شۆەيساريا كونفەدەراسيانىڭ پرەزيدەنتى دوريس لويتحارد «ەكسپو-2017» كورمەسى اياسىندا شۆەيساريانىڭ ۇلتتىق كۇنىن اتاپ ءوتۋ شارالارىنا قاتىستى دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

«بولاشاق ەنەرگياسى» تاقىرىبىمەن ءوتىپ جاتقان «ەكسپو-2017» كورمەسى الەمدە تۇراقتى بولاشاقتى قۇرۋدا نەگىز بولا الادى. وسى ورايدا ەنەرگيانى، تازا ەكولوگيانى قاماتاماسىز ەتۋ اسا وزەكتىلىككە يە. بۇل باعىتتا «ەكسپو-2017» كورمەسىن وتكىزۋ الەمدىك قوعامداستىق ءۇشىن ماڭىزدى دەپ سەنىممەن ايتا الامىز. وسىندا الداعى ۋاقىتتا دا جاڭا تەحنولوگيامىزدى ارى قاراي دا كەڭىنەن تانىستىرۋعا مۇمكىندىك بار، سەبەبى بۇگىندە قازاقستان مەن شۆەيساريا اراسىندا تۇراقتى ىنتىماقتاستىق ورناعان»، – دەدى لويتحارد.

ءوز كەزەگىندە ق ر قارجى ءمينيسترى باقىت سۇلتانوۆ اتالعان ەلدەن كەلگەن دەلەگاسيانىڭ ساپارى قازاقستان مەن شۆەيساريانىڭ اراسىنداعى ديپلوماتيالىق قاتىناستاردىڭ 25 جىلدىعىن مەرەكەلەۋ جىلىندا ءوتىپ جاتقاندىعىن ءسوز ەتتى.

«ءبىز بالامالى ءارى جاڭاراتىن ەنەرگيا كوزدەرىن دامىتۋ ىسىنە ۇلەسىن قوسقان شۆەيساريا ۇكىمەتى مەن ءسىزدىڭ جەكە ەڭبەگىڭىزدى جوعارى باعالايمىن. شۆەيساريا حالقى قابىلداعان «ەنەرگەتيكالىق ستراتەگيا – 2050» باعدارلاماسى «جاسىل» ەكونوميكانى دامىتۋعا ەلەۋلى ۇلەس قوساتىندىعىنا سەنىمدەمىز. وزدەرىڭىز بىلەسىزدەر، بۇل سالانى دامىتۋعا قازاقستان دا ايرىقشا ءمان بەرىپ وتىر. جالپى، «ەكسپو-2017» كورمەسى الەمدىك قوعامداستىقتىڭ جاھاندىق پروبلەمالارىن شەشۋ ءۇشىن الەمدىك الاڭعا اينالاتىندىعى انىق»، – دەدى سۇلتانوۆ.

بۇدان بۇرىن حابارلاعانىمىزداي، بۇگىن استاناداعى «ەكسپو-2017» كورمەسى اۋماعىندا الماتى وبلىسى مەن شۆەيساريانىڭ تيچينو كانتونى اراسىندا ءوزارا ىنتىماقتاستىق تۋرالى مەموراندۋم جاسالدى.