«دونەسك حالىق رەسپۋبليكاسىنىڭ» باسشىسى الەكساندر زاحارچەنكو ۋكراينانىڭ ءومىرى توقتاپ، ورنىنا جاڭا مەملەكەت – كىشى رەسەي قۇرىلعانىن ءمالىم ەتتى، دەپ حابارلايدى بي-بي-سي ورىس جاڭالىقتار قىزمەتى. زاحارچەنكونىڭ ايتۋىنشا، مەملەكەتتىڭ استاناسى دونەسك بولادى، ال كييەۆ قاراپايىم قالاعا اينالادى.

زاحارچەنكونىڭ سەيسەنبى كۇنى جاسالعان مالىمدەمەسىن اقپاراتتىق اگەنتتىكتەر كىشى رەەيدىڭ قۇرىلعانىنا نە سەبەپ بولعانىن انىقتاماي جاتىپ حابارلاي جونەلدى.

«ءبىزدىڭ ويىمىزشا، ۋكراينا مەملەكەتىن قالپىنا كەلتىرۋ مۇمكىن ەمەس»، - دەپ جازىپتى جەرگىلىكتى باسىلىمداردىڭ ءبىرى.

«ۋكراينانىڭ ميراسقورى بولاتىن» جاڭا مەملەكەتتىڭ قۇرىلعانى جونىندە زاحارچەنكو «قىرىمنان وزگە، ۋكراينانىڭ بۇرىنعى ايماقتارىنىڭ» اتىنان مالىمدەدى. «ۋكراينا دەگەن اتتىڭ ءوزى مەملەكەتتىڭ بەدەلىن تۇسىرەدى» دەدى ول.

مەملەكەتتىڭ استاناسى 2014 جىلدان بەرى ۋكراينا بيلىگىنە قارسى كۇرەس جۇرگىزۋدە قولدانىلعان قارۋلار باقىلاناتىن دونەسك بولۋى ءتيىس دەگەندى دە ايتتى. ال كييەۆ تاريحي-مادەني ورتالىق بولىپ قالادى.

دونەسك اقپاراتتىق اگەنتتىگى  كىشى رەسەيگە شىن مانىندە ۋكراينانىڭ 19 اۋدانى كىرەتىنىن انىقتاۋ ۇستىندە. مەملەكەتتىك تۋ رەتىندە بوگدان حمەلنيسكيدىڭ تۋى ۇسىنىلعان ەكەن.

سونداي-اق، زاحارچەنكونىڭ ايتۋىنشا، دونەسك حالىق رەسپۋبليكاسى مەن لۋگانسك حالىق رەسپۋبليكالارى ۋكرايناداعى «زاڭدى بيلىك» ساقتالعان جالعىز اۋداندار.

زاحارچەنكونىڭ اتالمىش مالىمدەمەسىنە ۋكراينا پرەزيدەنتى پەتر پوروشەنكو پىكىر بىلدىرگەن.

«جاڭا رەسەي» جوباسى ىسكە اپاعان. ۋكراينا دونباس پەن قىرىمدا ءوز ەگەمەندىگىن قالپىنا كەلتىرەدى»، دەپ پىكىر ءبىلدىردى پوروشەنكو تۆيتتەردەگى پاراقشاسىنا.

ال ماسكەۋ زاحارچەنكونىڭ مالىمدەمەسىن نازاردان تىس قالدىرمادى: بۇل مينسكتىك كەلىسىمدەر تۇرعىسىنان تۇسىنىسپەۋشىلىكتەردىڭ تۋىنداۋىنا اكەلىپ سوعۋى مۇمكىن، دەدى مەملەكەتتىك دۋما تمد ىستەرى جونىندەگى كوميتەت باسشىسى لەونيد كالاشنيكوۆ. ايتا كەتەيىك، بۇل رەسەيدىڭ دونەسك باسشىسىنىڭ مالىمدەمەسىنە پىكىر بىلدىرگەن العاشقى جاعداي.  

ال لۋگانسك حالىق رەسپۋبليكاسى كىشى رەسەي جوباسىنا قاتىسى بارىن جوققا شىعاردى. جەرگىلىكتى حالىق كەڭەسىنىڭ باسىشىسى لحر-نىڭ دونەسكىگە رەسمي دەلەگاتتارىن جىبەرمەگەنىن ايتادى.

«ونىڭ ۇستىنە، ءبىز شارانىڭ ءوتۋى جايىندا حاباردار ەمەسپىز. بىزبەن ەشقانداي كەلىسىم جاسالعان جوق»، دەدى لۋگانسك بيلىگىنىڭ وكىلى.