2017 جىلعى 16 تامىزدا قازاقستان رەسپۋبليكاسىنىڭ دءىن ىستەرى جانە ازاماتتىق قوعام ۆيسە-مينيسترى ب. ارىننىڭ توراعالىعىمەن قازاقستان رەسپۋبليكاسى ۇكىمەتىنىڭ جانىنداعى ءدىني بىرلەستىكتەرمەن بايلانىس جونىندەگى كەڭەستىڭ كەزەكتى وتىرىسى وتكىزىلدى دەپ حابارلايدى Qamshy.kz اقپارات اگەنتتىگى ق ر ءدىن ىستەرى جانە ازاماتتىق قوعام مينيسترلىگىنىڭ باسپا ءسوز قىزمەتىنە سىلتەمە جاساپ.

كەڭەسكە ءدىني بىرلەستىكتەردىڭ، قازاقستان حالىق اسسامبلەياسىنىڭ، مەملەكەتتىك ورگاندار مەن ۇكىمەتتىك ەمەس ۇيىمداردىڭ وكىلدەرى، سونىمەن قاتار ءدىنتانۋشى-عالىمدار، قوعام قايراتكەرلەرى قاتىستى.

كەزدەسۋ بارىسىندا قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى، سونداي-اق دەسترۋكتيۆتى ءدىني اعىمداردى ۇستانۋشىلاردى وڭالتۋ جانە الدىن الۋ سالاسىنداعى ءدىني بىرلەستىكتەردىڭ قىزمەتىن جەتىلدىرۋ تۋرالى ماسەلەلەرى قارالدى.

قازاقستان رەسپۋبليكاسى ءدىن ىستەرى جانە ازاماتتىق قوعام مينيسترلىگى ءدىن ىستەرى كوميتەتىنىڭ قىزمەتكەرلەرى ەلدەگى بەيبىتشىلىك پەن كەلىسىمدى ساقتاۋ جانە نىعايتۋ ءۇشىن قازىرگى قوعام دامۋىنىڭ اقيقاتىن ەسكەرە وتىرىپ ءدىن سالاسىنداعى زاڭنامانى ودان ءارى جاڭعىرتۋ ماڭىزدىلىعىن اتاپ ءوتتى.

قازاقستان مۇسىلماندارى ءدىني باسقارماسىنىڭ، قازاقستاننىڭ پراۆوسلاۆ شىركەۋى، قازاقستان حالقى اسسامبلەياسى وكىلدەرى جانە ساراپشىلار جاستارعا رۋحاني-ادامگەرشىلىك ءبىلىم بەرۋدە ءدىني قاۋىمداستىقتار ءرولىن اتاپ ءوتتى، سونداي-اق حالىققا ءاقپاراتتىق-تۇسىندىرۋ جۇمىستارىنىڭ تيىمدىلىگىن جوعارىلاتۋ بويىنشا جانە ءدىني ەكسترەميزم مەن راديكاليزمنىڭ الدىن الۋدا ۇكىمەتتىك ەمەس ۇيىمداردىڭ الەۋەتىن پايدالانۋ بويىنشا ءبىرقاتار ۇسىنىستار ايتتى.

ءىس-شارا قورىتىندىسى بويىنشا كەڭەس مۇشەلەرى كوتەرىلگەن ماسەلەلەر تۋرالى مەملەكەت پەن ءدىن اراسىنداعى قارىم-قاتىناستاردىڭ جۇيەسىن جەتىلدىرۋگە، سونداي-اق دەسترۋكتيۆتى ءدىني اعىمداردىڭ ءىزباسارلارى الدىن الۋعا جانە وڭالتۋعا باعىتتالعان ۇسىنىستار جاسادى.