مىندەتتى الەۋمەتتىك مەديسينالىق ساقتاندىرۋدى ەنگىزۋ –  قورعا تۇسكەن قاراجاتتى مەديسينالىق كومەكتىڭ ساپاسىن جاقسارتۋ ءۇشىن باعىتتايتىن، سونداي-اق مەديسينالىق قىزمەتتىڭ ناۋقاستارعا قولجەتىمدى بولۋى ءۇشىن بيۋدجەتتى تولتىراتىن ەكونوميكالىق رەفورما. جامبىل وبلىستىق ونكولوگيالىق ديسپانسەرىنىڭ باس دارىگەرى، جامبىل وبلىستىق ءماسليحاتىنىڭ دەپۋتاتى اباي قۇرالبەك ۇلى نۇرجانوۆ وسىلاي ءمالىم ەتتى دەپ حابارلايدى Qamshy.kz اقپارات اگەنتتىگى.

ەلىمىزدىڭ دەنساۋلىق ساقتاۋ سالاسىنا ەنگىزىلىپ جاتقان رەفورمانىڭ، ءمامس جۇيەسىنىڭ جۇمىسىن، دەنساۋلىق ساقتاۋ جۇيەسىندەگى وزگەرىستەردى رەتتەيتىن زاڭ كۇشىنە ەنىپ (2017 جىلدىڭ 30 ماۋسىمىندا قول قويىلعان)، الەۋمەتتىك مەديسينالىق ساقتاندىرۋ قورىنا 2017 جىلدىڭ 1 شىلدەسىنەن باستاپ ەل ازاماتتارى جارنالار اۋدارا باستادى. جامبىل وبلىستىق ونكولوگيالىق ديسپانسەرىنىڭ باس دارىگەرى، جامبىل وبلىستىق ءماسليحاتىنىڭ دەپۋتاتى اباي نۇرجانوۆ ءمامس جۇيەسى ەڭ الدىمەن ەكونوميكالىق رەفورما دەپ سانايدى.

«مەن دەنساۋلىق ساقتاۋ سالاسىندا 30 جىلدان استام جۇمىس جاساپ، كەڭەس ۇكىمەتىنەن باستاپ قازاقستان رەسپۋبليكاسىنىڭ تاۋەلسىزدىك العان كەزەڭىنە دەيىنگى دەنساۋلىق سالاسىندا بولىپ جاتقان رەفورمالارعا قاتىسىپ كەلەمىن. باستالىپ وتىرعان بۇل جۇيە – وتە ۋاقىتىلى قولعا الىنىپ، بولاشاقتا ءوز جەمىسىن بەرەتىن، دەنساۋلىق  ساقتاۋ سالاسىنىڭ دامۋى ءۇشىن وتە قاجەت جۇيە.

بۇل جۇيە بىرىنشىدەن، ەكونوميكالىق رەفورما. ويتكەنى، مەديسينالىق ساقتاندىرۋ قورىنا تۇسكەن قاراجات مەديسينالىق كومەكتىڭ ساپاسىن جاقسارتۋ ءۇشىن، سونداي-اق مەديسينالىق قىزمەتتىڭ ناۋقاستارعا قولجەتىمدى بولۋى ءۇشىن بيۋدجەتتى تولتىرۋى كەرەك. زاماناۋي جابدىقتار ساتىپ الۋ ءۇشىن، جوعارعى ادىستەمەلىك تەحنولوگيالار ەنگىزۋ ءۇشىن، جاڭا عيماراتتار تۇرعىزۋ ءۇشىن بارىنە جەتكىلىكتى قاراجات قۇيۋ قاجەت. مەديسينالىق ساقتاندىرۋدىڭ دامۋى قازىرگى كەزدەگى دەنساۋلىق ساقتاۋ جۇيەسىندەگى كەمشىلىكتەردى ازايتىپ، جۇيەسىز جاسالىپ جۇرگەن ىستەردى جولعا سالادى.

ەكىنشىدەن، دەنساۋلىق ساقتاۋ سالاسىنىڭ دامۋىنا بۇكىل قوعام بولىپ اتسالىسۋىمىز كەرەك. سوندىقتان، مەملەكەت، جۇمىس بەرۋشىلەر، جۇمىسكەرلەر، جەكە كاسىپكەرلەر ءوز سالىمدارىن قوسۋى قاجەت. سوندا عانا كەرەكتى قاراجات جينالىپ، باستاعان ءىسىمىز جۇزەگە اسادى دەپ ويلايمىن.

ۇشىنشىدەن، دەنساۋلىق ساقتاۋ سالاسىنىڭ ماماندارى، دارىگەرلەر، مەيىربيكەلەر، تەحنيكالىق قىزمەتكەرلەر جالاقىلارى كوتەرىلەدى دەپ ۇمىتتەنەمىز. ويتكەنى، جالاقى جوعارى بولعان كەزدە عانا ادام بار ويىن شىن جۇمىسقا سالادى.

تورتىنشىدەن، قولجەتىمدى مەديسينالىق كومەك دەگەنىمىز –  ءار ناۋقاستىڭ قالاعان مەملەكەتتىك، جەكەمەنشىك مەديسينالىق ورتالىقتاردا قومەك الۋعا قۇقىعىنىڭ بولۋى، قازاقستان رەسپۋبليكاسىنىڭ اۋماعىنداعى قالاعان مەديسينالىق مەكەمەگە قارالا الۋى. بۇل كومەكتىڭ ءبارى تەگىن بولادى»،  –  دەيدى اباي قۇرالبەك ۇلى.

تاجىريبەلى مەديسينا سالاسىنىڭ مامانى رەفورما ءساتتى جۇزەگە اسسا، سىرقاتقا شالدىققان بۇلدىرشىندەر جان-جاقتان كومەك ىزدەپ، حالىققا الاقان جايۋعا ءماجبۇر بولمايدى دەگەن ءۇمىتىن جەتكىزدى.

«مەديسينالىق مىندەتتى ساقتاندىرۋ ەلىمىزدە تامىرىن جايسا، ءبىز ەش ۇتىلمايمىز دەگەن پىكىردى قولدايمىن. ءتۇرلى سىرقاتقا شالدىققان بۇلدىرشىندەر جان-جاقتان كومەك ىزدەپ، حالىققا الاقان جايۋعا ءماجبۇر بولمايدى دەگەن ۇمىتتەمىز. 2018 جىلدىڭ 1 قاڭتارىنان باستاپ مىندەتتى الەۋمەتتىك مەديسينالىق ساقتاندىرۋ جۇيەسى ناقتى جۇمىسىن باستايدى.

مەديسينالىق قىزمەتكەر ءۇشىن بۇل جۇيە – وتە جاۋاپتى جانە اۋقىمدى بولىپ تابىلادى. دەنساۋلىق – ادام ومىرىندەگى ەڭ زور بايلىق. ءبىراق ادامدار وعان سىرقات بويىن مەڭدەپ، مازالاي باستاعان كەزدە عانا نازار اۋدارادى. ەندى مىندەتتى الەۋمەتتىك مەديسينالىق ساقتاندىرۋ جۇيەسى بويىنشا ءۇش جاقتى جاۋاپكەرشىلىك –  ەلىمىزدىڭ ءار تۇرعىنى ءۇشىن ازاماتتىڭ ءوزى، مەديسينالىق قىزمەتكەر، مەملەكەت جاۋاپتى بولماق»، –  دەدى اباي قۇرالبەك ۇلى.