2017 جىلعى 11 تامىزدا ساع. 19.00-دە «قازاقستان» ورتالىق كونسەرت زالىندا قازاقستان رەسپۋبليكاسى مادەنيەت جانە سپورت مينيسترلىگى، استانا قالاسىنىڭ اكىمدىگى جانە ەرمەك سەركەبايەۆ اتىنداعى مادەنيەتتى جانە ونەردى قولداۋ قورىنىڭ قولداۋىمەن ەكسپو-2017 حالىقارالىق مامانداندىرىلعان كورمەسىنىڭ اياسىندا «ەرمەك سەركەبايەۆقا ارنالادى» اتتى الەمدىك وپەرا جۇلدىزدارىنىڭ گالا-كونسەرتىن ۇيىمداستىرادى دەپ حابارلايدى Qamshy.kz اقپارات اگەنتتىگى.

اتالمىش گالا-كونسەرتتىڭ ۇيىمداستىرىلۋ بارىسىنداعى دەرەكتەرمەن ورتالىق كوممۋنيكاسيالار قىزمەتىنىڭ الاڭىندا ق ر مادەنيەت جانە سپورت ۆيسە-مينيسترى اقتوتى رايىمقۇلوۆا، ەرمەك سەركەبايەۆ اتىنداعى مادەنيەت جانە ونەردى قولداۋ قورىنىڭ قۇرىلتايشىسى،  ا’Studio توبىنىڭ  مۋزىكانتى ءارى پروديۋسەرى سەركەبايەۆ بايعالي، وپەرا ءانشىسى يلدار ابدرازاكوۆ، وپەرا ءانشىسى اسميك گريگوريان، قويۋشى رەجيسسەر ۆاسيليي بارحاتوۆ ءبولىستى.

گالا-كونسەرت اتاقتى قازاقستاندىق ءانشى، كسرو حالىق ءارتيسى، كسرو جانە قازكسر مەملەكەتتىك سىيلىقتارىنىڭ يەگەرى، سوسياليستىك ەڭبەك ەرى ەرمەك سەركەبايەۆتى ەسكە الۋ ماقساتىندا ۇيىمداستىرىلىپ وتىر.

قۇرامى بويىنشا ايرىقشا بولىپ تابىلاتىن بۇل كونسەرتكە الەمگە تانىمال انشىلەر ونەر كورسەتەدى، ونىڭ ىشىندە الەمنىڭ ۇزدىك باس داۋىس يەسى، گرەممي سىيلىعىنىڭ ەكى دۇركىن يەگەرى، مەتروپوليتەن-وپەرا (نيۋ-يورك)، ماريين تەاترى مەن پاريج وپەراسىنىڭ ءسوليسى يلدار ابدرازاكوۆ، ماريين تەاترىنىڭ ءسوليسى، Opera Awards (لوندون ق.) سىيلىعىنىڭ لاۋرەاتى اسميك گريگوريان، ۇلكەن تەاتردىڭ جەتەكشى ءسوليسى، پلاسيدو دومينگونىڭ «وپەراليا - 2016» كونكۋرسىنىڭ جەڭىمپازى بوگدان ۆولكوۆ، ۇلكەن تەاتردىڭ جەتەكشى ءسوليسى يگور گولوۆاتەنكو، ماريين تەاترىنىڭ ءسوليسى سەرگەي سكوروحودوۆ، ماسكەۋلىك «نوۆايا وپەرا»  تەاترىنىڭ ءسوليسى الەكسەي تاتارينسيەۆ، ۇلكەن تەاتردىڭ ءسوليسى  اگۋندا كۋلايەۆا، «استانا وپەرا» تەاترىنىڭ جەتەكشى ءسوليسى، قازاقستان رەسپۋبليكاسىنىڭ ەڭبەك سىڭىرگەن قايراتكەرى سۇندەت بايعوجين، قازاقستان رەسپۋبليكاسىنىڭ ەڭبەك سىڭىرگەن قايراتكەرى، «استانا وپەرا» تەاترىنىڭ جەتەكشى ءسوليسى، «بولشايا وپەرا» تەليەۆيزيالىق جوباسىنىڭ جەڭىمپازى سالتانات احمەتوۆا، قازاقستان رەسپۋبليكاسىنىڭ ەڭبەك سىڭىرگەن قايراتكەرى، استانا قالاسى مەملەكەتتىك اكادەميالىق فيلارمونياسىنىڭ ءسوليسى ازامات جىلتىركوزوۆ.

ەرمەك سەركەبايەۆتى ەسكە الۋ كەشىندە الەمدىك وپەرا كلاسسيكاسىنىڭ جاۋھارلارى -  دج. روسسيني، دج. ۆەردي، ش.گۋنو، ا.پ. بورودين، ك. سەن-سانس، ج. بيزە، پ.ي. چايكوۆسكيي، ا. دۆورجاك، گ. دونيسەتتي، دج. پۋچچيني، ا.ق. جۇبانوۆ، ل. حاميدي وپەرالارىنان اريالار شىرقالاتىن بولادى. كونسەرتكە رەسەيدىڭ ەڭبەك سىڭىرگەن ءارتيسى، تاتارستاننىڭ حالىق ءارتيسى رەنات سالاۆاتوۆتىڭ جەتەكشىلىگىمەن «استانا وپەرا» تەاترىنىڭ سيمفونيالىق وركەسترى قاتىسادى. كەشتىڭ قويۋشى رەجيسسەرى، الەمنىڭ ۇزدىك جانە جارقىن رەجيسسەرلارىنىڭ ءبىرى ۆاسيليي بارحاتوۆ بولماق.