اقتوبەگە كەلگەن پرەمەر-مينيستردىڭ ءبىرىنشى ورىنباسارى اسقار مامين وبلىس اكىمدەرىنىڭ ورىنباسارلارىمەن كەزدەستى. «نۇرلى جەر» باعدارلاماسى بويىنشا سولتۇستىك قازاقستان، پاۆلودار، قاراعاندى وبلىستارىندا ءبىرقاتار ماسەلەلەر بار دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.
«نۇرلى جەر» باعدارلاماسىنىڭ 7 ايداعى قورىتىندىسى شىقتى. ەلىمىز بويىنشا بيىل 1،2 ميلليون شارشى مەتر تۇرعىن ءۇي پايدالانۋعا بەرىلۋى ءتيىس. قازىرگى ۋاقىتتا قۇرىلىستىڭ 61 پايىزى اياقتالعان. ايماقتاردىڭ ءبىرى كوش باستاسا، ەكىنشىسى بىرنەشە رەت مەملەكەتتىك ساتىپ الۋ ءراسىمىن وتكىزىپ، تاياۋدا عانا قۇرىلىسقا كىرىسكەن. ەلىمىزدەگى بارلىق ايماقتىڭ وكىلدەرىمەن كەزدەسكەن پرەمەر-مينيستردىڭ ءبىرىنشى ورىنباسارى اسقار مامين سولتۇستىك قازاقستان، پاۆلودار، قاراعاندى وبلىستارى مەن استانا قالاسىنىڭ قۇرىلىسقا جاۋاپتى اكىم ورىنباسارلارىنان تاپسىرمانى ورىنداۋدى تالاپ ەتتى.
«ەلىمىزدە تۇرعىن ءۇي قۇرىلىسى قارقىندى دامىپ جاتىر. رەسپۋبليكا بويىنشا 2017 جىلدىڭ 7 ايلىق قورىتىندىسىندا 6،2 ميلليون شارشى مەتر تۇرعىن ءۇي پايدالانۋعا بەرىلدى. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 8،2 پايىزعا ارتىپ وتىر. بيىل 10 ميلليون شارشى مەتردەن استام تۇرعىن ءۇي پايدالانۋعا بەرىلەدى دەپ جوسپارلانۋدا. ۇكىمەت پەن جەرگىلىكتى مەملەكەتتىك ورگاندارعا ۇلكەن جاۋاپكەرشىلىك جۇكتەلدى»، – دەدى اسقار مامين.
ەلىمىز بويىنشا تۇرعىن ءۇي قۇرىلىس جۇمىستارىنا بيىل 445 ميلليارد تەڭگە ينۆەستيسيا سالىندى. بارلىعى 53 949 ءۇي پايدالاۋعا بەرىلگەن. قازىرگى كەزدە «نۇرلى جەر» باعدارلاماسى 61 پايىزعا ورىندالعان. قۇرىلىس جۇمىستارىن جۇرگىزۋدە استانا، الماتى، ماڭعىستاۋ، وڭتۇستىك قازاقستان وبلىستارى الدا كەلەدى. ال پاۆلودار، سولتۇستىك قازاقستانداعى قۇرىلىس جۇمىستارى ماردىمسىز.
