نۇرسۇلتان نازاربايەۆ شۆەيساريا كونفەدەراسياسىنىڭ پرەزيدەنتى دوريس لويتحاردپەن كەزدەستى دەپ حابارلايدى Qamshy.kz اقپارات اگەنتتىگى.

مەملەكەت باسشىسى نۇرسۇلتان نازاربايەۆ دوريس لويتحاردقا «ەكسپو-2017» حالىقارالىق كورمەسىندەگى شۆەيساريا ۇلتتىق كۇنىنىڭ اشىلۋىنا قاتىسقانى ءۇشىن ريزاشىلىق ءبىلدىردى.

– ءسىزدىڭ العاش رەت جاڭا ەلوردامىزعا كەلىپ وتىرعانىڭىزعا قۋانىشتىمىن. جاقىندا، 1 تامىزدا، شۆەيساريانىڭ ۇلتتىق مەرەكەسى – كونفەدەراسيانىڭ قۇرىلعان كۇنى اتاپ ءوتىلدى. مەيرامدارىڭىزبەن قۇتتىقتايمىن. بۇگىن ەكسپو كورمەسىندە ۇلتتىق كۇندەرىڭىزدى اشتىڭىز. سىزگە ۇنادى دەگەن ۇمىتتەمىن. ءبىز ءۇشىن ەكسپو كورمەسىنە كەلۋىڭىزدىڭ ماڭىزى زور، – دەدى قازاقستان پرەزيدەنتى.

نۇرسۇلتان نازاربايەۆ ەكى ەل اراسىندا قالىپتاسقان ىنتىماقتاستىققا توقتالىپ، ەكىجاقتى ەكونوميكالىق جانە ساياسي قارىم-قاتىناستاردىڭ ودان ءارى نىعايا تۇسەتىنىنە سەنىم ءبىلدىردى.

– شۆەيساريا – قازاقستاننىڭ ەۋروپاداعى اسا ماڭىزدى سەرىكتەسى. ءبىز بۇل قارىم-قاتىناستى جوعارى باعالايمىز جانە ونى ءارى قاراي دامىتۋعا نيەتتىمىز. ەلدەرىمىز اراسىنداعى تاۋار اينالىمى ارتىپ كەلەدى. شۆەيساريا بيزنەسىنىڭ ەلىمىزدە دامۋىنا مۇددەلىمىز. ءقازىر 300 كاسىپورىن جۇمىس ىستەۋدە، ولاردىڭ سانى ودان دا كوپ بولۋى مۇمكىن. ءسىزدىڭ ساپارىڭىز ەكونوميكالىق جانە ساياسي قارىم-قاتىناسىمىزدىڭ ودان ءارى نىعايۋىنا سەرپىن بەرەدى دەپ سەنەمىن، – دەدى قازاقستان پرەزيدەنتى.

مەملەكەت باسشىسى شۆەيساريا كونفەدەراسياسىنىڭ پرەزيدەنتىنە قازاقستانعا جاساعان ساپارى بارىسىندا ارالاپ كورۋگە بولاتىن استانا قالاسىنداعى ساۋلەتتى عيماراتتار تۋرالى ايتتى.

– سوڭعى ون بەس جىلدا سالىنعان قالاعا العاشقى ساپارىڭىز قىزىقتى بولعان شىعار دەپ ويلايمىن. ءبىز ەكسپو نىساندارىن 3 جىلدا سالىپ شىقتىق. استانادا الەمدە تەڭدەسى جوق كوپتەگەن بىرەگەي جوبالار جۇزەگە اسىرىلدى. ماسەلەن، مۇندا ساۋلەتشى نورمان فوستەردىڭ جوباسى بويىنشا تاڭعاجايىپ پيراميدا سالىندى، – دەدى نۇرسۇلتان نازاربايەۆ.

سونىمەن بىرگە، مەملەكەت باسشىسى «نۇر الەم» سفەراسىن، «حان شاتىر» ساۋدا جانە ويىن-ساۋىق ورتالىعىنىڭ عيماراتىن، «نۇرلى جول» جاڭا ۆوكزالىن، «استانا وپەرا» وپەرا جانە بالەت تەاترىن، سونداي-اق باسقا دا نىسانداردى اتاپ ءوتتى.

كەزدەسۋدە دوريس لويتحارد قازاقستان پرەزيدەنتىنە العىس ءبىلدىرىپ، «ەكسپو-2017» كورمەسىنىڭ تابىستى ۇيىمداستىرىلۋىمەن قۇتتىقتادى.

– شىن مانىندە، «نۇر الەم» سفەراسى – تاڭعالارلىق نىسان. وندا ورنالاساتىن «استانا» قارجى ورتالىعىنىڭ دامۋ پەرسپەكتيۆاسى وتە جاقسى بولادى دەپ ويلايمىن. سونىمەن قاتار، بيزنەس تاراپىنان قارىم-قاتىناستى نىعايتۋعا زور قىزىعۋشىلىق بار ەكەنىن ايتۋعا بولادى، – دەدى شۆەيساريا كونفەدەراسياسىنىڭ پرەزيدەنتى.