ەۋروپالىق وداقتىڭ ازىق-تۇلىك قاۋىپسىزدىگىنە جاۋاپ بەرەتىن مينيسترلىگى جاقىن ۋاقىتتا ءقاۋىپتى زاتتارمەن ۋلانعان تاۋىق جۇمىرتقالارىنا بايلانىستى تۋعان داۋدى تالقىلاۋ ءۇشىن جەدەل وتىرىس جاساماق دەپ حابارلايدى Qamshy.kz اقپارات اگەنتتىگى. بۇل تۋرالى ەۋروكوميسسيا مۇشەسى ۆيتنەس اندريۋكايتيس مالىمدەدى.

اندريۋكايتيس نيدەرلاند، بەلگيا جانە گەرمانيا ەلدەرىن اتالمىش داۋعا بايلانىستى ايىپتاۋلاردان باس تارتۋعا شاقىردى. بۇل ءۇش ەلدىڭ وكىلدەرى ەۋروپادا تارالعان جۇقپالى جۇمىرتقالاردىڭ جاۋاپكەرشىلىگى قاي ەلگە ءتان ەكەنىن انىقتاۋمەن بولدى.

جۇمىرتقانىڭ قۇرامىندا ادام ومىرىنە اسا ءقاۋىپتى ينسەكتيسيد – فيپرونيل تابىلعان. نيدەرلاندتا ءونىمنىڭ زاقىمدانۋىنا قاتىسى بار دەگەن كۇدىكپەن ەكى ادام ۇستالعان. ولار – تاۋىق فەرماسىنا كەنە، بۇرگە، بيت سىندى جاندىكتەرگە قارسى ينسەكتيسيد جىبەرگەن كومپانيانىڭ مەنەدجەرلەرى. ال جۇمىرتقالار ەۋروپانىڭ ونداعان قالالارىنا تارالىپ، ساتىلىمعا شىعىپ ۇلگەرگەن.