«ايماقتاردا ارەندالىق تۇرعىن ۇيلەر سالىنىپ جاتىر. ساتىپ الۋ قۇقىعى بەرىلمەيتىن پاتەرلەر الەۋمەتتىك جاعدايى تومەن وتباسىلارعا ارنالعان. جىلپى اۋماعى 311 مىڭ شارشى مەتر، ياعني، 6 مىڭ پاتەر. بيىل 150 مىڭ شارشى مەتر پاتەر پايدالانۋعا بەرىلۋى ءتيىس ەدى. الايدا ماڭعىستاۋ، الماتى، شىعىس قازاقستان وبلىستارى مەملەكەتتىك ساتىپ الۋ بايقاۋىن كەش وتكىزىپ، جوسپاردى ورىنداۋعا كەدەرگى بولىپ وتىر. كەيبىر ايماق مەملەكەتتىك بايقاۋدى ەكىنشى رەت وتكىزىپ، ۋاقىت جوعالتىپ الدى. بۇل قۇرىلىسقا رەسپۋبليكالىق بيۋدجەتتەن 25 ميلليارد تەڭگە قارجى بولىنگەن بولاتىن. ايماقتارعا 10،4 ميلليارد تەڭگە بەرىلدى. ونىڭ 91 پايىزى يگەرىلدى. استانا، ماڭعىستاۋ، قوستاناي، جامبىل، پاۆلودار وبلىستارى قارجىنى دۇرىس يگەرە الماي كەلەدى»، – دەدى ق ر ينۆەستيسيالار جانە دامۋ ۆيسە-مينيسترى رومان سكليار.
استانا قالاسى اكىمىنىڭ ورىنباسارى سەرگەي حوروشۋن بىردە-بىر ارەندالىق تۇرعىن ءۇي قۇرىلىسىن باستاماعانى ءۇشىن اسقار ءماميننىڭ سىنىنا ۇشىرادى. ول ەلوردادا باسەكەلەستىك جوعارى ەكەنىن، ءاربىر مەملەكەتتىك بايقاۋدان سوڭ كاسىپكەرلەر سوتقا شاعىم تۇسىرەتىنىن، قارجىلىق تەكسەرۋلەر ءجيى بولاتىنىن ايتىپ اقتالدى. ءبىراق بۇل سەبەپتەر باسشىلاردىڭ جاۋاپكەرشىلىگىن جەڭىلدەتە المايدى.
«نۇرلى جەر» باعدارلاماسى بويىنشا ءار ايماققا قارجى تەڭ بولىنەدى. تاپسىرما ءبىر بولعانىمەن، ونىڭ ورىندالۋى ءارقيلى. ماسەلەن، الماتى مەن اتىراۋ وبلىستارى جاڭا جوبانى قارجىلاندىرۋعا سۇرانىس بەرمەگەن. ماڭعىستاۋ مەن شىعىس قازاقستان وبلىستارى بولىنەتىن قارجىعا قاجەتتى قۇجاتتاردى تاپسىرماعان.
«ينجەنەرلىك-كوممۋنيكاسيالىق جەلىلەردىڭ قۇرىلىسىنا بيىل رەسپۋبليكالىق بيۋدجەتتەن 83،4 ميلليارد تەڭگە ءبولىندى. ايماقتارعا 44 ميلليون تەڭگە قاراستىرىلعان. قارجىنىڭ يگەرىلۋى – 88 پايىز. استانا، قىزىلوردا، پاۆلودار، جامبىل وبلىستارىندا قارجىنى يگەرۋ كورسەتكىشى تومەن. ايماقتار 2018-2020 جىلدارعا ارنالعان جوبالارىن كەشىكتىرمەي تاپسىرۋى كەرەك. اتىراۋ مەن ماڭعىستاۋ مۇلدە جوبا ۇسىنبادى. بۇل الداعى ۋاقىتتا قۇرىلىس جۇمىستارىنا كەدەرگى كەلتىرىپ، قۇرىلىستىڭ توقتاۋىنا اكەپ سوعۋى مۇمكىن»، – دەدى ۆيسە-مينيستر رومان سكليار. «نۇرلى جەر» باعدارلاماسىنىڭ كەيبىر ايماقتا دۇرىس جۇرگىزىلمەگەنىن سىناعان ۇكىمەت باسشىسىنىڭ ءبىرىنشى ورىنباسارى اسقار مامين الداعى ۋاقىتتا ەلباسى الدىندا جەكە-جەكە ەسەپ بەرەتىندەرىن ەسكە سالدى.
