بۇگىن استاناداعى ورتالىق كوممۋنيكاسيالار قىزمەتىندە قازاقستان رەسپۋبليكاسىنىڭ اقپارات جانە كوممۋنيكاسيالار ءمينيسترى داۋرەن ابايەۆتىڭ قاتىسۋىمەن الىس-جاقىن شەتەلدەردە ءومىر سۇرەتىن قازاقتاردىڭ تاريحى مەن كۇندەلىكتى ومىرلەرى تۋرالى «قيىرداعى قازاقتار» اتتى 8 سەريالى دەرەكتى ءفيلمنىڭ ءتۇسىرۋ جۇمىستارىنىڭ باستالۋىنا ارنالعان باسپا ءسوز كونفەرەنسيا ءوتتى، دەپ حابارلايدى Qamshy.kz اقپارات اگەنتتىگى.

باسپا ءسوز كونفەرەنسيانىڭ جۇمىسىنا «قازكونتەنت» اق باسقارما ءتوراعاسى ەۆگەنيي كوچەتوۆ، «قازاقستان تاريحى» ينتەرنەت جوباسىنىڭ جەتەكشىسى ولجاس بەركىنبايەۆ قاتىستى.

اتالعان جوبا قازاقستان رەسپۋبليكاسىنىڭ پرەزيدەنتى ن.ءا. نازاربايەۆ ءتوراعاسى بولىپ تابىلاتىن دۇنيەجۇزى قازاقتارى قاۋىمداستىعىنىڭ 25 جىلدىعىنا ارنالىپ وتىر. دەرەكتى ءفيلمنىڭ ماقساتى – قازاقستان رەسپۋبليكاسىنىڭ پرەزيدەنتى ن.ءا. نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىنىڭ اياسىندا ۇلتتىق سانامىزدى جاڭعىرتۋ جانە ءتول تاريحىمىزعا تىڭ سەرپىلىس اكەلۋ. الىس-جاقىن شەت ەلدەردەگى قازاقتاردى وتانىمىزعا ورالۋعا ناسيحاتتاۋ.

جوبا جۇمىستارى  استانا قالاسىندا 2017 جىلعى 22-25 ماۋسىم ارالىعىندا وتكەن حالىقارالىق دۇنيەجۇزى قازاقتارىنىڭ V قۇرىلتايىنان باستاۋ الدى.

كونفەرەنسيا بارىسىندا ءسوز العان اقپارات جانە كوممۋنيكاسيالار ءمينيسترى داۋرەن ابايەۆ:

«بۇل جوبانى اقپارات جانە كوممۋنيكاسيالار مينيسترلىگى ەلباسى تاپسىرماسىنا ساي قولعا الۋدا. جاقىندا مەملەكەت باسشىسى دۇنيەجۇزى قازاقتارىنىڭ V قۇرىلتايىندا شەت مەملەكەتتەردەگى قانداستاردى قولداۋعا قاتىستى ءبىرقاتار تاپسىرما بەرگەنى بەلگىلى. سونىڭ ءبىرى – ولاردى تاريحي وتانىنا تانىستىرۋ، اراداعى بايلانىستى كۇشەيتۋ.وسىعان وراي، مينيسترلىكتىڭ تاپسىرماسىمەن «قازكونتەنت» اق-نىڭ «National Digital History» پورتالى شەتەلدەگى قانداستارىمىز تۋرالى دەرەكتى فيلمدەر سەرياسىن تۇسىرۋگە كىرىسەدى. ءتۇسىرىلىم قازاق دياسپورالارى شوعىرلانعان 8 مەملەكەتتە – رەسەي، موڭعوليا، جۇڭگو، وزبەكستان، تاجىكستان، تۇركىمەنستان، يران جانە اۋعانستان ەلدەرىندە جۇرگىزىلەدى. جوبادا سول ەلدەردەگى قازاقتاردىڭ تۇرمىسى، تاريحى، ەرەكشە داستۇرلەرى، مادەنيەتى قامتىلۋى ءتيىس. 
بۇل شەتەلدەگى قانداستارىمىزبەن اراداعى بايلانىستى ودان ءارى نىعايتۋعا ۇلكەن ۇلەس قوسادى دەپ سەنەمىن»، – دەدى مينيستر.

