"قايرات" فۋتبولشىلارى البانيالىق "سكەندەربەۋ" كلۋبىنان جەڭىلىپ، ەۋروپا ليگاسىنان شىعىپ قالدى، - دەپ حابارلايدى Qamshy.kz اقپارات اگەنتتىگى Vesti.kz سايتىنا سىلتەمە جاساپ.

ەكىنشى ىرىكتەۋ كەزەڭىنىڭ قارىمتا كەزدەسۋى كورچە قالاسىندا ءوتتى، ماچ 2:0 ەسەبىمەن اياقتالدى. ءبىرىنشى تايمدا "قايرات" پەن "سكەندەربەۋ" گول سوعا المادى. باستاپقىدا الاڭ يەلەرى باسىم بولعان، الايدا قوناقتار جاعدايدى تەڭەستىرسە دە گول سوعاتىن مۇمكىندىك بولمادى. 

ەكىنشى تايمدا "سكەندەربەۋ" جەڭىستى قولدان بەرمەدى. 58-مينۋتتا سوعىلعان شەشۋشى گولدىڭ اۆتورى البانداردىڭ جارتىلاي قورعاۋشىسى سابيەن ليلياي بولدى، ول ترينيدادتىق قورعاۋشى شەلدون باتونىڭ قاتەلىگىن ءوز پايداسىنا اسىردى. "قايرات" ءبىر گول جىبەرىپ العاننان كەيىن بەلسەندى بولعان، الاڭعا قورعاۋشى ەلدوس احمەتوۆتى حورۆات حاۆبەگى يۆو يليچيەۆيچ الماستىرىپ شىقتى. 75ء-شى مينۋتتا ليلياي سارى قاعاز الىپ، الاڭنان شىعىپ قالدى. 

"سكەندەربەۋ" از قۇرامدا ويناسا دا باسىمدىقتى بەرمەدى، 75ء-شى مينۋتتا حاۆبەك باكاري نيماگانىڭ گول سالاتىن مۇمكىندىگى بولعان، الايدا "قايرات" گولكيپەرى ستال پوكاتيلوۆ ورنىنان تابىلىپ، دوپتى قاقپاعا جىبەرمەدى. الايدا بىرەر ساتتەن كەيىن قاقپاشى قاتەلەسىپ، "سكەندەربەۋ" فورۆاردى سەبينو پلياكۋ 83ء-شى مينۋتتا ەكىنشى گولدى سالىپ كەتتى. ال 86-شى مينۋتتا ارزو قارسىلاسىنا سوققى جاساپ، قىزىل قاعازبەن الاڭنان قۋىلعاننان كەيىن "قايراتتىڭ" مۇمكىندىگى تۇگەسىلدى. 

"قايرات" پەن "سكەندەربەۋدىڭ" الماتىدا وتكەن العاشقى ماچى 1:1 ەسەبىمەن اياقتالعان ەدى. وسىلايشا البان كلۋبى 3:1 ەسەبىمەن ەۋروپا ليگاسىنىڭ ءۇشىنشى ىرىكتەۋ كەزەڭىنە شىقتى، بۇل كەزەڭدە ولار يرلانديالىق "شەمروك روۆەرس" كومانداسىن جەڭگەن (3:2 سىرت الاڭدا، 2:0 ءوز الاڭىندا) چەحيانىڭ "ملادو-بولەسلاۆ" كلۋبىمەن وينايدى. 

ايتا كەتەيىك، "قايرات" وسىمەن ەكىنشى ماۋسىمدا ەۋروپا ليگاسىنىڭ ەكىنشى ىرىكتەۋ كەزەڭىنەن وتە المادى. وتكەن جىلى الماتىلىقتار ەكى كەزدەسۋدىڭ قورتىندىسى بويىنشا تەل-اۆيۆتىڭ "ماككابي" كومانداسىنان جەڭىلگەن ەدى (1:1، 1:2). ال مۇنىڭ الدىندا "قايراتتىڭ" باس باپكەرى كاحابەر سحادادزەنىڭ ەۋروپا ليگاسىنان شىعىپ قالسا، قىزمەتىنەن كەتەتىنى حابارلانعان ەدى. 

"ەرتىس" فۋتبولشىلارى دا سىرت الاڭدا "سرۆەنا زۆەزدادان" جەڭىلىپ، ەۋروپا ليگاسىنان شىعىپ قالدى. ەكىنشى ىرىكتەۋ كەزەڭىنىڭ قارىمتا كەزدەسۋى بەلگرادتاعى رايكو ميتيچ اتىنداعى ستاديوندا ءوتىپ، 2:0 ەسەبىمەن اياقتالدى. 

وسىلايشا ەۋروپا ليگاسىندا قازىرگى ۋاقىتتا بىردە-بىر قازاقستاندىق كلۋب قالمادى. بۇل تۋرنيرگە چەمپيوندار ليگاسىنىڭ ەكىنشى ىرىكتەۋ كەزەڭىندە پولياكتىڭ "لەگيا" كومانداسىمەن ماچ وتكىزەتىن "استانا" كومانداسى ءوتۋى مۇمكىن.