«قازاقفيلم» كينوستۋدياسىنىڭ ەكى بىردەي اۋقىمدى جوبالارى – «ەلباسى جولى. بەيبىتشىلىك كىندىگى» («پۋت ليدەرا. ۆ ەپيسەنترە ميرا») جانە «تۇمار پاتشايىم» اتتى تاريحي تۋىندىلارىنا كاستينگ ءالى دە جالعاسىپ جاتىر دەپ حابارلايدى Qamshy.kz اقپارات اگەنتتىگى «قازاقفيلم» كينوستۋدياسىنىڭ باسپا ءسوز قىزمەتىنە سىلتەمە جاساپ. ەندى قازاقستاننىڭ وڭتۇستىك جانە باتىس وبلىستارىنىڭ تۇرعىندارى  ءوز باعىن سىناپ،  كينو جۇلدىزىنا اينالۋىنا مۇمكىندىكتەرى بار. كاستينگكە 16 جاستان جوعارى بارلىق قازاقستاندىق قاتىسا الادى.

ەستەرىڭىزگە سالا كەتسەك، ۇستىمىزدەگى جىلدىڭ ماۋسىم ايىندا جۇمىس اتاۋى «ەلباسى جولى. بەيبىتشىلىك كىندىگى» جانە «تۇمار پاتشايىم» اتتى كينوجوبالارعا اكتەرلەر اراسىندا رەسپۋبليكالىق كاستينگ جاريالانعان.

بۇل فيلمدەردى ق ر مادەنيەت جانە سپورت مينيسترلىگى تاپسىرىسى بويىنشا ش.ايمانوۆ اتىنداعى «قازاقفيلم» اق «Sataifilm» كينوكومپانياسىمەن بىرلەسىپ تۇسىرگەلى وتىر. قويۋشى رەجيسسەرى اقان ساتايەۆ.

ايتا كەتسەك، اتالعان فيلمدەرگە كاستينگ قازاقستاننىڭ شىعىس وڭىرلەرىندە – سەمەي، پاۆلودار، وسكەمەن قالالارىندا وتكىزىلگەن. جاقىن كۇندەرى كاستينگ تومەندەگى قالالاردا وتكىزىلەدى:

قوستاناي قالاسى – 14 جانە 15 تامىزدا، ءى.وماروۆ اتىنداعى وبلىستىق  قازاق دراما تەاترىندا (تاران كوش.، 144).

اقتوبە قالاسى – 17 جانە 18 تامىزدا، ت.اقتانوۆ اتىنداعى قازاق دراما تەاترىندا (ت.اقتانوۆ كوش.، 52).

ورال قالاسى – 20 جانە 21 تامىزدا، باتىس قازاقستان وبلىستىق قازاق دراما تەاترى (دوستىق داڭع.، 185).

اتىراۋ قالاسى – 23 جانە 24 تامىزدا، ن.ءجانتورين اتىنداعى اتىراۋ وبلىستىق فيلارمونياسى (م.وتەمىسوۆ كوش.، 115).

اقتاۋ قالاسىندا – 26 جانە 27 تامىزدا، م.وسكەنبايەۆ اتىنداعى ماڭعىستاۋ وبلىستىق فيلارمونياسى (5 ىقشام-اۋدانى، 30 ءۇي).

قىزىلوردا قالاسى – 29 جانە 30 تامىزدا، ا.توقماعانبەتوۆ اتىنداعى مادەنيەت ءۇيى (قازىبەك بي كوش.، 21).

تاراز قالاسى  – 1 جانە 2 قىركۇيەك، جامبىل وبلىستىق قازاق دراما تەاترى (اباي داڭع.، 115).

شىمكەنت قالاسى – 4، 5 جانە 6 قىركۇيەك، ج.شانين اتىنداعى وبلىستىق قازاق دراما تەاترى («نۇرسات» ىقشاماۋدانى، استانا داڭع.).

تەاتر جانە كينو اكتەرلەرى ءبىرىنشى بولىپ قابىلدانادى.

كاستينگكە قاتىسام دەۋشىلەر كورسەتىلگەن مەكەن-جايعا ساعات 9:00-18:00 ارالىعىندا كەلۋى ءتيىس (13:00-14:00 ءۇزىلىس).

قويىلاتىن تالاپتار:

جاسى: 16 جاستان جوعارى ( 16 جاسقا دەيىنگى بالالار جانە كاستينگكە كەلىپ قاتىسا المايتىندار، casting_satai@mail.ru  ەلەكتروندى پوشتاعا كەلەسى اقپاراتتاردى جولداي الادى: 1. جاقىننان (انفاس جانە پروفيل)، بەلگە دەيىن جانە باسىنان اياعىنا دەيىن تۇسىرىلگەن بەت بوياۋسىز، كوزىلدىرىكسىز جانە وڭدەلمەگەن فوتوسۋرەتتەردى؛ 2. تۋعان جىلىڭىز بەن تۇراتىن قالاڭىز، بويىڭىز بەن سالماعىڭىز، ۇلتىڭىز بەن ءبىلىمىڭىز، جۇمىس ورنى مەن ماماندىعىڭىز تۋرالى، سونىمەن قاتار، قانداي سپورت تۇرىمەن اينالىساتىنىڭىز، كينوداعى تاجىريبەڭىز (سەريالدار مەن بەينەكليپتەر)، مۋزىكالىق نەمەسە بي ونەرىڭىز تۋرالى اقپاراتى بار انكەتانى تولتىراسىز.

نازار اۋدارىڭىز! وزىڭىزبەن بايلانىسۋ ءۇشىن تەلەفون ءنومىرىڭىزدى جازىپ جىبەرۋىڭىز كەرەك.

ۇلتى: بارلىق ۇلتتار

سپورتتىق دەنە ءبىتىمدى، جاسىل نەمەسە كوك كوزدى، شاشتارى سارعىش ادامدار ەرەكشە سۇرانىستا.