قىرعىزستاننىڭ نارىن وبلىسىنداعى ەمگەكچيل اۋىلىنىڭ تۇرعىندارى اۋىلداعى بۇكىل الكوگول ونىمدەرىن جويدى. بۇل باستاماعا مۇرىندىق بولعان جاس بەلسەندىلەر وسىلايشا سپيرتتىك ىشىمدىك ساۋداسىنا توقتام سالماقشى. بۇل تۋرالى جەرگىلىكتى جاستار ۇيىمىنىڭ ءتوراعاسى جانىبەك سوپييەۆ مالىمدەدى، دەپ حابارلايدى Qamshy.kz اقپارات اگەنتتىگى Centralasian.org سايتىنا سىلتەمە جاساي وتىرىپ.
ونىڭ سوزىنشە، اۋىل تۇرعىندارى ەلدى مەكەندەگى بارلىق سپيرتتىك ىشىمدىكتى ساتىپ الۋ ءۇشىن 400 مىڭ سوم جيناعان، تاعى 100 مىڭ سومنىڭ ونىمدەرىن دۇكەن يەلەرىنىڭ وزدەرى بەرگەن. تامىزدىڭ 11ء-ى مەن 12ء-ى كۇندەرى سپيرتتىك ىشىمدىكتەردى اۋىل سىرتىنا شىعارىپ، تۇگەلدەي جويعان.
تۇرعىندار كوپتەگەن قايعىلى وقيعالارعا الكوگول سەبەپ بولاتىنىن ايتادى. بۇعان دەيىن وبلىستىق قازيات نارىن وبلىسىنداعى بەس اۋىلدا سپيرتتىك ىشىمدىك ساتۋدى ءبىرجولاتا توقتاتقانى تۋرالى حابارلاعان.
ءدال وسىنداي جاعداي جاقىندا وش وبلىسىنداعى جاپالاق اۋىلىندا بولعان ەدى. جەرگىلىكتى تۇرعىندار اۋىلداعى بۇكىل سپيرتتىك ىشىمدىك اتاۋلىنى ساتىپ الىپ، تۇگەلدەي بۋلدوزەرمەن تاپتاپ، جويعان.
وتكەن اپتادا باتكەن وبلىسىندا يمامدار جەرگىلىكتى دۇكەندەردى ارالاپ، سپيرتتىك ىشىمدىك ساۋداسىنان باس تارتۋعا شاقىرعان. بۇدان كەيىن قىرعىزستان مۇسىلماندارى ءدىني باسقارماسىنىڭ باس ءمۇفتيى ماقسات قاجى توكتومۋشوۆ ءدىني باسقارما "الكوگول ساۋداسىنا ماجبۇرلەپ تىيىم سالۋشىلاردى قولدامايتىنى" تۋرالى مالىمدەگەن.
