدا وتىرعان ادامداردى كورسەم، «اۋدان اكىمى نە ىستەپ ءجۇر؟» دەگەن سۇراق تۋىندايدى»، - دەيدى بۋلات باقاۋوۆ.