قازاقستاندا تولەنگەن ايىپپۇلدار مالىمەتتەر بازاسىنان اۆتوماتتى تۇردە وشەتىن بولادى، دەپ حابارلايدى Qamshy.kz اقپارات اگەنتتىگى. بۇل جايىندا ق ر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ءتوراعاسى باعدات مۋسين مالىمدەدى.
«ەلىمىزدە اكىمشىلىك ايىپپۇلداردى دۇرىس ەسەپكە الۋ ماسەلەسىندە ۇلكەن پروبلەما بار. ءتۇرلى ارنالار ارقىلى ءقازىردىڭ وزىندە مەنىمەن جۇزگە جۋىق ادام بازالاردا قوسارلانعان مالىمەتتەردىڭ بار ەكەندىگىن ايتىپ، بايلانىسقا شىقتى. بۇعان قوسا، تولەم جاسالعانىمەن، ايىپپۇلدىڭ بازادا ءالى تۇرعاندىعىنا قاتىستى شاعىم دا كوپ. ءبىز، پروكۋرور رەتىندە باسقا دا فاكتىلەردى انىقتايمىز. ماسەلەن، تۇلعالارعا جازىلعان حاتتامالار مالىمەتتەر بازاسىنا دەر ۋاقىتىندا ەنگىزىلمەيدى نەمەسە قاتەمەن ەنگىزىلەدى نە بولماسا جوعالىپ كەتەدى... سوندىقتان بارلىق اكىمشىلىك جازالاردىڭ ۇلگىلىك بازاسى بولۋى ءتيىس اكىمشىلىك قۇقىق بۇزۋشىلىقتاردىڭ ءبىرىڭعاي ءتىزىلىمىن قۇرۋ تۋرالى شەشىم قابىلدادىق»، – دەپ جازدى باعدات مۋسين فەيسبۋكتەگى پاراقشاسىندا.
باعدات ءمۋسيننىڭ مالىمەدەمەسىنە سايكەس، ەگەر تولەم بانك بولىمشەسى ارقىلى كەز كەلگەن جاعدايدا نەمەسە باسقا جەردە جاسالاتىن بولسا، وندا تولەمنىڭ جاسالعاندىعى تۋرالى اقپارات بىردەن ۇلگىلىك بازاعا ءتۇسىپ، ازاماتتان اۆتوماتتى تۇردە الىناتىن بولادى.
«اكىمشىلىك قۇقىق بۇزۋشىلىقتاردىڭ ءبىرىڭعاي ءتىزىلىمىنىڭ ءبىرىنشى كەزەڭى – بۇل جول پوليسيا قىزمەتكەرلەرىنىڭ حاتتاما جازۋىن اۆتوماتتاندىرۋ پروسەسى. پروبلەمانى جۇيەلى تۇردە شەشەتىندىگىمىزگە سەنىمدىمىن. ءبىراق، بۇل جۇمىس بولاشاقتا پروبلەمانى جويۋعا باعىتتالعان. ال بۇل پروبلەمالاردىڭ بارلىعى قازىرگى ۋاقىتتا باسىنا ءتونىپ وتىرعاندار نە ىستەۋ كەرەك؟ باياعىدا تولەنگەن ايىپپۇلدارى بازادا تۇرسا جانە سول ءۇشىن تولەم جاساۋ تالاپ ەتىلىپ وتىرسا نە ىستەۋ قاجەت؟ ماعان جۇگىنگەندەردىڭ پروبلەماسىن شەشە كەلە، مۇنداي ماسەلەلەردىڭ 90 پايىزى مامانداندىرىلعان حالىققا قىزمەت كورسەتۋ ورتالىقتارىندا تۋىندايتىندىعىن ءتۇسىندىم. سوندىقتان دا، ەندىگى ۋاقىتتا ءاربىر مامانداندىرىلعان حالىققا قىزمەت كورسەتۋ ورتالىعىندا تۇراقتى تۇردە قۇقىقتىق ستاتيستيكا جانە ارنايى ەسەپكە الۋ كوميتەتىنەن اكىمشىلىك ايىپپۇلدار جونىندەگى وكىلەتتى پروكۋروردىڭ بولاتىندىعى تۋرالى شەشىم قابىلداندى. بۇل قازىرگى ۋاقىتتا ماسەلە تۋىنداپ جاتاتىندارعا كومەك بەرەدى دەپ ويلايمىن. ال اكىمشىلىك قۇقىق بۇزۋشىلىقتاردىڭ ءبىرىڭعاي ءتىزىلىمى بويىنشا جۇيەلى جۇمىستاردى جالعاستىراتىن بولامىز»، – دەدى باعدات مۋسين.
پىكىر قالدىرۋ