كەزدەسۋدە نۇرسۇلتان نازاربايەۆ پەن الىبەك دىنىشيەۆ قازاقستاننىڭ مادەنيەتى مەن ونەرىن دامىتۋدىڭ قازىرگى ماسەلەلەرى، سونداي-اق رۋحاني جاڭعىرۋ ۇدەرىسىندەگى شىعارماشىلىق زيالى قاۋىم وكىلدەرىنىڭ ءرولى جونىندە پىكىر الماستى.
مەملەكەت باسشىسى حالىق ءارتىسىنىڭ وتان الدىنداعى، مادەنيەت سالاسىنداعى ەڭبەگىن جوعارى باعالاپ، ونىڭ ەلىمىزدە عانا ەمەس، شەت ەلدەردە دە تانىمال ەكەنىن اتاپ ءوتتى.
قازاقستان پرەزيدەنتى مادەنيەتتى دامىتۋدى مەملەكەتتىك دەڭگەيدە قولداۋدىڭ ماڭىزدىلىعىنا نازار اۋدارىپ، سوڭعى جىلدارى وسى سالادا قول جەتكىزىلگەن ناقتى ناتيجەلەرگە توقتالدى.
– ءقازىر ەلىمىزدىڭ مادەنيەت سالاسى باعدارلامالىق ماقالامدا ايقىندالعان باعىتتارعا سايكەس دامىپ كەلەدى. ءبىز بۇكىل الەمگە پاش ەتىلەتىن تۋىندىلار جاساۋعا كىرىستىك. جاڭا وپەرا جانە بالەت تەاترىن، كونسەرت زالدارىن سالدىق، سونىڭ ءبىرى «استانا ەكسپو-2017» كورمەسىنىڭ اۋماعىندا ورنالاسقان. ءبارى وپەرا جانە بالەت تەاترىندا ونەر كورسەتكىسى كەلىپ، سوندا بارۋدى قالايدى، – دەدى نۇرسۇلتان نازاربايەۆ.
ءا.دىنىشيەۆ ەلباسىعا مادەنيەت پەن ونەرگە كورسەتكەن قولداۋى ءۇشىن العىس ايتىپ، «استانا ەكسپو-2017» حالىقارالىق كورمەسىنەن العان اسەرىمەن ءبولىستى، سونداي-اق وتاندىق ونەر الەمىندە بولىپ جاتقان جاڭالىقتار جونىندە اڭگىمەلەدى.
– ءسىز ەلىمىزدە ونەردىڭ دامۋىنا زور ءمان بەرىپ كەلەسىز، جاڭا مادەنيەت نىساندارى اشىلىپ، جاڭا شىعارماشىلىق ۇجىمدار قۇرىلۋدا. وسىنىڭ بارلىعى ونەرىمىز ارقىلى قازاقستاندى الەمگە تانىتۋ ءۇشىن جاسالىپ وتىر، – دەدى ءا.دىنىشيەۆ.
