ۋكراينانىڭ ءبىلىم مينيسترلىگىندە حابارلانعانداي، ەلدەگى 70% مەكتەپتەر ورىس تىلىنەن باس تارتىپ وتىر. ءارتۇرلى اۋداندارىندا ورىس تىلىندەگى ارنايى سىنىپتار جابىلىپ، ۋاقىتتىڭ كوپ بولىگىن اعىلشىن تىلىنە اۋدارۋدى كوزدەپ وتىر. بۇل تۋرالى Qamshy.kz اقپارات اگەنتتىگى news.rambler.ru مالىمەتىنە سۇيەنىپ حابارلايدى.

ۋكرايناداعى مەكتەپتەردىڭ باسىم كوپشىلىگى ورىس تىلىندە ءبىلىم بەرەدى. وسىدان 3 جىل بۇرىن ورىس تىلىندە ەلدەگى 17 مىڭعا جۋىق مەكتەپتەر ساباق جۇرگىزگەن.

ەلدەگى ءبىلىم مينيسترلىگى ماماندارىنىڭ ايتۋىنشا، بۇل شەشىمدى اتا-انالار اعىلشىن تىلىنە كوبىرەك ۋاقىت ءبولۋ ءۇشىن قابىلداپ وتىر.

جەرگىلىكتى بيلىك وكىلدەرى دە بۇل شەشىمنىڭ دۇرىس ەكەنىن ايتىپ، قۇپتاۋدا. ۋكراين ءتىلىن مەڭگەرۋ بولاشاقتا بالالاردىڭ وزدەرىنە كەرەك ەكەنىن ايتۋدا. ۋكراينانىڭ حەرسونسك اۋدانىندا 26 مەكتەپ ورىس تىلىنەن باس تارتىپ، ۋكراين تىلىندە ساباق جۇرگىزۋدى باستادى.

حەرسونسك اۋدانى ءبىلىم ءبولىمىنىڭ باسشىسى ەۆگەنيي كرينيسكييدىڭ ايتۋىنشا، كەلەشەكتە بارلىق مەكتەپتەر ۋكراين تىلىنە اۋىسادى. الداعى ۋاقىتتا ءبىرىنشى سىنىپقا تەك ۋكراين تىلىندە وقىتۋ ءۇشىن بالالاردى قابىلداماق.

ۋكراينانىڭ ءبىلىم مينيسترلىگىنىڭ جاڭا باعدارلاماسى بويىنشا العاشقى جۇمىستار جۇرگىزىلىپ جاتىر. 7-9 سىنىپ وقۋلىقتارىنان ليەۆ تولستوي مەن فەدور دوستايەۆسكييدىڭ روماندارى الىنىپ تاستالدى.

ايتا كەتسەك، 2014 جىلى ۋكراينادا ورىس ءتىلىنىڭ مارتەبەسى وزگەشە بولاتىن. ارنايى ورىس ءتىلىن وقىتاتىن ورتالىقتار، ورىس تىلىندەگى ارنايى مەكتەپتەر اشىلدى، ورىس تىلىندە كىتاپتار باسىلىپ شىقتى، جاڭا فيلمدەر ورىس تىلىندە كورسەتىلە باستادى. شىعىس ۋكراينا مەن قىرىم حالقى ۋكراين تىلىنە قاراعاندا ورىس ءتىلىن جاقسى مەڭگەرگەن. ونىڭ سەبەبى، بارلىق قۇجاتتار ورىس تىلىندە جۇرگىزىلگەن.