ءتۇسىرىلىم الەمنىڭ ءار ەلىنە تارىداي شاشىراعان قازاقتار قونىستانعان سەگىز مەملەكەتتە، اتاپ ايتقاندا رەسەي (استراحان، ومبى، ورىنبور، قورعان)، تۇركىمەنستان (تۇركىمەنباشى، تاشاۋىز، اشحاباد، چاردجوۋ)، وزبەكستان (بوستاندىق اۋدانى، تاشكەنت، شىرشىق، عازالكەنت)،  تاجىكستان (دۋشانبە، سوعدى، تاۋلى باداحشان، حاتلون)، جۇڭگو (ءۇرىمشى، قۇمىل، قاراماي، باركول، شاۋەشەك، قۇلجا، موري)، موڭعوليا (بايان-ولگەي، قوبدا، ۇلان-باتىر)،  يران (گورگان، بەندەر-تۇركىمەن، تەگەران، مەشحەد)،  اۋعانستان       (كابۋل، قۇندىز) ەلدەرىندە جۇرگىزىلەدى دەپ جوسپارلانىپ وتىر.

دەرەكتى ءفيلمدى ءتۇسىرۋ بارىسىندا ق ر ءسىم بىرلەسە وتىرىپ، جوعارىدا جازىلعان ەلدەردەگى ق ر ەلشىلىكتەرىمەن بىرلەسكەن جۇمىس اتقارىلادى. وسى جۇمىستاردىڭ ناتيجەسى رەتىندە جوعارىدا اتالعان قالالارداعى قازاقتاردىڭ تۇرمىس-تىرشىلىگىن، وتكەن تاريحى مەن سالت-داستۇرلەرىن، مادەنيەتىن كورسەتەتىن دۇنيە كورەرمەن نازارىنا ۇسىنىلماق.

سونداي-اق، National Digital History پورتالىندا ەكسپەديسيا جۇمىسىنان Live رەجيمىندە اقپارات تاراتىلىپ، الەۋمەتتىك جەلى پايدالانۋشىلارى مەن ينتەرنەت قولدانۋشىلارىنا تىكەلەي اقپارات جەتكىزىلەتىن بولادى.          

جوبا قازاق حالقىنىڭ مادەنيەتىنە، تاريحىنا جانە سالت-داستۇرلەرىنە جاڭاشا تۇرعىدا قاراۋعا، شەتەلدەگى قازاقتاردىڭ ءومىرىن شىنايى كورسەتۋگە مۇمكىندىك بەرەدى.

سونىمەن قوسا مينيستر داۋرەن ابايەۆ: «الەم بويىنشا شەتتە جۇرگەن قانداستاردى ەلگە جيناعان ساناۋلى عانا مەملەكەت بار. سولاردىڭ ءبىرى - قازاقستان. ەگەمەندىك العان 26 جىلدا 1 ميلليونعا جۋىق قانداستارىمىز ەلگە ورالدى. مەملەكەت باسشىسى جاقىندا وتكەن دۇنيەجۇزى قازاقتارىنىڭ 5ء-شى قۇرىلتايىندا «ەلىم دەگەن ءاربىر قازاققا ءارقاشان قازاقستاننىڭ ەسىگى اشىق» دەدى. ياعني، كوش ءالى توقتاعان جوق، الداعى ۋاقىتتا دا جالعاسا بەرەدى دەگەن ويدامىز. وسى ورايدا، ەلباسى تاپسىرماسىنا ساي، اقپارات جانە كوممۋنيكاسيالار مينيسترلىگى «قيىرداعى قازاقتار» جوباسىن قولعا الىپ وتىر»، - دەدى.