استانا قالاسىنىڭ اكىمى گۋانچجوۋدان (جۇڭگو حالىق رەسپۋبليكاسى) حالىقارالىق مامانداندىرىلعان ەكسپو-2017 كورمەسىندە گۋاندۋن پروۆينسياسى اپتاسىنىڭ اشىلۋىنا كەلگەن دەلەگاسيامەن كەزدەستى دەپ حابارلايدى Qamshy.kz اقپارات اگەنتتىگى استانا اكىمدىگىنىڭ باسپا ءسوز قىزمەتىنە سىلتەمە جاساي وتىرىپ.

كەزدەسۋ بارىسىندا گۋانچجوۋ قالاسىنىڭ ساياسي كونسۋلتاتيۆتى كەڭەسىنىڭ ءتوراعاسى ليۋ يۋەلۋن مەن استانا اكىمى اسەت يسەكەشيەۆ ەكى قالا اراسىنداعى ارىپتەستىك مۇمكىندىكتەرىن تالقىلادى.

قوناقتاردى قازاقستان استاناسىنىڭ ينفراقۇرىلىمى تاڭعالدىرعان.

-سىزدەردىڭ قالالارىڭىزدا بولعانىمىزعا قۋانىشتىمىز. مەن ءۇشىن جانە دەلەگاسيا ءۇشىن بۇل استاناعا العاشقى ساپارىمىز. ءبىز قالانىڭ ينفراقۇرىلىمىنا قىزىقتىق. سالىنعان ارحيتەكتۋرالاردىڭ ءستيلى ءارتۇرلى جانە استانادا جولدار كەڭ ەكەن. ءبىز قالانى جوسپارلاۋدا سىزدەردىڭ تاجىريبەلەرىڭىزدى قولدانعىمىز كەلەدى. سول سەبەپتى سىزدەردىڭ قالالارىڭىزبەن ارىپتەستىك ورناتۋدى قالايمىز، - دەدى گۋانچجوۋ قالاسىنىڭ ساياسي كونسۋلتاتيۆتى كەڭەسىنىڭ ءتوراعاسى ليۋ يۋەلۋن.

سونداي-اق شەتەلدىك مەيمانداردى قالامەن تانىسۋ بارىسىندا ءوزىنىڭ كوركەمدىگىمەن، تازالىعىمەن ەسىل وزەنى قىزىقتىردى.

ەكى قالاعا تاجىريبە الماسىپ، ارىپتەستىك ورناتۋ ءۇشىن پەرسپەكتيۆالىق باعىت - تۋريزم سالاسى بولىپ تابىلادى. استانانىڭ گۋانچجوۋمەن دوستىق بايلانىس ورناتۋى ساۋدا-ەكونوميكالىق، مادەني جانە ءبىلىم سالالارىندا ۇلكەن مۇمكىندىكتەرگە جول اشادى.

اسپان استى ەلىنەن كەلگەن دەلەگاسيا كەزدەسۋ سوڭىندا استانامەن ىنتىماقتاستىق ورناتۋعا نيەتتى ەكەندىكتەرىن ءبىلدىردى.

ال، ەرتەڭ ەلوردادا ينۆەستيسيا باعىتىندا تاجىريبە الماسۋ بويىنشا قازاقستان-قىتاي جينالىسى وتەدى. وندا كەلگەن تاراپ قاتىسىپ، بەلسەندى اتسالىسپاق.