ەلوردادا «ەكسپو-2017» حالىقارالىق كورمەسىنىڭ ەرىكتىلەرى ءۇشىن مەرەكەلىك تيمبيلدينگ وتكىزىلدى دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

ءۇش ايلىق حالىقارالىق كورمەگە ەرىكتىلەردىڭ «ءۇش بۋىنى» دا كەلگەن. بۇلاي دەيتىنىمىز، كورمەگە ءار اي سايىن 500 ەرىكتىدەن قاتىسادى ەكەن. ۆولونتەرلاردىڭ كوبى كەلەسى ايعا دا قالىپ، حالىقارالىق شاراعا اتسالىسىپ جاتادى.

«استانا جاستارى» كمم-نىڭ ۇيىمداستىرۋشى ءبولىمىنىڭ جەتەكشىسى شىڭعىس تىلەۋليننىڭ ايتۋىنشا، بۇگىنگى شارا جاستاردى دوستاستىرىپ، كوماندالىق بىلىكتىلىكتەرىن شىڭداۋعا باعىتتالعان. ۇيىمداستىرۋشىلار شارا بارىسىندا شىعارماشىلىق جانە سپورتتىق سايىستاردى وتكىزدى.

«بۇگىنگى تيمبيلدينگ قالانىڭ «ەكسپو-2017» كورمەسىنىڭ 14 مەملەكەتتىك مەكەمەسىندە جۇمىس جۇرگىزەتىن ەرىكتىلەر ءۇشىن ارنايى ۇيىمداستىرىلىپ وتىر. ەرتەڭ وتەتىن «جاستار كۇنىنە» وراي جاس بۋىندى بىرىكتىرەتىن شارانى قولعا الۋدى جوسپارلادىق. ۆولونتەرلار ءوز پايدالارى ءۇشىن دە جۇمىس اتقارىپ جاتىر. ماسەلەن، مەديسينالىق كوللەدجدە وقيتىن ستۋدەنت دارىگەرلەرگە كومەك كورسەتىپ، تاجىريبەسىن شىڭداۋدا. ەرىكتىلەردىڭ ەڭبەگىن باعالاۋدا مۇنىمەن شەكتەلىپ قالمايمىز»، – دەيدى شىڭعىس تىلەۋلين.

ەرىكتىلەرمەن بىرگە بۇگىنگى شاراعا استانالىق التىنشاش مۇقاتايەۆا دا قاتىسىپ وتىر. مۇمكىندىگى شەكتەۋلى جان بولسا دا، التىنشاش تالابىنان قايتپاي، قالا تۇرعىندارى مەن قوناقتارىن انىمەن قۋانتىپ ءجۇر. ەرىكتىلەردىڭ تيمبيلدينگىنە دە التىنشاش ەكى ءانىن دايارلاپ اكەلگەن ەكەن.

«استانا قالاسىنىڭ اكىمدىگىنەن تەلەفون شالىپ، «استانا جاستارى» ۇيىمىنىڭ ۇيىمداستىرۋىمەن ءۇش كۇندىك «جاستار ەنەرگياسى» لاگەرىنە قاتىسۋ تۋرالى ۇسىنىس كەلىپ ءتۇستى. قۋانا-قۋانا كەلىستىم. ءار سالانىڭ كوشباسشىلارى جينالعان ەكەن. لاگەردە ترەنينگتەر، ءتۇرلى شارالار بولدى. ءانشى مارات وماروۆتان ساباق الدىق. مەن ءوزىمنىڭ تاراپىمنان ءان ايتتىم. الدىڭعى اپتالاردا «نۇر وتان» پارتياسىنىڭ «رۋحى مىقتىلار» جوباسىنا قاتىستىم. ءبىر سوزبەن، شاقىرىلعان جەردەن قالماۋعا تىرىسامىن. «شابىت» قازاق ونەر ۋنيۆەرسيتەتىنىڭ 2ء-شى كۋرس ستۋدەنتىمىن»، – دەيدى التىنشاش.

التىنشاشتىڭ تامساندىرا سالعان ءانىن جاستار ەرەكشە ىقىلاسپەن قابىل الدى. شاراعا سونداي-اق، استانا قالاسى اكىمدىگىنىڭ ءماسليحات دەپۋتاتتارى، بەلگىلى قوعام قايراتكەرلەر قاتىستى. كەشكە دەيىن جالعاساتىن جاستاردىڭ تيمبيلدينگىندە بەلگىلى ەلوردالىق انشىلەر دە ونەرىن پاش ەتپەك.