21 شىلدەدە الماتى وبلىسى ءۇشارال قالاسىنىڭ اۋەجايى اشىلىپ، اۋەجايعا استانادان العاشقى رەيسپەن دەمالۋشىلار ۇشىپ كەلدى، دەپ جازادى Qamshy.kz اقپارات اگەنتتىگى. مۇنداعى ەسكى اۋەجايدان سوڭعى ۇشاق وسىدان شيرەك عاسىر بۇرىن ۇشقان بولاتىن.  بۇل تۋرالى الماتى وبلىسى اكىمىنىڭ باسپا ءسوز قىزمەتى حابارلايدى.

سالتاناتتى شارادا وبلىس اكىمى ا. باتالوۆ وڭىردە ءتۋريزمدى وركەندەتۋ باعىتىندا اتقارىلىپ جاتقان شارالار، سونىڭ ىشىندە ينفراقۇرىلىمدى دامىتۋ، تۋريستىك نىسانداردىڭ قۇرىلىسى جايلى ايتىپ ءوتتى.

«بۇگىن ءبارىمىز ءۇشىن - تاريحي كۇن. ەلباسىنىڭ وبلىسىمىزعا 2014 جىلى ىسساپارمەن كەلگەندە بەرگەن تاپسىرمالارىنىڭ ءبىرى - الاكول كولىندە تۋريستىك سالانى دامىتۋ بولاتىن. سوعان سايكەس وڭىردە تۋريستىك ينفراقۇرىلىم قارقىندى دامىپ، زاماناۋي تۋريستىك نىساندار، قوناق ۇيلەر كوپتەپ سالىنۋدا. سونىڭ ناتيجەسىندە الاكولگە ەلىمىزبەن قاتار تمد-دان، ءتىپتى الىس شەتەلدەردەن دە دەمالۋعا ازاماتتار كەلىپ جاتىر. الاكولدىڭ تۋريستىك پوتەنسيالى زور. جاڭا اۋەجايدىڭ اشىلۋى تۋريستىك سالانىڭ ودان ءارى دامۋىنا تىڭ سەرپىن بەرەدى دەپ ويلايمىن»، - دەدى ا. باتالوۆ.  

سونىمەن قاتار الماتى وبلىسىنىڭ قۇرمەتتى ازاماتى مۇحتار جولجانوۆ، اۋداننىڭ باسقا ازاماتتارى كوپشىلىككە ءوز قۇتتىقتاۋىن جەتكىزىپ، مەملەكەتتىك قولداۋعا ريزاشىلىعىن ءبىلدىردى.