الماتى وبلىسىندا "Koksu water fest-2017" اتتى رافتينگتەن ءداستۇرلى سايىس ءوتتى. تىلسىم تابيعاتىمەن ەرەكشە كوزگە تۇسەتىن قوياندى سايىندا كوكسۋ وزەنىمەن وتەتىن 15 شاقىرىمدىق مارافونعا مەملەكەتتىك قىزمەتكەرلەر، ب ا ق وكىلدەرى، ەنەرگەتيكتەر، ديزاينەرلەر، "جاسىل ەل" ەڭبەك جاساعى بارلىعى 15 كوماندا قاتىستى، - دەپ حابارلايدى Qamshy.kz اقپارات اگەنتتىگى تengrinews.kz سايتىنا سىلتەمە جاساپ.

ءۇشىنشى جىل قاتارىنان ۇيىمداستىرىلعان سۋ فەستيۆالىنىڭ باستى ماقساتى جەر جانناتى جەتىسۋدىڭ اسەم تابيعاتىن تاماشالۋ، وڭىردە ءتۋريزمنىڭ دامۋىنا وڭ ىقپال ەتۋ. سونداي-اق، ەكستريمالدى سپورت تۇرلەرىن ناسيحاتتاپ، بۇقارانى سالاۋاتتى ءومىر سالتىن قالىپتاستىرۋعا شاقىرۋ.

شاراعا ۇسىنىس بىلدىرگەندەر تىم كوپ بولدى. اسىرەسە، جاستار جاعى بۇل شارانىڭ قىزىقتى ءارى اسەرلى ءوتۋى ءۇشىن بار كۇش-جىگەرىن سالدى. كوكسۋ سۋ فەستيۆالىندە رافت سۋ كولىگىنە وتىرىپ العاش ەسكەك ۇستاعاندار دا وسى ارادا كەزدەستى.

اعىسى قاتتى تاۋ وزەنىنىڭ تولقىندارىمەن ارپالىسىپ، تاماشا اسەر العان سپورتتىڭ بۇل تۇرىنە كوڭىلى اۋعانىن كوپشىلىك جاسىرمادى. العان اسەرلەرىن بىر-بىرىمەن ءبولىستى. قاعازباستىلىق پەن كەڭسەدەگى جۇمىستان ءبىر ءسات جەڭىلدەگەن مەملەكەتتىك قىزمەتكەرلەر وزەن اعىنىمەن جارىسىپ، ءبىر سەرپىلىپ قالعانىن ايتتى. جارىس بارىسىندا قاتىسۋشىلار تەك رافتپەن ءجۇزىپ قانا قويماي، كەدەرگىلەردەن ءوتىپ، كەلىسىلگەن ۋاقىت ىشىندە ارقانمەن تاۋعا كوتەرىلىپ قايتا ءتۇستى.

وسى ۋاقىتقا دەيىن مۇنداي جارىسقا قاتىسىپ كورگەن جوقپىن. جارىستان العان اسەردى سوزبەن ايتىپ جەتكىزۋ مۇمكىن ەمەس. تەك بارىپ، قاتىسىپ، سەزىنۋ كەرەك. بۇل شارانىڭ ناتيجەسىندە جاڭا دوستار تاپتىق. ءوزىمىزدى سۋداعى جارىستا سىناپ كوردىك. مەن ەسكەك ەسۋشى بولدىم. جاۋاپكەرشىلىك ماعان ارتىلعاندىقتان، قولىمنان كەلگەنشە جاقسى ناتيجە كورسەتۋگە تىرىستىم. اسىرەسە، اعىسى قاتتى جەردەن وتكەندە قايىقتان ءبىرازىمىز قۇلاپ تا قالدى. ءبىراق بىزگە كەڭەس بەرەتىن ارنايى توپتىڭ ماماندارى ءبىزدىڭ قاۋىپسىزدىگىمىزدى باستى نازارعا الىپ، بىزگە باعىت-باعدار بەرىپ وتىردى. وسى جاعىنان ۇيىمداستىرۋشىلاردىڭ زور ەڭبەگىنە العىس ايتا كەتكەن ءجون. جارىستىڭ شارتى بارىمىزگە ورتاق بولعاندىقتان، كوماندا قۇرامى بەلسەنە ەڭبەك ەتتى. الداعى ۋاقىتتا مۇنداي شارا ۇيىمداستىرىلسا مىندەتتى تۇردە قالماي بارامىز، – دەيدى رافتينگ جارىسىنا العاش قاتىسقان وبلىستىق «جەتىسۋ» گازەتىنىڭ بەتتەۋشى-ديزاينەرى ايدوس مۇزدىبايەۆ.

ۇيىمداستىرۋشىلار جارىسقا قاتىسۋشىلار ءۇشىن بارلىق جاعدايدى جاساعان. ءتىپتى، ىستىق تاماققا دەيىن تەگىن قامتاماسىز ەتىلگەن.

"بۇل شارانىڭ جىل وتكەن سايىن وتكىزۋ اۋقىمى، ءتارتىبى، شارتى كەڭەيىپ كەلەدى. قاتىسۋعا نيەت بىلدىرۋشىلەر دە تىم كوپ. ءبىز بارلىق سالانى قامتۋعا تىرىستىق. بولاشاقتا بۇل جارىستى باسقاشا ۇيىمداستىرامىز دەگەن جوسپار دا بار. ءبىز كوبىنە جۇمىسباستىلىقپەن ءجۇرىپ، تابيعاتتىڭ كەرەمەت تۇستارىن تاماشالاي المايمىز. اسىرەسە، مەملەكەتتىك قىزمەتكەرلەر. جەر جانناتى جەتىسۋدىڭ تۇمسا تابيعاتى تىم بولەك. ول سۇلۋلىقتى سۋرەتتەن كورگەننەن گورى كوزبەن كورۋ اسەرى باسقا. سول ءۇشىن دە ءبىز وسى شارانى ۇيىمداستىردىق. مۇندا قاۋىپسىزدىك شارالارى قاتاڭ ساقتالعان. جارىسقا قاتىسۋشىلاردىڭ بارلىعىنا ارنايى كيىم بەرىلدى. شارا سوڭىندا قاتىسۋشىلار ءوز ريزاشىلىقتارىن ايتىپ، كەلەر جارىستى ۇيىمداستىرۋعا دەگەن وزدەرىنىڭ پىكىرلەرىمەن ءبولىستى"، - دەيدى الماتى وبلىستىق تۋريزم باسقارماسى باسشىسىنىڭ مىندەتىن اتقارۋشى ارقاۋ شىنتايەۆ.

سايىس قورتىندىسى بويىنشا الماتى وبلىسى اكىمىنىڭ اپپاراتى ءبىرىنشى ورىندى يەلەنسە، بۇقارالىق اقپارات قۇرالدارى وكىلدەرىنەن قۇرالعان كوماندا ەكىنشى ورىنعا تۇراقتادى. ال ءۇشىنشى ورىن "تاتەك" ەنەرگەتيكالىق كومپانيا وكىلدەرىنىڭ ەنشىسىنە بۇيىردى. وبلىستىق تۋريزم باسقارماسى ۇيىتقى بولعان شارا كەلەسى جىلى دا ءوز جالعاسىن تابادى.