«استانا ەكسپو-2017» حالىقارالىق كورمەسىندەگى اۋستريا پاۆيلونى ەڭ ەرەكشە پاۆيلونداردىڭ ءبىرى بولىپ سانالادى. پاۆيلوندا «كۇش ماشيناسى» دەپ اتالاتىن اتتراكسيونداردان جانە مەحانيزمدەردەن قۇرالعان تۇتاس ءبىر قۇرىلىم ورناتىلعان. ول كەلۋشىلەرگە ويىن ارقىلى ەلەكتر قۋاتىن وندىرۋگە مۇمكىندىك بەرەدى دەپ جازادى  Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

بيىكتىگى ءۇش قاباتتى ۇيمەن بىردەي بولاتىن قۇرىلىس 870 شارشى مەتر بولاتىن پاۆيلوننىڭ بارلىق دەرلىك اۋماعىن الىپ جاتىر. وسى قولدان جاسالعان بيىكتىكتى ماقسۇت جۇمايەۆ بۇگىن ارنايى الپينيستىك جابدىقسىز باعىندىرادى. ول قۇرىلىم بورەنەلەرىمەن ورمەكشى-ادام سەكىلدى ورمەلەپ شىعىپ، قازاقستان مەن اۋستريا تۋلارىن ورناتتى. بۇل - ەكى ەل اراسىنداعى ىنتىماقتاستىق پەن ءوزارا تۇسىنىستىكتى بىلدىرەدى، دەپ حابارلايدى اۋستريا پاۆيلونىنىڭ باسپا ءسوز قىزمەتى.

الەمدەگى بارلىق سەگىز مىڭ مەترلىك شىڭداردى وتتەگى قۇرالىنسىز باعىندىرعان بەلگىلى قازاقستاندىق الپينيست ماقسۇت جۇمايەۆ - اۋستريا ەلىنە بۇرىننان بەرى دوستىق نيەتتەگى جان. بۇل دوستىقتىڭ باستاماسى سوناۋ 2003 جىلى گيمالاي ەكسپەديسياسى كەزىندە سەگىز مىڭ مەترلىك نانگاپارباتقا شىعۋ الدىندا قالاندى.

ماقسۇت الەمدەگى بارلىق سەگىز مىڭ مەترلىك شىڭداردى وتتەگى قۇرالىنسىز باعىندىرعان  تاريحتاعى العاشقى ايەل ادام -  اۋستريالىق الپينيست گەرليندا كالتەنبرۋننەرمەن تانىستى. 2011 جىلى بيىكتىگى جاعىنان ەۆەرەستتەن كەيىنگى الەمدەگى ەڭ بيىك شىڭ - ك2-گە «تاۋ پاتشايىمى» گەرليندا كالتەنبرۋننەر جانە قازاقستاندىق الپينيستەر ماقسۇت جۇمايەۆ پەن ونىڭ قازاقستاندىق ارىپتەسى ۆاسيليي پيۆسوۆتىڭ بىرگە كوتەرىلۋى - ءۇش الپينيست ءۇشىن دە الەمنىڭ سەگىز مىڭ مەترلىك شىڭدارىن باعىندىرۋداعى وزدەرىنىڭ جەكە باعدارلامالارىنىڭ اياقتالۋى بولدى. 2013 جىلى ماقسۇت جۇمايەۆ ق ر پرەزيدەنتى نۇرسۇلتان نازاربايەۆتىڭ ۆەناعا رەسمي ساپارى قارساڭىندا اۋستريانىڭ ەڭ بيىك نۇكتەسى - گروسگلوكنەر شىڭىن باعىندىرىپ، ءبىزدىڭ ەلدەرىمىزدىڭ دوستىعى مەن ءوزارا تۇسىنىستىگىنىڭ كەپىلى رەتىندە اۋستريا مەن قازاقستان تۋلارىن ورناتتى.

ءبىراق سپورت ماقسۇت جۇمايەۆتىڭ اۋستريامەن ىنتىماقتاستىعىنداعى جالعىز عانا سالا ەمەس. اۋستريادا تاۋدى ەڭكەيگەن كارىدەن، ەڭبەكتەگەن بالاعا دەيىن جاقسى كورەدى. ەلدە 150 جىلدان استام ۋاقىت بويى تاۋ دەمالىسى مەن تابيعاتىن ۇناتاتىن ادامداردىڭ Alpenverein دەپ اتالاتىن الپىلىك قاۋىمداستىعى جۇمىس ىستەپ كەلەدى. بۇل قاۋىمداستىقپەن ماقسۇت جۇمايەۆ ىنتىماقتاستىق جايلى مەموراندۋمعا قول قويىپ، قازاقستاندا وسىعان ۇقساس كلۋب قۇردى. اتالعان كلۋب ەندى عانا دامىپ كەلە جاتقانىمەن، تاجىريبەسى مول اۋستريالىق كلۋبتىڭ تاجىريبەسىن جان-جاقتى قابىلداۋعا دايىن.

«مەن اۋستريانى ونىڭ ادام مەن تابيعاتقا قاتىستى «جاسىل» تەحنولوگيالارى ءۇشىن قاتتى سىيلايمىن. قازاقستاندىق الپينكلۋبتىڭ نەگىزگى ماقساتى - بارلىق بەلسەندىلىك، مەيلى دەمالىس، مەيلى سپورت بولسىن، تابيعاتتىڭ تابيعي تەپە-تەڭدىگىن بۇزباۋلارى ءۇشىن جانە ادامعا قۋانىش پەن ءلاززات سىيلاي تۇرا، تابيعاتقا ەش زيان تيگىزبەۋلەرى ءۇشىن ادامداردى تابيعاتپەن دۇرىس ءتىل تابىسۋعا ۇيرەتۋ»، - دەدى ماقسۇت جۇمايەۆ.