پرەمەر-مينيستر باقىتجان ساعىنتايەۆ اشم ءبىرىنشى ۆيسە-مينيسترى قايرات ايتۋعانوۆتى سىننىڭ استىنا الدى، دەپ حابارلايدى Qamshy.kz اقپارات اگەنتتىگى تengrinews.kz سايتىنا سىلتەمە جاساپ.
پرەمەر-مينيستر ايماقتاردا جۇمىسقا قامتۋ باعدارلاماسىنىڭ جۇزەگە اسىرىلۋى نە سەبەپتى تىم تومەن ەكەندىگىن سۇرادى. ايتۋعانوۆتىڭ ايتۋىنشا، باعدارلاما 5 اۋداندا 60%-دان استام جۇزەگە اسىرىلعان. ساعىنتايەۆ قايرات ايتۋعانوۆقا سۇراق قويعان كەزدە، ول ءوزىنىڭ مالىمدەمەسىن وقىپ بولىپ ورنىنا جايعاسا كەتكەن.
«قايرات كاپاروۆيچ، مەن سىزگە سۇراق قويدىم، ءسىز زالدى اينالىپ ءجۇرسىز. جاقسى، ەندەشە، ورنىڭىزدا وتىرىپ جاۋاپ بەرىڭىز»، – دەدى پرەمەر-مينيستر.
قايرات ايتۋعانوۆتىڭ ايتۋىنشا، باعدارلامالاردى ىسكە اسىرۋ ءۇشىن قاراجات تەك مامىر ايىندا كەلىپ تۇسكەن. الايدا ۆيسە-مينيستردىڭ بۇل جاۋابىنا قاناعاتتانباعان ساعىنتايەۆ: «اقشانىڭ قاشان تۇسكەندىگىن سۇراپ تۇرعانىم جوق. سەبەبى نەدە؟ جامبىل وبلىسىندا بار-جوعى 40% جانە ماڭعىستاۋ وبلىسىندا ءنول. مۇنىڭ سەبەبىن انىقتادىڭىزدار ما؟» – دەپ ءسوزىن ءبولىپ تاستادى.
بەلگىلى بولعانداي، ماڭعىستاۋ وبلىسىندا اگروونەركاسىپتى نەسيەلەندىرۋ فيليالدارى جوق، سول سەبەپتى دە كاسىپكەرلەر اتىراۋعا بارۋعا ءماجبۇر ەكەن.
«ول جاققا ادامداردى استانادان ىسساپارمەن جىبەرگەن وڭاي ەمەس پە؟ نە سەبەپتى ماڭعىستاۋ وبلىسىنان بارلىعىن اتىراۋعا جىبەرۋ قاجەت؟ بۇل، ءتىپتى، مۇمكىن ەمەس جاعداي. ادامداردى دۇرىستاپ بولە المايسىزدار»، – دەپ ساعىنتايەۆ اشم ۆيسە-مينيسترىنىڭ جۇمىسىن سىنعا الدى.
«شىعىستا ءبىزدىڭ تاراپىمىزدىڭ ادامدارى دۇرىس جۇمىس اتقارماعاندىقتان، ديرەكتورلار مەن ولاردىڭ ورىنباسارلارىن اۋىستىردىق. ولاردى جۇمىستان شىعارىپ، ءقازىر ول جاقتا ءتوراعا ورىنباسارى مەن نەسيە ءبولىمىنىڭ باسشىسى جۇمىس ىستەپ جاتىر. اقمولا وبلىسىندا ەشقانداي ماسەلە بولمايدى. سقو-دا دا اگروونەركاسىپتىك نەسيە كورپوراسياسىنا جاڭا ديرەكتور تاعايىندادىق، ءقازىر ول بارىنشا جۇمىس ىستەۋدە»، – دەپ جاۋاپ بەردى قايرات ايتۋعانوۆ.
«دەمەك، سەندەردىڭ جۇمىسكەرلەرىڭ ءبىز تالاپ ەتەتىن سالادا دۇرىس ءىس اتقارا المايتىن ادامدار ما؟ كىم كورىنگەندى جۇمىسقا الا بەرەسىڭدەر» – دەپ باقىتجان ساعىنتايەۆ ءبىراز سىننىڭ استىنا الىپ، بۇل ماسەلەنى تۇبەگەيلى شەشۋدى تاپسىردى.
