سينوپتيكتەر الداعى ءۇش كۇندە نايزاعاي ويناپ، جاڭبىر جاۋادى، داۋىل تۇرادى دەپ وتىر. كەيبىر وڭىرلەردە قاتتى جەل سوعىپ، بۇرشاق جاۋۋى دا ىقتيمال، دەپ حابارلايدى Qamshy.kz اقپارات اگەنتتىگى كتك ارناسىنا سىلتەمە جاساپ.

ءسويتىپ، شىلدەنىڭ اپتاپ ىستىعىنىڭ بەتى قايتاتىن سياقتى. اسىرەسە، ەلىمىزدىڭ سولتۇستىگىندە جاۋىن-شاشىن كوبەيىپ، جەل تۇرادى. سينوپتيكتەردىڭ بولجاۋىنشا، اۋا تەمپەراتۋراسى +18-23 گرادۋستى كورسەتەدى.

ءبىر اي بويى ءتۇنى قاپىرىق، كۇنى ىستىق بولعان باتىس، شىعىس، وڭتۇستىك قازاقستان وبلىستارىندا دا كۇن رايى وزگەرەدى. تۇرعىنداردىڭ مازاسىن ەندى سوققان داۋىل مەن جاۋعان بۇرشاق الۋى مۇمكىن.

ال استانادا ايتارلىقتاي وزگەرىستەر بايقالمايدى. الماتىعا جاۋىن تەك اپتانىڭ سوڭىندا جاۋادى. قىزىلوردا وبلىسىندا داۋىل سوعىپ، جەلدىڭ جىلدامدىعى سەكۋندىنا 23-28 مەترگە جەتەدى دەپ كۇتىلۋدە.